МАЙДАН ПОПОВИЧ

Олӧны вӧлі поп гозъя. Доход ёна локтӧ, а пи ни ныв абу, куласны кӧ, овмӧсыс кольӧ йӧзлы. Шогсьӧны. Век мӧвпалӧны пи ли ныв йылысь. Сэсся коркӧ и чужис пи. Оз тӧдны, кутшӧм ним пуктыны. Пуктісны Майдан Попович нимсӧ.

По минутам, по часам быдмӧ. Ар вита кымын лои да котравны кутіс прамӧя: код вылӧ кутчысьлас, сійӧс и дойдас. Ставыс норасьӧны: ӧти пи пӧ дай сійӧ урӧс, быдӧнӧс дойдалӧ (ён да сы вӧсна и дойдалӧ). Ар даса кымын лои, прамӧя кутіс гуляйтны: куим суткиӧн ӧтчыд волӧ. Волас, деньга гуас и бара мунӧ гуляйтны. Бать шогалӧ, бӧр пӧ колӧ сійӧс утушкайтны. «А кыдзи утушкайтан, кутчысьнысӧ он лысьт да», — попаддя шуӧ.

— Эм ӧти ты, — поп шуӧ, — куим километра пасьта, куим километра кузя. Сэтчӧ коді ветлӧма, абу на бӧрсӧ ловйӧн волӧма. Сэтчӧ комын вося доходла мӧдӧдлам да регыд чӧртъяс шняпыртасны.

Поплы ӧд доход век колӧ. Коркӧ, зонмӧ, пи воис.

— Аттӧ дивӧ, — поп шуӧ, — Майдан Попович, колӧ комын вося доход правитны, чӧртъяслысь. Ветлы ты дорӧ да кор!

— Ветла, — пӧ.

Попкӧд спорӧ эз мун. «Но ӧні и воштас юрсӧ», — думайтчӧ поп. Босьтіс Майдан Попович кос нянь, нырагез пыш босьтіс тор кызь кымын, муніс. Воис вад. Зэв лӧнь, шондіа. Пуксис вужъя вылӧ ты бокад. Заводитіс нырагез вӧчны. Вадйыд кутіс катласьны: тулас да ямлас, тулас да ямлас. Петіс чӧртпи:

— Бог помотш, Майдан Попович! Мый нин керан?

— Нырагез кера. Тысӧ тіянкӧд шыркнита да гортӧ нуа, мед косьманныд ставныд.

— Мыйысь, мыйысь?

— Батьлы абу мынтылӧмныд комын вося доход.

— А мынтам ӧд, час, дедӧлысь юала да. Уна-ӧ?

— Этатчӧ шляпаас.

— Часлы, ме юала.

Дед дінӧ пырис.

— Мый нин, пиӧ?

— А мый, дедӧ, воӧма Майдан Попович, став ваднад кӧсйӧ нуны.

— А ён-ӧ мортыс?

— А мыйкӧ эськӧ эм жӧ-а, ме кодьыс сійӧ эськӧ абу на да.

— Тайӧ эм менам кӧрт палич, петкӧд да, кодлӧн вылӧджык волас паличыд, сылы и мынта. Оз кӧ вермы, ассьыс юрсӧ босьта!

Палич пуд даса кымын. Петкӧдіс чӧртыд кӧрт палич:

— Вот, Майдан Попович, дедӧ тшӧктіс висьтавны, кодлӧн вылӧджык кайлас, сылы и мынтас вотсӧ.

— Но вай, койыштлы тэ первой, тэнад кырымад нин паличыд да.

Койыштліс да, ӧдва тыдавмӧн качліс паличыд, сэсся бӧр гал кутіс.

Майдан Попович босьтіс, непӧштӧ койыштны — ӧдва вермӧ вӧдитнысӧ.

— Но, мый нӧ, Майдан Попович, он койышт?

— То тай кымӧр пласт локтӧ, сэтчӧ койышта, мед паличныдтӧ нуас.

— Вай, вай, вай, Майдан Попович, миян тайӧ и эм став уджалан кӧлуйыс! Мынтас дедӧ.

Паличсӧ босьтіс и пыртіс.

