* * *

Муслун сьӧлӧм дінӧ инмис
Меным, ог тӧд ачым кыдз.
Шор пос вылын сулалім ми
Окасигтыр рытывбыд.

Вӧлі басни, вӧлі сёрни,
Нывка варов и зэв вӧй.
Янсӧдчигӧн вӧлі сёр нин,
Но эз бурмы сьӧлӧмӧй.

Ӧдва аски луныс воис.
Муса рытыс дыр эз лок.
Лунтыр морӧс пытшкӧс сёйис
Быттьӧ рад, и быттьӧ шог.

Югыдӧн на гортысь петлі:
Корси этась, корси тась.
Войбыд туй кузя ме ветлі — 
Милӧйӧй эз паныдась.

Юр вем пытшкын чужис полӧм...
Аттӧ, ыджыд мокасьтӧ!
Часлы, шор пос дорӧ вола — 
Гашкӧ, мӧдкӧд окасьӧ.