АНТАНТАЛЫСЬ УДЖЙӦЗ ПЕРЪЯМ

Англия, Франция, Америка да мукӧд государствояс миянлысь корӧны важ уджйӧз, сэсся тшӧктӧны пабрик-заводъясысь, кодъясӧс вӧчлӧмаӧсь Россияӧ заграничаса капиталистъяс да Сӧвет власьт мырддис, вештысьны.

Миянлысь кӧ уджйӧз найӧ корӧны, ми ассьыныс корамӧй жӧ. Найӧ асьныс миянлы зэв жӧ уджаӧсь: найӧ нёль во чӧж войнаӧн мырсисны рабочӧй-крестьяналысь власьт бырӧдны, нёль во чӧж уджалысьясӧс виалісны, миянлысь эмбурнымӧс жуглісны-бырӧдісны. Чорыда инмӧдчылісны и миян Коми обласьтӧ.

Арталам кӧ уронсӧ, мыйта вӧчисны Коми обласьтлы заграничаса буржуйяслӧн медалӧм еджыдъяс, и сійӧ вель вылӧ каяс. Кымын мортӧс найӧ виисны (лыйлісны, юкмӧсӧ сюялісны), кымын семья вердысьтӧг колисны, мыйта вӧв уськӧдісны, мыйта грабитісны, мынтысьтӧг уджӧдісны (колльӧдісны войсканысӧ, грузнысӧ новлӧдлігӧн, мукӧдлаын гуляйтнысӧ ветлӧдлігӧн), кымынӧс тюрмаясӧд кыскалісны, Печӧра-Изьва кузя кынталісны?!..

Ставсӧ колӧ миян артавны да сійӧ уджйӧзсӧ ассьыныс корны. Мукӧд губерняясын артавнысӧ босьтчӧмась нин, нарошнӧ сы вылӧ лӧсьӧдалӧмаӧсь обществояс. Колӧ и миян босьтчыны.