КОМИ КЫВЙӦ ВУДЖӦМ

Сӧветъяслӧн обласьтса ІІІ-ӧд съезд бӧрын облисполком ёна уджаліс учрежденньӧясӧ коми кыв пыртӧм кузя: котыртліс комиӧн гижны да лыддьысьны велӧдан курсъяс, лӧсьӧдіс комиӧн велӧдан инструкция, зілис учрежденньӧясӧ индавны коми кыв тӧдысь йӧзӧс.

Сӧветъяслӧн ІV-ӧд обласьтса съезд тшӧктіс чорзьӧдны тайӧ уджсӧ да шуис: ӧні пӧ позьӧ Коми обласьтын государственнӧй кывъясӧн лыддьыны коми да роч кывъяс. Тайӧ лоӧ со мый: ӧнісянь Коми обласьтын быдлаын позьӧ сёрнитны да гижны комиӧн кӧть рочӧн. Водзӧ исполком зільӧ, мед сэтшӧм вӧлӧсьтъясын, кӧні олӧны сӧмын комияс, став уджсӧ нуӧдны дзик комиӧн.

Тайӧс лоӧ вӧчӧма сы могысь, мед роч кыв тӧдтӧм коми уджалысьясӧс сибӧдны, матыстны Сӧвет удж бердӧ, мед ставыс налы вӧлі гӧгӧрвоана.

Кыдзи та вылӧ видзӧдӧны коми уджалысьяс? Крестьяналӧн тшӧктӧм серти уездъясса съездъяс вылын сёрниыс муніс комиӧн, весиг унджык докладъяссӧ вӧчисны комиӧн.

Прошенньӧяс, жалӧбаяс крестьяна кутісны гижны комиӧн жӧ. Войдӧр налы лоӧ вӧлі корсьны роч кыв тӧдысь гижысьӧс.

Коми сиктъяссянь гижӧны, коми газеттӧ пӧ весиг нывбабаяс ёна лыддьӧны, ставсӧ пӧ гӧгӧрвоӧны да. Коми газет отсӧгӧн йӧзыс тӧдмасьӧны став му пасьтаын олӧмӧн, Сӧвет власьт уджӧн, велӧдчӧны ассьыныс овмӧс кыпӧдны, видз-му выль ног уджавны.

Быд сиктсянь весиг омӧлика гижны кужысьяс заводитісны ыставны газетӧ гижӧдъяс асланыс вӧлӧсьтын олӧм йылысь. Сэтшӧм гижӧдъяссӧ газет редакция лӧсьӧдалӧ да печатайтӧ. Комиӧн нуӧдан удж пондіс ёнджыка босьтчыны коми йӧз пӧвстын, тшӧтш и нывбабаяс пӧвстын.