ПАСЬКЫД ЕНЭЖЫС


Паськыд енэжыс Сӧвет му весьтын,
Сэтшӧм джуджыд да лӧзалан сӧдз,
Ставсӧ ӧтчыдӧн лолыштан эськӧн, —
Морӧс йӧрышыд сӧмын оз лэдз.

Мыйта вӧляыс, гажлуныс мыйта!
Сьылысь лэбачӧн сынӧдыс тыр...
Лунтыр видзӧда, енэжысь кыйӧда:
Уклад лэбачьяс жургӧны пыр.

Сійӧ лэбачьяс вылын геройяс
Водзӧ лэбӧны пӧткаяс моз.
Зумыд вынйӧрӧн, вежӧра-збойӧн,
Кыдзи мӧдлаын некӧні оз.

Самолёт тӧла сынӧдсӧ чашйӧ,
Гашкӧ, полюсӧ восьтӧ выль туй,
Саридзсай муӧ тӧвзьӧдӧ, гашкӧ...
Кӧть мед кытчӧ, пыр сиа — «бур туй»!

Мед нӧ Войвылыс кымӧрӧн пӧльтчӧ,
Оз веж туй визьсӧ гӧрд самолёт.
Водзӧ лэбзьӧ пилот-комсомолеч:
Чорыд кипод, моторыс оз чот.

Паськыд енэжыс Сӧвет му весьтын,
Сэтшӧм джуджыд да лӧзалан сӧдз,
Горша ӧтчыдӧн лолыштан эськӧн, —
Морӧс йӧрышыд сӧмын оз лэдз.

Лэбзьы, лэбачӧй! Сынӧдсӧ дзенӧд!
Паныд вӧрӧглы, ковмас кӧ, мун.
Ӧд ми радейтам ассьыным енэж
Сідз жӧ, кыдзи и ассьыным му.