МЕЛЬНИК НЫВ
Важӧн олісны-вылісны гозъя. Налӧн вӧлі ӧти ныв. Налӧн мамныс кулі, ныв коли. Айыс сылӧн выльысь гӧтрасис. Ӧтчыд айыс да ичиньыс петісны гӧститны, а нылыслы сетісны пызь, айыс мельникӧн вӧлі да, пызь сетісны няньшом кӧтны. И нывлӧн и пызьыс киськассис ёна. Воисны гӧститанінысь, и ичиньыс ёна кутіс видчыны. Видіс, видіс, сэсся сойсӧ керыштіс и вӧтліс нывсӧ керкаысь. Кытчӧ сэсся воштысьны? Кытчӧ мунны? Муніс да, муніс да, муніс да, куим туйвежӧ воис. Оз тӧд, кытчӧ пырны. Сэсся шӧр туйӧдыс муніс да, муніс да, муніс да, воис кутшӧмкӧ сад. Сэні ӧшалӧ толькӧ яблӧгыс. Кынӧмыс эськӧ и сюмалӧ, а сойтӧг да уна-ӧ босьтан. Пырис сэтчӧ садъяс да кутіс вомнас курччавны. А сійӧ яблония садйыс вӧлі сарлӧн. Сарыс ӧтчыд ыстыліс стӧрӧжӧс, менсьым пӧ яблӧгъясӧс кодкӧ курччалӧ, ставыс пӧ джынъя. Некодӧс эз аддзы стӧрӧжыс. Сэсся мӧд караул ыстыліс. Яблӧг курччалӧма, а некодӧс бара эз аддзыны. Сэсся ассьыс писӧ ыстіс:
— Нолы ветлы, кодкӧ яблӧгъяснымӧс ставсӧ сёйӧма, а некодӧс оз аддзыны, ветлы да он-ӧ тэ кодӧскӧ аддзы.
Пиыс сэсся и аддзис сой пӧла нывтӧ. Аддзис да гортас нуӧдіс. А нылыс вӧлі сійӧ красавича да мам-айыслы и шуис:
— Ме, мамӧ да айӧ, кӧть меным мый шуӧ, а ме сійӧ босьта гӧтыр вылӧ!
— Босьтан кӧ и босьт, — ай-мам прӧтив эз мунны.
Сэсся и босьтіс сійӧ, ӧтлаасисны найӧ. А сар пиыс том на вӧлі, да сійӧс и армияӧ босьтісны, армияӧ нуисны питӧ. Сэсся гӧтырыд коркӧ служба кості и вайис кага. Кага вайис, да сар гозъя салдатӧс ыстісны пиыс дорӧ: кутшӧм пӧ ним сетны кагалы.
Салдат муніс, муніс, муніс да рытӧ-бурӧ воис и пырис ӧти керкаӧ, узьмӧдчис. А самӧй ичиньыс дорӧ слӧймӧма. Сэсся сійӧ сэні узис, а узигкостіыс ичиньыс письмӧсӧ зепсьыс кыскыліс да сэтчӧ гижис: «Тэнад чужӧма понпи. Мый сылы нимсӧ пуктыны?» Вежис письмӧсӧ. Сэсся асылӧ-бурӧ воис, салдат чеччис и муніс водзӧ. Муніс, муніс, муніс (мен висьтавны регыд, а сылы и дыр муннысӧ), кузя муніс. Сэсся и воис коркӧ армеечыд дорӧ. Воис да сылы сетіс письмӧтӧ. Письмӧтӧ лыддис да гижис: «Пон кӧть морт, а мед ним пуктасны!»
Сэсся армееч сюйис письмӧсӧ салдатлы зептас, и бара муні салдат. Гортлань локны кутіс. Муніс да, муніс да, муніс да бара сійӧ ичиньыд дорӧ воис. Ичиньыд ордӧ бара узьмӧдчис. Ичинь сылысь бара зепсьыс кыскис письмӧ войнас. Сэсся и гижис ичиньыд: «Менам вотӧдз мед дукыс эз вӧв, мед убирайтчас!» Письмӧ бӧр зептас сюйис, салдатлы зептас сюйис. Сэсся муніс да, муніс да, муніс да, коркӧ сар дорӧ воис. Сар гозъялы сетіс письмӧсӧ. Сар гозъя лыддисны и кага сетісны сылы и вӧтлісны сійӧс гортсьыд. Сэсся найӧ мунісны да, мунісны да, мунісны да, коркӧ и ва дорӧ локтісны, море дорӧ, море воис мама-пиалы. Сэсся море дорӧ найӧ водісны войсӧ узьны. Сэсся тай мореыдлӧн валйыс кыдзи вачкис — асывводзнас чеччис, а кыкнан киыс сылӧн, кык киа лоӧма. Сэсся кагатӧ босьтіс да мама-пиа бара мӧдісны. Мунісны да, мунісны да, мунісны да, сэсся дзоля керкаӧ найӧ воисны. Дзоля керкаас сэні найӧ водісны да и унмовсисны.
А сэсся коркӧ сарыдлӧн пиыс армияысь локтіс, гортас воис. Мамъясыскӧд висьтасис и мӧдӧдчис корсьны гӧтырсӧ. Сэсся сійӧ муніс, муніс, муніс и дзоля керкаӧ слӧймис. Сійӧ, дерт, сар пиыд салдаткӧд жӧ муніс, эз ӧтнас, салдаткӧд мунісны кыкӧн. Сэсся дзоля керкаыс ликмис да сар пиыд и шуис салдатлы:
— Тэ олышт тані, а ме узьышта.
Сар пиыд водіс да унмовсис. А войнас мама-пиаыд локтісны да быттьӧ гӧтырыс кодь, но киа-кока, да эз и признайт салдат. Сэсся асылӧ-бурӧ воисны, да мама-пиаыд нин мунӧмаӧсь. Сар пиыд и висьталӧ салдатлы:
— Энлы, ме талун ачым войнас караулита.
Сэсся сар пиыд ачыс кутіс караулитны да мама-пиаыд локтісны и тӧдмалісны ӧта-мӧдсӧ. Сэсся кутчысисны да окасисны. И асывводзнас чеччисны, кагасӧ босьтісны и мунісны гортаныс.
А сэтӧн сэсся пирушко да балушко вӧчисны.
