ИВАН ВАСИЛЬЕВИЧ НИМКОДЯСЬӦ
Тувсов шондіыс пӧжис нин сельпоса заготовитель Иван Васильевичлысь балябӧжсӧ. Косьман руыс кайис весиг ичӧт складса ыджыд начальниклӧн кок улын куйлысь кӧрт лӧм чукӧрсянь, кодӧс талун вевъялісны нин вайны челядь. Заготовительлы сьӧлӧм вылас вӧлі долыд — ӧти лунӧ сійӧ тыртіс кӧрт лӧм примитӧм кузя быдса вося план да пыр на со вайӧны и вайӧны. Мыйыс сӧмын эз нин и вӧв склад ӧдзӧс дорын: ыргӧн тазъяс, «Зингер» вурсян машина, кык ли, куим ли ыргӧн самӧвар, кремневка пищальысь ствол, важ накӧвальня, чегӧм нуда колунъяс, куртан машинаысь кӧлеса, ош вылӧ пиня капкан да нӧшта дзик выль мыссян доз, коді дзирдаліс никельӧн вевттьӧм бокнас кӧрт лӧм чукӧрын. «Кодікӧ сыла талун локтас, — ас кежсьыс мӧвпаліс Иван Васильевич, — колӧ саймовтны».
Бусӧсь кумъясысь челядьлӧн чукӧртӧмторйыс югъяліс шонді водзын быдсяма рӧмнас.
— Пӧсь чолӧм миянӧс кӧрта кӧлуйысь мездысьлы. Нимкодясян, буракӧ, кӧрт чукӧр вылас? Тожӧ коланатор — мартенъяс виччысьӧны.
— Чолӧм, чолӧм, Павел Михайлович! Мый нин ветлан-мунан, кутшӧм мог суис ме дорӧдз?
— Этійӧс, мыссян дозсӧ коді нӧ вайис татчӧ?
— Детинкаыд и вайис асывнас вурсян машинаыскӧд тшӧтш.
— Машинасӧ эськӧ бабыслысь шышкӧма, а мыссян дозсӧ ӧд сӧмын тӧрыт ньӧблі хозмагысь. Но и артист... Прилавок увсьыс нин сетісны, мырдӧн кори да.
— Но босьт, сідзкӧ, дефицит бӧр ог мӧдӧдӧ.
Сэсся Иван Васильевич аддзис: челядь мыйкӧ гӧгыльтӧны сикт кузя. Воисны склад дорӧ, а вӧлӧмкӧ, быдса гусенича.
— Тайӧ нӧ бара кытысь кватитінныд?
— А Нӧвина му вылын коймӧд во нин сімӧ, со и лэччӧдам, тупыльтім да. Тайӧ пока веситӧй, кӧкъямысӧд класслы колӧ пасйыны, а ми, час, тіянлы трактор на вайӧдам ас ки-кокнас.
— Кыдз... трактор? — Иван Васильевичлӧн синъясыс кайисны плешкӧдзыс.
— Катша ты бокын тай некымын во нин сулалӧ, пускачыс эз вӧв да. Ӧні ми сійӧс судзӧдім, куимӧн кольччисны пуктыны. Заправитам да вайӧдам. Мӧдӧдны и колӧ, некодлы кӧ оз ков.
— Сідзтӧ сідз, а управляющӧйыс мый шуас?
— А сійӧ тӧдӧ али мый трактор йывсьыс, быд воӧ выль управ да?
— Но вайӧдӧ инӧ, сэсся видзӧдлам...
Тӧвзис-локтіс Катша ты боксянь некодлы ковтӧм трактор, гольскӧдчис зэлӧдтӧм гусеничаяснас. Ас ки-кокнас локтӧ Иван Васильевичлы кӧрт лӧм. Бӧрд кӧть серав...