— Дедӧ, муртса паличыд эз вош. Ме шыбиті да ӧдва тыдавмӧн, а сійӧ кӧсйӧ вӧлі сьӧд кымӧр пласт вылӧ койыштны.

Дедыд и шуӧ:

— Молодеч, пыртӧмыд на. А эськӧ паличтӧгыд миянӧс вӧтлыны вермисны татысь. Уна-ӧ корӧ?

— Оз уна, шляпаас и корӧ.

Босьтіс зарни тыра мешӧк, четверик мында, да петкӧдіс. Пыралігкостіыс Майдан Попович гуран вӧчис, шляпасӧ розьӧдіс дай пуктіс гуран вылад. Чӧртпи бузгис, бузгис зарнисӧ — шляпа джынйыс и лои.

— Ыджыд жӧ шляпаыд, дзоля кажитчӧ-а, — чӧртпи шуӧ.

— А медым чукйӧн лои! — тшӧктіс Майдан Попович.

Пыраліс, мӧд мешӧк петкӧдіс. Шляпаыс пӧ ыджыд жӧ и вӧлӧма, буриник мортыд вӧлӧма.

Но, шляпа тыри сэсся. Прӧщайтчисны, и муні гортӧ Майдан Попович.

Поп да попаддя видзӧдӧны: зонмӧ, локтӧ ӧд.

— Эй, матушка, проклятӧйыд бара ӧд локтӧ!

Деньга гым сетіс джоджӧ: «Тайӧ, батюшко, вотныд!»

Гозъя мӧвпалӧны, кытчӧ кутам тайӧ пинымӧс воштыны. Эм ӧти мельнича. Луннас кӧзяиныс изӧ, войын — чӧртъяс. Сэтчӧ ковмас мӧдӧдны изны. Лун-мӧд гуляйтіс Майдан Попович. Сэк кості сю дасьтісны дзонь вӧвтыр, дзонь додь. Вой улӧ лӧсьӧдісны. Коркӧ воис Майдан Попович.

— Аттӧ дивӧ, Майдан Попович, пызьным ӧд быри, лоӧ ветлыны талун, асывводз кежлӧ колӧ.

Пинысӧ, буракӧ, колӧ вины кыдзикӧ, мый эськӧ поплӧн пызь абу да.

Вӧлӧ сӧвтісны. Муні. Воис. Мельник буретш томналӧ мельничасӧ:

— Ӧні ӧд абу менам ӧчередь, аски иза.

— Вайлы меным томантӧ, ӧтнам иза.

— Но, изан кӧ эськӧ на да, виасны ӧд.

— Мед! — шуӧ Майдан Попович.

Пырис. Сюсӧ кисьталіс куимнан изкиас. Ставыс тӧри. Пырис да гатшӧн водіс, газет лыддьӧ. Коркӧ кутіс чӧрт локны. Весиг ваыс мельничаті визувтӧ. «Оз жӧ тай лӧж висьтавны», — мӧвпыштіс Майдан Попович.

— О, кодкӧ воӧма да миян ӧчередьын изӧ, час жӧ виа!

— Аттӧ, чӧртпи, мый тэ ас туша-рожа вылад видзӧдан, тэ кыд да бус, а ме свинеч прут, ӧтпырысьӧн и вины. Вай медводз картіӧн ворсам. Кодным колям, сылысь и юр босьтны.

Ворсісны. Чӧртпи коли. Пырысь-пыр чӧртпи юрсӧ ӧшӧдіс. Мӧдыд черӧн керыштіс, и уси юр.

Тӧкӧтьӧ нӧрӧвитіс, локтӧ дедыс, шуӧ:

— Пиӧс виис, чуть мельничатӧ эз путкыльт. Вай мекӧд ворсам.

Ӧти вой ворсісны, да Майдан Попович кольны кутіс, дзикӧдз кольны кутіс:

— Аттӧ, чӧрт, тэ ӧд нинӧм он тӧд? Тӧдан, ме думайта: сулалысь пу али пӧрӧм колодаыс унаджык?

Лыддисны зэв ыджыд тшӧтіӧн. Уль пуыс уна лои, пӧрӧмаыс этшаджык.

Мӧд вой ворсісны, бара коли Майдан Попович.

