ВЫЛЬ КОКНЬӦД

Неважӧн петіс вӧр йылысь выль закон (Лесной кодекс). Сійӧ закон серти крестьяналы сетсьӧ вӧр кык десятинаӧн быд морт вылӧ (лунвылын ӧтик десятинаӧн).

Тані войдӧр крестьяналӧн вӧр эз вӧв, став вӧрыс казналӧн вӧлі. Стрӧитчигӧн крестьяналы лоӧ вӧлі вӧрсӧ ньӧбны казналысь — босьтны кер билет. Билетсӧ ньӧбны гӧльджык крестьяна оз вӧлі вермыны: нажӧтка эз вӧв да. Сійӧн уналы лоӧ вӧлі гусясьны, билеттӧг керсӧ лэдзны — стрӧитчыны. Тӧдӧмысь, леснӧй стража, казялас кӧ, протоколитӧ да судӧ сетӧ. Вель уна гӧль крестьяналы лолі билеттӧг кер лэдзӧмысь пукавны да штрап мынтыны.

Сӧвет власьт пыр мырсис уджалысьяслысь олӧм кокньӧдны, да быдтор лӧсьӧдны другӧн он вермы: нёль во чӧж лои чорыда воюйтны, еджыдъясӧс коллявны. Война помасьӧм бӧрын вӧлисти позис бурджыка видзӧдлыны олӧм лӧсьӧдӧм вылӧ. Кутчысис Сӧвет власьт и вӧр бердӧ: лэдзис вӧр йылысь закон, шуис сетны крестьяналы вӧр.

Ӧні эмӧсь вель уна билеттӧг кер лэдзӧмысь судӧ сюрӧм гӧль крестьяна. Мукӧдсӧ судитӧма нин да тюрмаын пукӧдӧны. Сэтшӧм гӧль крестьянасӧ мездӧм понда Обсуд бердӧ лӧсьӧдісны Комиссия. Сійӧ Комиссияыс чукӧртчыліс апрель 1-й лунӧ, видлаліс ВЦИК-лысь декрет да шуис: гӧль крестьянаӧс, кодъяслӧн 5 сёйысь вылӧ эм сӧмын 1 вӧв да 2 мӧс, да красноармейскӧй семьяясӧс билеттӧг кер лэдзӧмысь судитӧмысь мездыны, мыжсӧ кӧ вӧчӧма выль закон лэдзтӧдз (колян вося августӧдз) да кольӧм куим воясас абу кӧ сыысь жӧ мӧдысь сюрлӧма. Удитӧмаӧсь кӧ нин судитны — наказанньӧсьыс мездысьӧны (пукӧдӧмысь, штрапысь). Секвестируйтӧм вӧр гусялӧмысь оз мездысьны. Мыжалӧмысь мездӧны Народнӧй Судъяс (налы Обсудсянь ыстӧма нин гижӧдъяс).