* * *

Петӧ шонді. Кыдз нӧ талун сытӧг?
Кылан, менӧ чуксалӧ гудок.
Сашка, Сашка, топӧдла вай китӧ.
Аддзысьлытӧдз, менам варов вок.

Нормин сійӧн, мый ме коля парма,
Талявтӧм туй-ордым, тӧдса кӧдж?
Ӧтнад петан пищальӧн тэ арнас,
Сэки шӧйтіг казьтышт менӧ тшӧтш.

Казьтышт. Да эн жугыльтчы тэ, Сашка.
Ме ӧд эг на видлы парма шӧр.
Колльӧдысь вой тӧлыс весиг вашкӧ,
Чужан вӧр-ваӧ мед локті бӧр.

И Москваын оз вун менам Коми.
Кӧджса кыдзьяс пӧрччысясны кор,
Сэк и локта, вокӧ. Сідзкӧ, во мысьт
Кодкӧ кывлас кыклысь лыйӧм гор.