ВЫЛЬ ВО ДЫРЙИ
Кыдзкӧ сідзи артмис, Ӧртьӧм Микол некор на эз юлы шампанскӧй. Сиктыс вӧлі бокын, складъяс кӧдзыдӧсь, сы вӧсна ичӧт градуса юанторъяссӧ эз ёна старайтчыны ваявнысӧ. Но Выль Во водзвылын Микӧллысь гӧтырсӧ, Марьяӧс, мог суис ветлыны райцентрӧ скӧт видзысьяслӧн сӧвещанньӧ вылӧ.
— Марей, Выль Во кежлас ӧд воан жӧ?
— Тӧлысь кӧ оз понды мунны сӧвещанньӧыс, воа.
— Бур, сідзкӧ, челядьыдлы, гашкӧ, чӧсмасянтор ваян ёлка кежлӧ да ме йылысь на эн вунӧд.
Сӧвещанньӧ бӧрын Марья гӧгӧртіс магазинъяс, ньӧбис челядьыслы торт да мукӧд юмовторъяс, а сэсся веськаліс винаӧн вузасян магазинӧ, оз-ӧ мыйкӧ сэтысь ликмы Миколыслы Выль во кежлӧ. Аддзис Марья эзысь бумагаӧ гаровтӧм сулея юръяссӧ. «Мый нӧ сэні? Мужик и баба тай ньӧбӧны. Босьта инӧ доз-мӧд». Туйыс Марьялӧн гортӧдзыс вӧлі кузь — кыті машинаӧн, кыті вӧлӧн, а кытікӧ и подӧн — да воис сійӧ сӧмын Выль во водзвывса дас час рытын. Миколӧс шогӧдліс нин, мый праздниксӧ ковмас гӧтыртӧгыс пасйыны, но кыліс кильчӧ вылын гын сапӧгъяссьыс лым пыркӧдан шы.
— Марья, тэ али?
— Ме, дерт. Он-ӧ нин кодӧскӧ мӧдӧс виччысь?
Ичӧт челядьыс (ӧтикыс садйӧ ветлӧ, а мӧдыс велӧдчӧ нин) кылісны мамыслысь гӧлӧссӧ, воча котӧртісны.
Пельӧсын ёлка эзысь чачаясӧн дзирдалӧ, пызан вылын сёян-юан, вайӧм гӧснечьяс да шампанскӧй дозйыс зымвидзӧ.
— Восьт, ноко, дозсӧ, регыд дас кык час кучкас, — тшӧктіс гӧтырыс Миколлы.
Мӧдыс косявліс эзысь бумагасӧ, а пробкасӧ, вӧлӧмкӧ, сутугаӧн на домалӧмны.
— Тані мыйкӧ зэв жӧ нин донатор, ӧдйӧ он перйы.
— Абу донтӧм и эм.
Микол разис сутугасӧ да сӧмын на кутчысис еджыд пробкаас, а сійӧ кыдз тай лыйыштас чуньяс костіыс... Микол кыдзи пукаліс, сідз и кынмис места вылас. Весиг эз казяв, мый быгйыс визувтӧ нин сос пытшкас, гач вылас.
— Тупкы, ставыс петас! — горзӧ гӧтырыс.
— Зрывитчас кӧ?
— Мый тэ, абу жӧ ӧд бомба?..
— Вӧрсаыс тӧдӧ, мый тэ вайӧмыд...
Сэсся Микол йӧткис водз чуньсӧ сулея вомас, дугӧдіс быгсӧ петӧмысь.
— Ланьтіс, буракӧ... Ноко видлам, мыйся дивӧ татшӧмыс. Тэ, Марья, ме бӧрын ю, гашкӧ, и кельдӧдны кута...
Микол юис.
— Бур тай вӧлӧма. Быдсӧн биӧн лэччис голя кузя, нырбордъясӧс шонтыны кутіс и.
Марья аддзис, мый верӧсыс эз кельдӧд, а гӧрдӧдіс, кыпӧдіс бокалсӧ да шуис:
— Но, Выль воӧн, Миколай, тэ тай повзьӧмыдла нинӧм эн сяммы меным висьтавны-а... Выль шудӧн!
