ИВАН САРОВИЧ
Оліс-выліс сар. Сылӧн вӧлі куим пи. Кык пиыслысь нимъяссӧ ог тӧд, а коймӧдсӧ шуисны Иван. Налӧн вӧлі кӧдза. Сар кутіс казявны: кӧдзӧминаныс кодкӧ няньсӧ жугӧдӧ. Кыдзи вой кольӧ, бара кодкӧ талялӧма и сёйӧма. Сар чукӧртіс пиянсӧ. Приказ сетіс: переменаӧн караулитчыны. Медводзӧн ыджыд пиыслы тшӧктіс войсӧ караулитчыны и вӧрӧс кутны.
Ыджыд пи петіс караулитчыны. Войнас пемыд лои, зэв шуштӧм. Муніс нывъяс дорӧ гажӧдчыны. Асывнас локтіс айыс дорӧ:
— Некод, батьӧ, эз волы!
Ай муніс прӧверитны: нянь бара кодкӧ вӧрзьӧдлӧма. Шӧркост пиыслы тшӧктіс петны.
Петіс пи вой колльӧдны. Пемыд и гажтӧм лои. Думайтчӧ: «Муна нывъяс дорӧ, кадсӧ колляла, мый ме эстӧні пемыдінас видзӧда».
Асыв локтіс, айыслы висьталӧ:
— Некод эз волы!
Ай бара прӧверитіс няньсӧ: вӧр бара вӧрзьӧдлӧма да ёна жугӧдӧма. Приказ сетіс Иванлы караулитчыны. Иван айыслы висьталӧ:
— Кытчӧ тэрмасьны, часлы, шойчча да, вӧлисти.
Айыс инас оз ӧшйы, мӧдысь тшӧктӧ.
— Да, — шуӧ, — водз на!
И коймӧдысь тшӧктіс айыс.
— Но ладнӧ, — шуӧ Иван, — пета, пӧра воис.
Иван петіс и му кузяыс ветлалӧ, ачыс думайтчӧ: «Тайӧ абу морт гусясьӧма, скӧт кӧ эськӧ вӧлі, кок туй эськӧ колис, лэбач, тыдалӧ, кутшӧмкӧ».
Бӧрйис, кыті медъёна жугӧдӧма, и дзебсис. Пукалӧ и виччысьӧ. Друг пемыд вой шӧрнас ылын кутіс тыдавны, быттьӧ тӧлысь мыччысис, югдіс. Бураа кутіс видзӧдны-а — югыд биӧн моз кутшӧмкӧ лэбач локтӧ. Сэсся шлывмуні и пуксис неылӧ. Сёйигтыр кутіс матыстчыны Иванлань. А сійӧ пукалӧ вӧрзьӧдчывтӧг. И воис зэв матӧ. Чеччис Иван да кватитіс. Но эз бура веськав да киас коли сӧмын ӧти гӧнтор, а пӧткаыд лэбзис. Асылӧдз сійӧс, гӧнторсӧ, киас бергӧдліс: ӧтик гӧн, а быттьӧ лампочка ӧзйӧ, войбыд сылы югыд. Сэсся носӧвикас гаровтіс и зептас сюйис. Асывнас муніс айыс дорӧ и висьталӧ:
— Тонӧ, — шуӧ, — кутшӧм вӧрыс, абу морт, а лэбач.
Айыс пырысь-пыр чукӧстіс куимнан писӧ и приказ сетіс:
— Кӧть мый сувтас, а куимнанныдлы мунны и сійӧс, лэбачсӧ, корсьны. Кӧть мед кутшӧм сарствоын, а лэбачсӧ вайны!
Куим вӧв вылӧ пуксисны куим вок и мунісны куимлаӧ. Кыкыс мунісны ог тӧд кытчӧ, а Иван Сарович муніс, и воис кыклаӧ вожалан туйӧ. Ӧтик туяс гижӧма: «Ачыд колян ловъя, вӧлыдлы — смерть!» Мӧд туй вожас гижӧма: «Коді мунлі, бӧр эз волы!» Думыштіс: «Вӧв — нажӧвитантор, муна первой туяс».
