ЁН ЛОВ ШЕДӦМА

Рыбинспектор Чертышев чеччис асывнас зэв кыпыд руа: ӧти-кӧ, юрыс сылӧн эз вись, еджыдсӧ тӧрыт гӧрдыскӧд эз ӧтлаав да; мӧд-кӧ, асылыс сэтшӧм мича да лӧнь вӧлі, мый скӧравны гӧтырыс вылӧ ли, челядьыс вылӧ ли прӧстӧ лолыс эз лэпты.

«Талун колӧ ва вылӧ петавны, — мӧвпаліс чери запасъяс видзысь, — тӧлӧдчыштны неуна да, гашкӧ, Елизарӧс верма кыйӧдны, менам сы вылӧ важӧн нин вирӧй пуӧ. Ӧні нин сійӧ, как пить дать, Важ юын сетьяссӧ видлалӧ».

Берег дорын, кӧні сулаліс пыжыс Чертышевлӧн, сиктса мужичӧйяс нин кӧвъялісны. Аддзис найӧс лэччигмозыс инспектор: «Тані тай шпионъяс нин эмӧсь, кыйӧдӧны, кодарӧ сетча. Мед кыйӧдасны. Ме первой катчӧс сетчыла, а сэсся кывта Важ юӧ». И збыльысь, инспекторлӧн пыжыс регыд нин саяліс сикт катыдса нӧрыс сайӧ.

Мотор уджалӧ бура, быттьӧ узьӧ пыж бӧжын. Ачыс Чертышев пыж нырын пукалӧ, руль сайын, ӧтарӧ-мӧдарӧ бергалӧ. Сьӧд кӧтшас горулын вужляяс бокысь челядь ёкыш кетш вугралӧны. «Мед вуграсьӧны, найӧ оз бырӧдны черисӧ». Насянь неылын Опонь дед пыжсянь вуграсьӧ, сідз и нетшкӧ мыкъяссӧ ӧти бӧрся мӧдӧс.

Недыр мысти Козпӧлӧс тыысь паныд пыжа петіс. Пыжыс вӧйӧма, личкӧмаӧсь сійӧс боталаясыс да кыйӧм чериыс. «Кочев шуриныскӧд. Татшӧм дядьӧяс дорад он жӧ ӧд лысьт сибӧдчыны. Оз кӧ боталаӧ дзугны да шыбитны юас, мӧдтор вермасны вӧчны».

Эз кӧ аддзы Чертышев Мича чой кывтыдысь спиннингӧн ӧласьысьӧс, гашкӧ, и бӧр косӧдіс пыжсӧ, но аддзис.

— Здорово, зять!

— Здорово-то здорово, да... кӧвъялан, понимаешь ли. Ме тані тэнӧ эг виччысь. Спиннинг со выльӧс ньӧби да кыдзи ӧлышта, сідз и «борода» артмӧ, сідз и дзугсьӧ.

— Он кӧ куж, нинӧм и ӧласьны.

— Ме, понимаешь ли, велӧдчигмоз сӧмын.

— Ноко петкӧдлы меным, мый сэні оз артмы.

— На видзӧдлы...

— Ы-хы, тормозсӧ зэлӧдыштны колӧ да сэсся певтӧ шыбитігӧныд со тадзи кут... аддзан?

— Но и мый? Ме тадзи жӧ кута вӧлі, да дзугсьӧ. Ноко нӧшта пробуйтла.

Шыбитіс зятьыс кыснансӧ, коді эз лэб ю шӧрӧдз, а сатшкысис вугырнас Чертышевлы веськыд пель тугъяс, ӧшӧдчис кыснан лоптыс, быттьӧ чусі. Зятьыс эз казяв дзик пыр, кытчӧ кыснаныс лэбис, да гартны кутіс кӧвсӧ, а кор сійӧ зэлаліс, кыліс инспекторлӧн лэчӧ пырӧм ош моз горӧдчӧмыс, а кыйсьысьлы медводз юрас воис, мый ыджыд чери шедӧма.

— Эм, э-м! — горӧдіс сійӧ. — Да и ёнкодь на лов шедӧма, тыдалӧ...

— Эн нин кыскы, мися, пельӧс оровтан... кутшӧм лов!

Зятьыс шай-паймуніс, кор аддзис шуриныслӧн пель тугйын ӧшалысь кыснансӧ. Ӧтиыс и мӧдыс кывъяссӧ воштісны, да шӧйӧвошӧм йӧзлы юраныс весиг эз во, мый кыснансӧ позьӧ вундыны кӧв помсьыс либӧ разьны, и найӧ сідз и мӧдӧдчисны пыжъяснаныс — дор дорӧн. Рыбинспекторыс водзынджык, газсӧ оз лысьт содтыны, мед эськӧ кӧвйыс эз зэлав, а мӧдыс, зятьыс, эз лысьт кольччыны.

Амбулаториялань сикт кузя мунісны да воча локтысь мужичӧйяс картузъяссӧ пӧрччӧмӧн копыртчылісны шуда кыйсьысьлы: бур кыйдӧсӧн пӧ тэнӧ. А рыбинспектор чайтіс, мый тайӧ сійӧс чолӧмалӧны браконьерӧс кутӧмысь.