ВОЛГА

Ю весьтті тӧв ныр эз на лэб
И эз на чуж выль шумыс гылӧн.
Ме ассьым радлунӧс ог дзеб:
Роч юлысь шудсӧ сьӧлӧм кылӧ.

Да, абу кӧнкӧ, тан со, тан
Лӧз Волга ойдӧм, быттьӧ тулыс.
И юргӧ, сьылӧ послӧн сталь
Збой поезд кӧлесаяс улын.

Мем нимкодь: аддзӧ менам син,
Кыдз кывтӧ славнӧй Волга миян.
Ми тӧдам: матушкалысь ним
Оз первой нэм нин новлы сійӧ.

Минута коли, коли кык...
И сьӧлӧм весьшӧрӧ мӧй ӧзйис?
Ӧд сійӧ юсӧ ставнас дзик
Пыр кежлӧ сьӧрсьыс босьтны кӧсйӧ.

Кӧть меысь бӧрӧ кольччӧ ю,
Кӧть дзебсьӧ нин со мылькъяс сайӧ,
Но Волга йылысь югыд дум
Мен ыджыд радлун талун вайӧ.

Ӧд сэні, кӧн роч юлӧн ва
Бур туйсӧ ассьыс панӧ чӧла,
Сэн матын сулалӧ Москва —
Сӧветскӧй Рӧдиналӧн сьӧлӧм.