КОМИ ДЕРЕВНЯЫН ГАЗЕТ-НИГА РАЗӦДӦМ

Сӧвет Республикаяс Союз пасьта ӧні петӧ 579 газет, 6.956.000 экземпляр (тираж). Став йӧзыс Союзас 140 миллион гӧгӧр. Сідзкӧ быд 20 морт вылӧ воӧ ӧти газет.

Коми обласьтын олысьыс 210.000 гӧгӧр. Петӧ 2 газет, 3050 экземпляр. Ӧти газет воӧ быд 70 морт вылӧ. Суӧдны кӧ мукӧд обласьтъясӧс, губерняясӧс, миян газетъяслӧн тиражыс колӧ лоны 10500 экземпляр.

Сымда газет судзӧдысь миянын, дерт, ӧні оз вермы лоны: пӧшти став олысьыс крестьяна да, унджыкыс лыддьысьны кужтӧм йӧз.

Бур эськӧ нин лои, вермим кӧ быд дас керка вылӧ ӧти газет судзӧдӧмӧ воӧдчыны. Миян обласьтын 40.000 гӧгӧр керка лыд. Колӧ кыпӧдны тираж 5000-ӧдз этша вылӧ (4000 — крестьяналы да служащӧйлы, 1000 — учрежденньӧяслы).

Нига разӧдӧм сыысь на омӧля мунӧ. Во гӧгӧр чӧжӧн деревняӧ вузалӧма коми нигаяс сӧмын 425 шайт дон гӧгӧр.

Дерт, газетъяс-нигаяс ёнджыка разаласны, бура, гӧгӧрвоана кӧ найӧс гижӧма, мичаджыка печатайтӧма да донтӧгджык вузассьӧ. Сійӧ боксӧ коми нига лэдзанін лӧсьӧдӧ, мый вермӧ.

Колӧ мӧд бок уджас тшӧтш чорыдджыка кутчысьны: колӧ велӧдны крестьянаӧс газет-нигасӧ лыддьыны, босьтчӧдны газет судзӧдны, нига ньӧбны.

Тайӧ уджсӧ колӧ вӧчны общественнӧй лавкаяслы, пошта-телеграф отделенньӧяслы, селькоръяслы, велӧдысьяслы, деревняын став сикас уджалысьлы.

Ми газетын пондам гижны, кутшӧм вӧлӧсьтын медъёна босьтчасны тайӧ уджас, кутшӧм вӧлӧсьтувса пондасны медуна газет судзӧдны, медуна нига вузавны.

Кутшӧм вӧлӧсьтувса медъёна кӧсйӧны восьса синмӧн овны?