Дыр ли, недыр ли муніс, ёна мудзис. Вон ӧшӧдіс и водіс шойччыны. Неуна и шойччис, а друг шум кывны кутіс. Вонсьыс петіс, а вӧлыс вылӧ уськӧдчӧма зэв ыджыд тигр, виӧма вӧвсӧ и сёйӧ нин.
Аддзис Иван Саровичӧс и морт кылӧн висьталӧ:
— Эн печалитчы, менам челядьӧ тшыгӧсь, вӧлыдлысь коляссӧ челядьӧлы нуа, а вӧлыд пыдди ме лоа.
Вӧв тушасӧ босьтіс тигрыд и мунігас висьталӧ:
— Виччы, ӧдйӧ воа!
Некымын час мысти тигрыд бӧр воис.
— Кытчӧ путь кутан, Иван Сарович?
— Айӧ меным тшӧктіс жар-птицаӧс корсьны: уна сійӧ миянлысь нянь жугӧдіс, да ог кӧ вай сійӧс, айсянь меным бур оз ло.
Тигрыд и висьталӧ:
— Пуксьы вылысам, мунам.
Дыр ли, ӧдйӧ ли мунісны. Оз вӧлыс моз мунны, а вит пӧв ӧдйӧджык. Воисны найӧ зэв ыджыд кар дорӧ. Сэтчӧс сар зэв озыра олӧ. Карыс югыд, лун и вой биа. Тигрыд Иван Саровичӧс ыстӧ и велӧдӧ:
— Караул, — шуас, — абу, сы вӧсна мый лун и вой би ӧзйӧ, код мунӧ и локтӧ, ставыс тыдалӧ. Ылісянь на аддзан клетка, клетка пытшкын лэбачыс. Лэбачсӧ босьт, а клеткасӧ эн вӧрӧд.
Муніс Иван Сарович. Воис клетка дорӧ. Зэв мича клеткаыс, сьӧлӧм вылас воис: «А мый меным, — думыштіс, — клеткатӧгыс нуны, ме и клетканас верма нуны». Клеткаас кутчысис — кӧлӧкӧлъяс друг кутісны бовгыны. Часӧвӧйяс чеччисны. Иван Саровичӧс кутісны, сар дорӧ нуӧдісны. Висьталӧны:
— Вӧрӧс кутім!
И сар кутіс юасьны, кытысь сійӧ да кодлӧн пи. Иван Сарович и висьтасис, сэтшӧм и сэтшӧм сарлӧн пи, уна нин тайӧ лэбачыс миянлысь нянь жугӧдіс, да айӧ меным приказ сетіс, лэбачсӧ вайны, а ог кӧ пӧ вай, меным бур оз ло.
Сар и думайтчӧ: «Мортыс тай абу мыжа».
— Кӧсъян кӧ нуны гортӧ тайӧ лэбачсӧ да айыдлысь кывсӧ кывзыны, эм мӧд сарствоын зарни гриваа, зарни бӧжа вӧв, судзӧд меным сійӧс, и сэк ме тэныд сета лэбачсӧ, и сэк вӧлисти тэ айыдлысь приказсӧ вӧчан.
Некытчӧ керсьыны. Лоӧ ветлыны. Он жӧ ӧд вӧр пыдди тюрмаӧ пуксьы.
Иван Сарович прӧщайтчис и муніс тигр дорӧ.
— Да, неудачнӧ, — висьталӧ тигрыдлы.
— А мыйла нӧ эн кывзы, — вочавидзӧ тигр.— Но пуксьы, мунам. Ме сідзи и тӧді, мый тэныд сьӧлӧм вылад воас клеткаыд. И сы понда ӧні миян ыджыд путь ковмас керны, зарни гриваа, зарни бӧжа вӧв ковмас вайӧдны. Пуксьы, и мунам!
