ДРУЖБАЛӦН ГӦЛӦС


Вермас кӧ, лёк турӧб быд шы венас,
Сӧмын сылӧн вильшасьӧмыс весь.
«Ёна паськыд Рӧдинаӧй менам...» —
Тадзи сьылӧ негр-певец.

Турӧб пырыс сылӧн вына басыс
Воис татчӧдз, кыдзи мелі кыв.
И ме ачым тайӧ войся часас
Пані ас му йылысь сьыланкыв.

Олӧмыслысь радлун сыкӧд кылам
Кыдзи другъяс ми, кык муса вок.
Тані ме — Сӧветъяслӧн му вылын,
Сійӧ сэн, кӧн олӧны важ ног.

Но ми кӧсъям, кыкнанным ми кӧсъям,
Быдлаын мед ломзис тувсов луч,
Тышкасям ми югыд мирыс вӧсна
И ог некор кӧсйӧ тӧдны мудз.

Ланьті ме. А Робсон век на сьылӧ,
Быттьӧ сійӧ кӧнкӧ дзик жӧ тан,
Эз ӧд прӧста дружба гӧлӧс сылӧн
Татчӧ вотӧдз вудж лӧз океан.