— Ловъя морт али кулӧм мортыс унаджык? — юалӧ Майдан Попович.

Лыддьысигкостіыс вой шӧр лои, и уси чӧрт. Майдан Попович пызь кураліс. Югді. Мельник воис, йиркӧдчӧ. «Абу ӧд жӧ нин сійӧ ловъя», — думайтчӧ. Майдан Попович восьтіс:

— Но, менам гӧтов, мельник ёрт!

Мельник сетіс куимсё рублей деньга: ӧні лун и вой позьӧ изны. Прӧщайтчисны. Гортӧ воис. Поп гозъяӧс бара шогӧдіс. Весьтӧн-джынйӧн пасьта чер дзонь лун кеслісны да зудъялісны. Гулянкаысь воас да чорыда унмовсяс, да кералам пӧ, нылӧ, юрсӧ. Пи воис гуляйтӧмысь. Горничаӧ вольсалӧма мамыслӧн зэв бура. Майдан Попович тайӧс казяліс. Тӧкӧтьӧ водліс — унмыд оз лок. Накӧвальня пыртіс да крӧвать вылад пуктіс, шебраліс. Ачыс пач коластӧ пырис да ныргорӧн кутіс шкоргыны.

— Бура нин узьӧ, — поп шуӧ.

Ӧдзӧс зэв ньӧжйӧ восьтіс, чер киын. Керыштіс да зилькмуні черыд, чер дорыс ставнас уси. Попыд и петіс зэв ӧдйӧ бӧр. А Майдан Попович сералӧ: «Век на кыдзикӧ ола!»

Накӧвальнятӧ бӧр петкӧдіс, ачыс водіс, шебрасис. Асывводзӧ-бурӧ воисны. Мамыс юалӧ:

— Майдан Попович, кутшӧма узин?

— Матушка, сьыліам быттьӧ пытш курччис, колӧ пыркӧдны вольпасьтӧ.

Сэсся гуляйтны бара петіс. Поп гозъя сёрнитӧны: «Ӧні ог нин вермӧ вины, тайӧ миянсьыным юръяс нуас нин!»

Коркӧ Майдан Попович воис, шуӧ:

— Аттӧ дивӧ, асланыд пи, да менӧ ӧтилаӧ-мӧдлаӧ ыстанныд, юрӧс кераланныд. Мый ме тані ола — муна, да некор сэсся ог и волы, олӧ асьныд ен могысьӧн!

Сэсся прӧсти ни благӧслӧви эз шу, петіс и муні. Муніс, гашкӧ, тӧлысь. Зэв ыджыд ю бокӧ воис, верст кык пасьта. Морт пукалӧ, кок бан вылас дзонь гӧра качайтӧ.

— Бог помотш! Мый керан? Кыдзи тэнӧ шуӧны?

— Горыня, менам тайӧ и уджыс, таысь и нянь сёя.

— А ён жӧ тэ, старик!

— Чӧв, бур морт, ми нӧ кутшӧм ёнъяс, вот нималӧ Майдан Попович.

— Сійӧ ӧд ме и эм.

— А он-ӧ менӧ ёрт вылӧ босьт?

— Босьта. Сӧмын меысь водзӧ эн пет!

Кыкӧн мӧдісны. Кытчӧ Майдан Попович, сэтчӧ и Горыня тувччалӧ. Воис сэтшӧм жӧ морт, комын вося дуб шатлӧдлӧ, быттьӧ пышӧс моз вӧдитӧ.

— Бог помотш, Дубыня! Ён жӧ нин тэ.

— Кутшӧм ме ён, вот эм Майдан Попович, вот сійӧ ён.

— Майдан Поповичыд ме и эм.

— Менӧ он-ӧ тшӧтш босьт?

— Толькӧ меысь водзӧ эн пет.

— Ог пет, ог!

Мунісны, куимӧн. Воис ю. Некыті вуджны. А ю дорас морт куйлӧ, ускыс ю вомӧныс. Чериыс мый катӧ, ускас крукасьӧ да вомас веськалӧ, сійӧн и питайтчӧ. Ус кузяыс вуджалӧны юсӧ, пос туйӧ.

