ПЕРВОЙ МАЙ

Эзысь сынӧдӧн енэжыс пӧльтчӧ.
Кыдз нӧ гажмӧм лов вывлань оз кай?
Алӧй флагъясӧн, сюрс кӧлӧкӧльчикӧн
Локтӧ таланьӧ веж тӧлысь май!

Ставӧн горӧдлам ӧтувъя чолӧм,
Юргас мед тувсов музыка шы!
Кыдз нӧ та дырйи оз йӧкты сьӧлӧм?
Кыдз оз кыпты тан том гажлӧн гы?

Лэдзлы сынӧдас, завод, гудоктӧ,
Пальӧд ывлалысь ылалӧм садь!
Алӧй флагъясӧн, йӧзъясӧн локтӧ,
Локтӧ таланьӧ веж тулыс кад.

	Апрель мыйкӧ тӧрыт
	Кӧдзыд йылысь сӧрис.
	Тулыс помлӧн тӧвкӧд гӧрӧд
	Талун ори шӧри.

	Шӧри ори
	Визув ю.
	Тувсов горӧн
	Жувгӧ юр.
	Сьылӧ нывка,
	Радлӧ зон...
	Серав, ывла!
	Тӧвлы пом!

Югыдлӧз кадӧй, кутшӧм тэ том!
Гӧгӧр вын тэсянь ыпъялӧ биӧн.
Аддзан, туйыс со мый кузя миян,—
Некӧн шудлунлӧн оз тыдав пом!

Аддзан, Май!
Аддзан, кымынӧн ми!
Мыйта надея синъясын ломзьӧ!
Кумач флагъясӧн шымырт став мир,
Му и саридзвыв сӧдз нюмӧн ловзьӧд!