ЧУЖАНІНӦЙ МЕНАМ


Меным сьӧлӧм дойӧдз муса
Вельмӧм бушковъяса край,
Югдӧдӧ и тайӧ мусӧ
Ӧти Май,
Ӧти тулыс, ӧти шонді,
Ӧти верность да любов.
Сылӧн радлӧмыс пыр шонтӧ
Менсьым лов.
Сӧстӧм ёльяс, озыр лудъяс —
Ставсӧ окавны ме дась.
Ме ог прӧста ассьым шудӧс
Аддзы тась.
Вунӧдны-ӧ мен, кыдз арнас
Зарни койӧ кыддза рас,
Кыдзи чолӧмалӧ парма
Асъя час?
Вунӧдны-ӧ мен смел йӧзсӧ,
Налысь серам, налысь удж?
Видзӧдлан да — чышкы пӧсьтӧ,
Состӧ пудж!
Вунӧдны-ӧ, кыдзи йӧла
Новлӧ ягті выльлысь кыв?
Юргӧ, сьылӧ Войвыв. Сьӧлӧм,
Сьыв тшӧтш, сьыв!