МЫЙ ШУӦНЫ КОМИ ЙӦЗ

ЛЕНИН КУЛӦМ БӦРЫН

Ленин кулӧм йылысь юӧр шызьӧдіс коми йӧзӧс. Быдлаын ёна казьтывлӧны сійӧс шогсигтырйи. Со мый шуисны январ 22‐ӧд лунӧ Кӧрткерӧсса:

«КӦРТКЕРӦССА ячейка РКП, РКСМ, Профсоюз, Волсӧвет, делегатъяс, допризывникъяс и крестьяна чукӧртчылӧм вылын кывзім миян велӧдысь Ленин кулӧм йылысь висьталӧм, шуам: ыджыд шог воис ставмувывса уджалысь йӧзлы. Сійӧ шог кузя ми чорыдджыка босьтчам уджавны, пондам ӧтувтчӧмӧн мунны водзӧ Ленин индӧм туйӧд. Векыс олас миян сьӧлӧмын, вежӧрын сылӧн велӧдӧмыс, нимыс!»

Мӧд лунас чукӧртчылісны став крестьяна, шуисны:

«Кӧрткерӧсса крестьяна чукӧртчылӧм кывзіс висьталӧм ставмувывса уджалысь йӧзӧс велӧдысь Ленин кулӧм йылысь, шуис: ми шогсям революция нуӧдысь бырӧм понда, кӧсйысям сылысь босьтчӧдӧм удж водзӧ нуӧдны. Некор оз быр Ленин миян сьӧлӧмысь!»

ПОЗТЫКЕРӦССА крестьяна январ 25-ӧд лунӧ шуисны: огӧ пӧ кежӧ Ленин индӧм туй вылысь, огӧ вунӧдӧ некор Ленинлысь уджсӧ.

МОРДІНСА крестьяна Ленинӧс гуалан лунӧ, январ 27-ӧд лунӧ, чукӧртчывлісны 150 морт, казьтывлісны сійӧс, шуисны:

«Ми, Мордінса граждана, кывзім висьталӧм миянӧс велӧдысь, мездысь, выль олӧмӧ нуӧдысь Ленин кулӧм йылысь, кӧсйысям некор не вунӧдны сылысь бур вӧчӧмсӧ. Ленин ёрт, тэ кувсин, но тэнад уджыд эз кув. Тэнад индӧм туйӧдыд пондам мунны водзӧ, кытчӧдз оз сетчы миянлы ставмувывса буржуйыс!

Бурсиам тэнад туйӧд нырнуӧдысьяслы!»

Ичӧтик сиктса КОНШАСА крестьяна шуӧны:

«Коншаса крестьяна ёна жалитӧны тӧв. Ленинлысь кулӧмсӧ и надейтчӧны, мый сылӧн преемникъясыс сідзжӧ кутасны нуӧдны Ленинлысь заводитӧм уджсӧ, гӧль йӧзӧс озыръяс кипод улысь мездӧмсӧ и гӧль йӧзлысь олӧм кокньӧдӧмсӧ, и надейтчӧны, мый и мукӧд государствоса уджалысьяс миян моз жӧ мездысясны озыръяс кипод улысь, ӧтувтчасны миянкӧд и ӧтувйӧн кутасны лӧсьӧдны уджалысьяслысь бур олӧмсӧ».

(Тайӧ резолюцияяссӧ печатайтӧма дзик сиктса лӧсьӧдӧм ногыс.)