Тшӧтш ёрт вылӧ босьтісны Усниксӧ. Воис зэв ыджыд керка. Пырисны — некод абу. Сёйны нинӧм абу. Конюшня кодь шы, да сэтчӧ петісны, сэні уна ӧш. Начкисны нёль ӧшкӧс. Ӧш тушаяссӧ пуктісны пуны. Майдан Попович, Усыня да Дубыня песла мунісны. Горыня пусьыны коли.

Видзӧдӧ: морт локтӧ. Ӧти чуньӧн кыскӧ сё кызь додь турун. Кытчӧ воштысян, воас да виас.

— Аттӧ беда, — мортыд шуӧ, — кодкӧ локтӧма да ӧшъясӧс начкӧма, ме тайӧ кыдзи турун кыскала ӧшъяслы сё верст сайысь-а.

Пырис керкаас. Горыняӧс босьтіс да нӧшаліс, нӧшаліс, нӧшаліс дай чужйис лабич улӧ. Ачыс став яйсӧ сёйис, эз и тырмы. И бара муні. Горыня сы ни садь коли куйлыны.

Коркӧ Майдан Поповичьяс локтісны. Горыня бауӧн петіс, восьтіс ӧдзӧс.

— Мый нӧ лои? — юалӧны сылысь.

— Трубаӧс тай водзджык сиптӧма да кольмӧдіс.

— Пӧртйыд тай нӧ куш!

— Ог и помнит нинӧм.

Но ладнӧ. Ӧшъясӧс бара начкисны. Мунісны песла. Пусьыны колисны Дубыняӧс. Видзӧдӧ: морт локтӧ. Ӧти чуньӧн кыскӧ сё кызь додь турун. Кытчӧ воштысян, виас ӧд.

— Аттӧ беда, — мортыд шуӧ, — кодкӧ бара на локтӧма да ӧшъясӧс начкӧма, ме тайӧ кыдзи турун ӧшъясӧлы кыскала-а.

Пырис керкаас, Дубыняӧс босьтіс да нӧшаліс, нӧшаліс, нӧшаліс дай чужйис лабич улӧ. Ачыс став яйсӧ сёйис и бара муні. Дубыня сы ни садь коли куйлыны.

Коркӧ Майдан Поповичьяс локтісны. Дубыня бауӧн кыссис ӧдзӧс дорӧ, восьтіс.

— Мый нӧ лои? — юалӧны.

— А водзджык тай сиптыссьӧма трубаӧ, да кольмыссьӧма.

— Пӧртйыд тай нӧ куш!

Бара ӧшъясӧс начкисны. Усыняӧс колисны пусьыны, асьныс мунісны песла. Видзӧдӧ: ӧнтайся мортыд бара локтӧ, турун кыскӧ. Кытчӧ воштысян.

— Аттӧ беда, бара на ӧд кодкӧ локтӧма да ӧшъясӧс начкалӧма.

Пырис керкаас, Усыняӧс вируляйӧдз нӧшаліс, нӧшаліс, нӧшаліс и чужйис лабич улӧ. Ачыс бара став яйсӧ сёйис и муні. Усыня сы ни садь коли куйлыны.

Майдан Поповичьяс локтісны. Усыня куйлӧ.

— Мый нӧ лои?

— А кольмыссьӧма тай.

— Пӧртйыд тай нӧ куш!

Бара ӧшъясӧс начкисны. Ӧні ачыс Майдан Попович кольччис. А ӧнія куимӧн мунӧны да сералӧны: бура пӧ и кольмӧдас талун Майдан Поповичтӧ.

Майдан Попович пусис. И бара локтӧ мортыд, Балаберда нимыс.

— Но, зонмӧ, — Балаберда шуӧ, — став ӧшкӧс ӧд начкис, оз мун ни нинӧм. Ӧні пыра да асьсӧ ловъявывсяньыс сёя!

Пырис.

— А тэ, проклятӧй! — шуӧ Майдан Попович.

Босьтіс Балабердаӧс, песіс завертка моз, пыркӧдіс корӧсь моз, кӧтшас пельӧсӧ чужйис.

— Вот тай коді кольмӧдысьыс.

