УДЖ НУӦДАНІНЪЯСӦС КОМИӦ ПӦРТӦМ

Мый шуӧны крестьяна

Коми йӧз быдлаын ошкӧны коми кывлы туй восьтӧм, со мый шуӧны коми крестьяна.

«Кӧрткерӧсса крестьяналӧн ӧтчукӧртчылӧм кывзіс висьталӧм Обласьтувса удж нуӧданінъясӧс комиӧ пӧртӧм йылысь и шуис: удж нуӧданінъяссӧ колӧ сибӧдны коми крестьяна дінӧ, сійӧн колӧ найӧс комиӧ пӧртны, ёнджыка колӧ паськӧдны коми кывсӧ, мед ставыс вӧлі гӧгӧрвоана коми йӧзлы».

Маджаса тадзи жӧ шуисны.

Пезмӧгса: «Ӧтулысь шуим сюйны учрежденньӧясӧ коми кыв».

Позтыса: «Ми, Позтыса крестьяна, кывзім Обласьтувса удж нуӧдӧм йылысь коми кыв вылын, шуам: коми кыв колӧ ёнджыка паськӧдны став Обласьт кузя, нуӧдны став гижӧм удж удж нуӧданінъясын комиӧн, мед лоӧ ставыс гӧгӧрвоана коми йӧзлы».

Сідз жӧ шуисны мордінса.

Коншаса шуисны: «Коншаса крестьяналӧн чукӧртчылӧм кывзіс тов. Шаховлысь Обласьтувса Сӧветъяс ӧтчукӧртчылӧм йылысь и кывзӧм мысти шуис: Обласьтувса Сӧветъяс чукӧртчылӧмлысь вӧчӧмъяссӧ ошкыны и мед эськӧ миян вокъяс пермякъяс ӧдйӧджык ӧтлаасисны миянкӧд и мед став учрежденньӧясын Коми Обласьтын сёрнитісны и гижисны комиӧн».

Тадзи шуӧны крестьяна. Мый нӧ шуӧны мукӧд?

Ленинградса велӧдчысьяс январ 5-ӧд лунӧ со мый шуисны:

«Ӧні мунӧ Сыктывдінкарын дай став Коми обласьтын „комиӧдчан“ удж. Гашкӧ, сэні сійӧ удж вылас оз тырмыны уджалысьясыс? Сы понда, мыйӧн вермам, колӧ вынсьыным отсавны налы. Колӧ гижӧдчыны сэтчӧс уджалысь чукӧркӧд (комиссиякӧд), юавны, мыйясджык ӧні налы колӧ, мый вермасны миянлы татчӧ позян удж сетны. Верманторъяссӧ, кужан уджъяссӧ босьтны татчӧ, миян пытшкӧ уджавны. Юралысь Ёль, гижысь И. Худяев».

Кутшӧма видзӧдӧны Мӧскуаса велӧдчысьяс — вӧлі нин газетын гижӧд ассяньныс.

Комиссияын уджалысьяс январын разӧдчывлісны сиктъясӧ, ӧні бӧр локталӧны. Удж бара босьтчас. Январын Сыктывдінкарын вӧліны комиӧн лыддьысьны-гижны велӧдчан курсъяс. Водзӧ вылӧ сэтшӧм курсъяссӧ лоӧ ёнджыка паськӧдавны.