МИЯН КОРАБЛЬ


Важ обычай морякъяслӧн тадз вӧлі тшӧктӧ:
Дзонь бутылка шампанскӧй судно киль улӧ кисьт!
Медым мореын шторм джуджыд гыяснас йӧктӧ,
Но корабль пытшкӧ весиг и ва войт оз письт.

Со и стапельысь лэччӧ нин миян корабльным,
И шампанскӧйлысь войтъяс шонді югдӧдӧ сэсь.
Чужан мунымлӧн правдаӧн, мирнӧй гӧрд флагӧн
Сійӧ татысянь вӧчас медся первойя рейс.

Миян правданым сэн, кӧні ыб вылӧ петӧ
Аслас тракторӧн гӧрны кӧсынкаа ныв,
Кӧн мотор лымъя пармалы пӧсьлунсӧ сетӧ,
Кӧні зарниӧн гыалӧ паськыд му выв.

Кӧні мича лӧнь рытъясӧ вашкӧдчӧ томлун,
И букет карӧй синмалы мыччӧ том зон.
Миян правданым сэн, кӧні уджӧн ми ёнмам,
Кӧні шондіа лунъяслысь тӧдӧны дон.

Тайӧ шондіа лун йылысь правдасӧ нуас
Океанъяс да мореяс вомӧн корабль.
Тайӧ правдасӧ эз на ӧд удайтчыв венны,
Оз кут ньылыштны сійӧс и ӧкмысӧд вал!

Прӧстӧй йӧзлы корабль нуас правдакӧд чолӧм,
Честнӧй йӧзлы, став ловъялы дружбалысь кыв.
Мед жӧ дружбаным быдмӧ да мичмӧдӧ олӧм,
Дзик быд гаваньлань нюжӧдӧ ассьыс ён сыв.

Миян суднолӧн винт правда туйӧд век сынӧ,
И кор скӧралӧ шторм, и кор нюмъялӧ штиль,
Мед оз кырлӧдлы врагъяслӧн виччысьтӧм мина
Сэсся некор нин, некор корабльяслысь киль.