ШУТ БАЛАКИРОВ

Олӧны-вылӧны Ятчана Ваняяс. Ставныслӧн Ванька нимныс. Найӧ обозӧн мӧдӧдчасны мунны мӧд карӧ. Мунасны ӧти станция и узьмӧдчасны. Найӧ узьны кутасны деревняын. Деревнясаяс думайтӧны: «Ятчана Ваняяс зэв йӧйӧсь». Деревнясаяс шуӧны:

— Час жӧ, — шуӧны, — ми гортланьыс додь вожъяснысӧ бергӧдлам. И найӧ додьяссӧ быдсӧн бергӧдлісны. Ятчана чеччисны узянінысь и мунны кутісны. Мунісны ӧти станция. Видзӧдӧ ӧти Ваня: ӧти баба пес пыртӧ керкаас. И Ваня горӧдас мӧд Ванялы:

— Эй, — шуӧ, — этійӧ бабаыс дзик менам гӧтыр кодь. (Эськӧ аслас и гӧтырыс.) Муныштісны неылӧ, и мӧд Ваня горӧдіс:

— Видзӧд, — шуӧ, — этійӧ бабаыс ва вайӧ, дзик менам гӧтыр кодь. (Эськӧ аслас и гӧтырыс.) Видзӧдӧны: коймӧд баба пос помсӧ чышкалӧ. И Ваня горӧдас:

— Эй, — шуӧ, — этійӧ бабаыс дзик менам гӧтыр кодь. (Эськӧ аслас и эм.) Найӧ муныштісны и гӧгӧрвоисны: бӧр гортӧ бергӧдчисны, локтісны гортӧ. И Ваня горӧдіс:

— Видзӧд, — шуӧ, — кык лун мунім да бӧр гортӧ воим!

И налӧн сю эм вундыны. Найӧ каясны вундыны, зэв уна Ваня. Ӧбедӧдз вундасны и ӧбедайтны лэччасны гортӧ. А Ваняяс сиктын вӧлі шут Балакиров. Сійӧ думыштіс: «Яткаса Ваняяс йӧйӧсь». А яткаса Ваняяс вӧлі сюсӧ киӧн нетшкӧны. Шут Балакиров босьтіс чарла ӧтикӧс и Ваняяслы му вылӧ катӧдіс, чумали юрӧ чарла сатшкис. Ачыс вӧр пиас муніс и пуксис. Ваняяс воисны вундыны и чарласӧ аддзисны:

— Видзӧд, — шуӧны, — змейыд!

Найӧ зоръяс кералісны; зырӧдісны и змейӧс кутісны вачкавны. А змей чеччалӧ. Ӧти мортлы голяас чеччыштіс. И найӧ шуисны:

— Вот, — шуӧ, — ӧти мортӧс сёйны кутіс змейыд!

Найӧ босьтісны гез и змейӧс домалісны. Ваняяс чукӧртчисны и нетшыштісны гезсӧ — мортлӧн юр уси.

— Вай, — шуӧны, — тайӧ змейсӧ юӧ кыскамӧй да чӧвтамӧй!

И найӧ кыскисны ю дорӧ. Мӧдар гез помӧ ыджыд из кӧрталісны. И пыжӧ пуксисны, нёль Ваня пыжӧ сӧлісны и джуджыд йир дорӧ нуисны. Изсӧ чӧвтісны, а чарла пыж дорас крукасис и налысь путкыльтіс пыжтӧ.

Нёль Ваня вӧйисны. А ӧстальнӧй Ваня кайисны му вылӧ. Найӧ кутісны сю нетшкыны. Сэсся гортаныс лэччисны.

Шут Балакиров видзӧдӧ ӧшиньӧдыс: локтӧны Ваняяс. А шут Балакировлӧн пачыс ломтысьӧ и гырнич пуӧ, шыд гырнич пуӧ. Ваняяс пыригкежлӧ босьтіс гырничсӧ, порог улас пуктіс. Ваняяс пырисны. Ӧти Ваня и шуӧ:

— Видзӧд, — шуӧ, — гырничыс порог улас, а пуӧ!

Найӧ думайтӧны: «Вот тайӧ кӧ гырничсӧ босьтам, оз ковсьы би, сідзи и пуӧ». И шут Балакировлысь кутісны юавны:

— Дона-ӧ тайӧ гырничыд?

— Сё чӧлкӧвӧй, — шуӧ.

Найӧ босьтісны гырничсӧ и мунісны гортаныс. Порог улӧ пуктісны, ва пуктісны, шыдӧс пуктісны. Видзӧдӧны гырнич вылӧ: нинӧм вылӧ оз пу. И Иванъяс шуасны:

— Тайӧ шут Балакиров миянӧс ылӧдіс. Мунам сійӧс виам!

Шут Балакиров видзӧдӧ ӧшиньӧдыс. А сылӧн вӧлі лӧз кӧбыла. Пыртіс керкаас, лӧз гын вылӧ сувтӧдіс и кӧбылалы эзысь деньга, сё чӧлкӧвӧй сітанас сюйис. Кисьтіс куим пуд зӧр. Ваняяс пырисны керкаӧ — и налӧн гырничыд вуні. Ваня шуӧ:

— Видзӧд, — шуӧ, — кӧбыласӧ кыдзи вердӧ!