Коркӧ воисны ставыс. Сёрнитӧны: «Ӧні тайӧ садьтӧм!» Локтісны — Майдан Попович пусьӧма и быдсӧн. Шуӧ:

— Вот ӧд ті кутшӧмӧсь, он и висьталӧ.

— Ачыд эн тшӧкты водзӧ петны да кытчӧ петан.

Сёйисны.

— Видзӧдлӧ, мый ме кери тіянлысь кольмӧдчысьтӧ. Со лабич улӧ чужйӧма.

Видзӧдлісны — абу, сӧмын розь кольӧма пельӧсас. Майдан Попович вӧтӧдны пондіс. Ӧш куястӧ ставсӧ чинталісны, кӧртавлісны, муӧ кутісны лэдзны гезсӧ сувтса. Кыксё ӧш ку вӧлі, ӧдва и тырмис.

Воис муӧдзыс. Сэні та дорысь весиг югыдджык. Быдсяма яблӧгъяс быдмӧны. Некод абу. Кок туйяс лыа вылын тӧдчӧны. Заводитіс вӧтӧдны. Вӧтӧдчис, вӧтӧдчис — воис вӧр керка. Пырис — сэні зэв мича ныв пукалӧ. Здоровайтчис.

— Лок, лок, Майдан Попович, некод нин татчӧ оз волы.

Вӧлӧм, Балабердаыс сарлысь нывсӧ пышйӧдлӧма: менӧ пӧ сизим арӧсаӧн пышйӧдліс да дас вит во нин олам куим чой, янасын олам, коластыс — сё верст.

— А важӧн-ӧ таті муніс Балабердаыс?

— Неважӧн.

Кутіс вӧтчыны. Мӧд чой дінас бара эз су. Коймӧд чойыд дінын суис. Ныв дінын пукалӧ.

— Ак тэ, Балаберда проклятӧй, суи тай жӧ. Ӧні тэныд и смерть!

Виис сійӧс, бензинӧн киськаліс тушасӧ и сотіс, а пӧимсӧ тӧлӧдіс, ӧні на кӧнкӧ лэбалӧны пӧим чиръясыс. Всё. Юр мыніс.

Босьтіс нывъясӧс сьӧрсьыс, куимнан нывсӧ, и мунісны розь весьтӧ. Нывъяс выліті кутчысисны, ачыс медулыс помас. Звӧнок сетіс. Заводитісны найӧс лэптыны. Лэптісны дзонь сутки. Нывъястӧ лэптісны, а Майдан Поповичлысь кӧвсӧ керыштісны, и сійӧ бергалігтыр бӧр уси. Чуть юрыс эз пот.

Мый кута керны? Кыдзи сэсся каян? Бӧрддзыліс и быдӧн. Вот пӧ мый вӧчисны мекӧд. Море бокті ветлӧдлӧ, синваыс шорӧн киссьӧ. Вот пӧ, лоӧ пропадитны.

Видзӧдӧ: бадь дорын кӧръяс сёйсьӧны, быттьӧ бордаӧсь. Матыстчисны, да толькӧ кодзлалӧны, куим кӧр. Кӧза ыдждаӧсь. Ӧтиӧс на пиысь и кватитіс Майдан Попович.

— Ой, Майдан Попович, — горӧдіс кӧрыд, — эн ви менӧ, коль олӧмӧс.

— Вай менӧ кыпӧд тайӧ розьӧдыс.

— Куимысь лолыштны он удит, пыр и ката.

Майдан Попович пуксис вылысас, кватитчис на-а, воис нин. А сэні вылысас куимӧн, Горыня, Дубыня да Усыня тышкасьӧны: ӧти нылыд вывті мича, быдӧнлы сійӧ колӧ. Майдан Попович локтіс и шуис:

— Эк, кутшӧм ті делӧ керинныд?!

Горыня, Дубыня да Усыня быдсӧн изйӧ пӧрисны. Майдан Попович босьтіс меддзоля нывсӧ, и мунісны батьыс дорӧ, Белӧй сар дорӧ. А Белӧй сарсӧ вӧлӧм Балабердаыс вилӧма. Майдан Попович Белӧй сарствоӧ овмӧдчис и кутіс сарствуйтны.