* * *

Рӧмыд рытӧ кыа кусӧ,
Машлӧн коклябӧрыс лудӧ:
Локтӧ паракодӧн мусук — 
Вайӧ запаньысь выль гудӧк.
____________

Чуньяс улын гудӧк тэрыб,
Лывкъякылӧ морт шы горӧн:
«Видза коляд, багыр-черӧй,
Локта гортӧ мусук дорӧ...»

Кык яг костын, Эжва пӧлӧн,
Сьыланкывлӧн горыс гажа:
«Муса Машук, муса вӧлін,
Ӧні нӧшта муса, Машӧ»...

«Мый нӧ, Степан! Эн тай весь ӧд
Вӧв тэ медся бур ударник!
Йӧкты, Степан, вывті лӧсьыд,
Джоджыс кузя сяркнит-шаркнит...»

Гажа шы тӧлыс оз йӧрмы,
Юргӧ йӧлӧгаӧн ылӧ.
Дивуйтчыныыс оз вермы
Ывла вылыс ставыс вылӧ.

Гудӧк гажлӧн вынйӧр содӧ,
Кок шы тшӧкмӧ, нӧшта тшӧктӧ...
Быттьӧ тшӧтш и паракодыс
Кӧлесаяс вылас йӧктӧ.

Тювгӧ сійӧ Эжва шӧрӧд,
Гыыс нюлӧ берег дорсӧ...
____________

...Машӧ лэччӧ ва дор йӧрӧд,
Чужӧмбанас нюмыс ворсӧ.