Ваняяс кутісны видзӧдны: Кӧбыла сіталіс ветымын чӧлкӧвӧй эзысь. Ваняяс шензьӧны:

— Видзӧд, — шуӧны, — кутшӧм кӧбылаыс, ӧтпырйӧ ветымын чӧлкӧвӧй сіталіс!

И кӧбыла мӧд ветымынӧс сіталіс. Иванъяс шензьӧны:

— Тайӧ, — шуӧны, — кӧбыласӧ ми босьтам кӧ, кымын тысяча сіталас суткинас!

И Ваняяс юалӧны:

— Шут Балакиров, кӧбылатӧ он-ӧ вузав?

— Вузала, — шуӧ.

И Ваняяслы вузаліс витсё чӧлкӧвӧйысь. Ваняяс нуӧдісны гортаныс кӧбыласӧ. Лӧз гын вылӧ сувтӧдісны и куим пуд зӧр сетісны. Ваняяс кӧбыла гӧгӧр пуксисны и виччысьӧны деньга сіталӧм. Кӧбыла и сіталіс ведра ыджда зӧр сіт. Ещӧ виччысисны, и бара сіталіс, мӧдысьсӧ не сы ыджда нин сіт чукӧр. И Ваняяс шуӧны:

— Этійӧ, — шуӧны, — шут Балакиров бара миянӧс ылӧдіс.

Найӧ бара мунісны вины. Шут Балакиров ӧшинь пырыс аддзис: Ваняяс локтӧны. А шут Балакировлӧн вӧлі гадь. Гаддьӧ вир кисьтіс и гӧтырыслы киняулас кӧрталіс. Ваняяс пырисны. Шут Балакиров кутіс гӧтырыскӧд тышкасьны и гӧтырыслы пуртӧн киняулас чуткис. Гӧтырыс уси и кулі. Быдсӧн джоджыс вир лои. Ваняяс видзӧдӧны.

— Видзӧд, — шуӧны, — ассьыс гӧтырсӧ виис!

Шут Балакиров плеть босьтіс и гӧтырыслы куимысь вартіс. Гӧтырыс зэв ӧдйӧ чеччис. А Ваняяс шензьӧны:

— Видзӧд, — шуӧны, — гӧтырыслы плетьӧн вартіс, дай ловзис!

И йӧй Ваняяс шуӧны:

— Миян гӧтыръяс вывті наянӧсь, оз кывзысьны. Вай, — шуӧны, — тайӧ плетьсӧ босьтам.

И шут Балакировлысь юалӧны:

— Он-ӧ, — шуӧны, — тайӧ плетьсӧ вузав миянлы?

— Вузала, — шуӧ.

И кыксё чӧлкӧвӧйысь вузаліс плеть. Найӧ мунісны. Ӧти Ваня шуӧ:

— Вай, — шуӧ, — ме медводз гӧтырӧс велӧда.

И Ваня босьтіс плеть. Пырис керкаас, пурт кватитіс киас и гӧтырыслы киняулас чуткис. Гӧтыр кулі. Ваня нӧйтіс плетьӧн гӧтырсӧ — эз чеччы. Думайтчӧны Ваняяс: «Ӧтилаӧ колӧ гӧтыръяснымӧс чукӧртны». Найӧ чукӧртісны ӧти керкаӧ и ӧтпырйӧ чутйӧдлісны гӧтыръяснысӧ. Сэсся плетьӧн нӧйтісны, нӧйтісны — некод эз чеччы. Ваняяс шуӧны:

— Тайӧ шут Балакиров бара миянӧс ылӧдіс. Мунам, виам!

Шут Балакиров аддзис Ваняясӧс, ен ув пельӧсас водіс и кулі, а гӧтырыслы тшӧктіс ладанӧн тшынны. Ваняяс пырисны керкаӧ — шут Балакиров кулӧма: гӧтырыс ладанӧн тшынӧ. Ваняяс шуӧны:

— Тайӧс тай эськӧ морыс лыйӧма!

Ваняяс босьтасны шут Балакировӧс и нуасны кладбище площадь вылӧ, гу кодъясны и гуӧ сюясны. Гуас пӧв вольсаласны и аршинӧн-джынйӧн муӧн тыртасны. И ӧти Ваня шуӧ:

— Час, — шуӧ, — ме на прӧщанньӧ гу вылас сітала!

Ваня пуксяс, а шут Балакировлӧн сьӧрсьыс вӧлі жигайлӧ да жигайлӧнас сітанас тойыштіс. И Ваня кутіс горзыны:

— Ой, рӧдительскӧй чиннас казнитіс!

И ставыс пышъялісны гортаныс. А шут Балакиров петіс гусьыс, гортас муніс. Ваняяс аддзисны сійӧс, шуӧны:

— Видзӧд, шут Балакировӧс ми гуӧ дзеблім, а сійӧ гортас нин уджалӧ!

Найӧ бара мунісны, шут Балакировлысь домалісны кисӧ и коксӧ, горт вӧчисны и гортйӧн ю дорӧ лэччӧдісны. Видзӧдӧны: ю вылын зэв кыз йи. Ваняяс эновтісны шут Балакировӧс, ставныс кайисны гортаныс пыридзла.

Смерть локтіс шут Балакиров дорӧ. Смерть и юалӧ:

— Шут Балакиров, — шуӧ, — мый нӧ тадзисӧ домалісны?

— Менӧ, — шуӧ, — губернаторӧ пуктӧны да, ог пуксьы да, юӧ сюйӧны.

Смерть и шуӧ:

— Вай, — шуӧ, — ме пукся.

Смерть шут Балакировлысь разяліс кӧртӧдъяссӧ и водіс. Шут Балакиров пышйис. Ваняяс локтісны, юкмӧс вӧчисны и юӧ кутісны кыскыны смертьӧс. Смерть и горзӧ:

— Энӧ сюйӧй юас, пукся губернаторӧ!

Ваняяс шуӧны:

— Ещӧ тэныд губернатор ковмис!

Йи куд улӧ йӧткыштісны смертьӧс. И йӧз кутісны овны куимсё воӧдз. Некод эз кут кувны. Йӧз кутісны думайтчыны: «Кытчӧ жӧ смертьыс лои?» И шуӧны:

— Вайӧ юалам, оз-ӧ шут Балакиров тӧд?

Мунісны и юалісны:

— Шут Балакиров, он тӧд, кытчӧ смерть лои?

— Вот, — шуӧ, — эта весьтын юас медджуджыд йирас.

Йӧз босьтісны тыв и тывъялісны, и смерть локтӧ тывйын. Ӧдва нин лолыс, сэтшӧм омӧль тшыгйӧнтӧ олӧмсьыд. И бара кутісны йӧз кулавны. А шут Балакиров кутіс Ваняяс дорті ветлавны. Ваняяс бара аддзисны:

— Видзӧд, — шуӧ ӧти Ваня, — шут Балакировтӧ йи куд улӧ сюйлім-а, бара тан нин ветлӧ!

Бара мунісны Ваняяс, шут Балакировӧс домалісны и лэччӧдісны ю дорӧ. Ю вылын бара кыз йи. Ваняяс ставныс кайисны пыридзла гортаныс. А шут Балакиров сэні горзӧ:

— Баярад ог пуксьы!

Видзӧдӧ: князь пи локтӧ пара вӧлӧн. Зэв бур вӧвъясыс, серӧй вӧвъяс. Шут Балакиров весьтӧ воис и князь пи шуӧ:

— Шут Балакиров, мый нӧ тэнӧ тадзисӧ накажитӧны?

— Вот, — шуӧ, — менӧ баярӧ пуктӧны да, ог пуксьы да, юӧ сюйӧны.

Князь пи шуас:

— Вай ме пукся!

Шут Балакировӧс разяліс, а князь пи водіс гортйӧ. Шут Балакиров зэв бура кӧртавліс и пара вӧлӧн гортӧ кайис. Ваняяс воисны, юкмӧс вӧчисны и юкмӧсӧ кутісны кыскыны. Горзӧ:

— Баярад пукся!

Ваняяс шуисны:

— Ещӧ тэд баяр ковмис!

И Ваняяс кайисны гортӧ. Видзӧдӧны: шут Балакиров зэв бур пара вӧлӧн локтӧ, телегаас му лӧдӧма. Ваняяс зырӧдісны:

— Видзӧд, — шуӧны, — шут Балакировӧс юӧ сюйим-а, кутшӧм бур пара вӧлӧн локтӧ!

Шут Балакировӧс кутісны, и Ваняяс шуӧны:

— Мыйла миян му вывті ветлан?!

Шут Балакиров шуӧ:

— Ме, — шуӧ, — тіян му вывті ог ветлы. Менам, видзӧд, телегаад аслам муыд эм.

Аршынӧн-джынйӧн му кыскӧ. Ваняяс юалӧны:

— Кыдзи тэд татшӧм бур вӧвъясыс сюрины?

Шут Балакиров шуас:

— Эн ӧмӧй кывлӧй, кыдзи юад йӧткыштінныд, ме «Чур Бурко!» шуи. И ме медглянитчысь вӧвъяссӧ кватиті дай петі.

Ваняяс и думайтчӧны: «Татшӧм бур вӧлыс миянлы колӧ жӧ». Шут Балакировлысь юалӧны Ваняяс:

— Татшӧм вӧлыс уна-ӧ на коли?

Шут Балакиров шуас:

— Уна на, толькӧ, — шуӧ, — бур вӧлыс этша.

И Ваняяс шуӧны:

— Вай мунамӧй юас!

Ваняяс ю дорӧ воисны и ставныс йир пыдӧсӧ пырисны вӧвла. Найӧ ставныс и пӧдісны юӧ. А шут Балакиров олӧ Ваняяс деньгаӧн. Олӧ-вылӧ дай талун.

Пом.