Дыр ли, ӧдйӧн ли мунісны, воисны ыджыд кар дорӧ. И бара велӧдӧ Иван Саровичӧс:
— Сарствоас пыран — вӧв сулалӧ. Вӧвсӧ босьт, а сермӧдсӧ эн вӧрӧд.
Иван Сарович муніс и аддзис: вӧв сулалӧ. А тувйын ӧшалӧ сермӧд. И сэтшӧм мича. Думайтчӧ: «Миян сарствоын татшӧм сермӧдыд и абу. Сермӧдсӧ босьта, сермӧдала, пукся и войӧда, коді менӧ вермас кутны».
Нюжӧдчис сермӧдыдла — сермӧд оз шед. А кӧлӧкӧлъяс пондісны бовгыны. Народ котӧртӧ, пищаляӧсь. Кутісны Иван Саровичӧс и нуӧдісны сар дорӧ:
— Вайӧдім вӧрӧс!
Сар юасьӧ:
— Кысь тэ, кодлӧн? Гусясян али делӧӧн ветлан?
Иван Сарович висьталӧ:
— Ме сарлӧн пи, сылӧн тшӧктӧм серти ветла.
— Но ладнӧ, — сар висьталӧ, — тэ ветлы мӧд сарствоӧ, эм кытӧнкӧ Елена Прекрасная, сійӧс кӧ меным вайӧдан, ме тэныд вӧвсӧ сета!
Вӧчны нинӧм. Ковмас ветлыны. Иван Сарович прӧщайтчис саркӧд и муніс. Воис тигрыд дорӧ бара тыртӧг. Тигрыдлы сьӧкыдкодь, сійӧ висьталӧ:
— Тӧді кӧ тайӧс, мый тэ он кывзысь, ме эськӧ эта ыджда делӧсӧ тэныд эг сет. Но нинӧм он вӧч, делӧсӧ колӧ керны помӧдз. Пуксьы да мунам, гашкӧ, вермам на айыдлысь тшӧктӧмсӧ вӧчны. Сэсся тэныд дӧверитны ог нин вермы.
Дыр ли, ӧдйӧ ли мунісны, уна найӧ мудзлісны, уна тшыгъявлісны, уна унтӧмалісны. Воисны найӧ мӧд сарствоӧ вӧскресенньӧӧ. Кӧлӧкӧлъяс вартӧны, народ гажӧдчӧ, праздничайтӧ. Иван Саровичлы и висьталӧ:
— Тэ кольччы эсійӧ пу дорас, шойччышт. Ме ачым ветла.
Муніс тигрыд, пырис сарскӧй садйӧ. Пу вуж дінӧ кодйысис, вевттьысис бура и кутіс караулитчыны. Сёйӧм-юӧм бӧрын Елена Прекрасная думыштіс петавлыны садйӧ, гуляйтыштны. Кык служанкакӧд петісны. Служанкаяс ӧтар-мӧдар боксяньыс мунӧны, киӧдыс нуӧдӧны. А тигрыд видзӧдӧ. Сэсся тигрыд сайӧ мунісны, и тигрыд бӧрсяньӧдыс чеччис, Елена Прекраснаяӧс кватитіс и нуис, а кык служанка сідз и колисны.
Иван Сарович дорӧ воис. А Елена Прекрасная садьтӧг куйлӧ, садьсӧ воштӧма. Иван Сарович кӧдзыд ваӧн мыссьӧдіс, и садьыс петіс. И рад лои, висьталӧ:
— Ме думайті звер сёяс, а вӧлӧм морт дорӧ веськалі.
А Иван Сарович и висьталӧ:
— Тэ эн прӧстӧй морт дорӧ веськалін, а воин Иван Сарович дорӧ. Пуксям и мунам! Тэ лоан меным вом ёрт.
Пуксисны и мунісны. Дыр ли, ӧдйӧ ли мунісны, локтісны сарствоӧ, зарни гриваа, зарни бӧжа вӧв дорӧ. Сувтісны кар дорӧ. Тигр и висьталӧ:
— Тэ тані шойччышт, а ми Иван Саровичкӧд ветлам кыкӧн и час мысти бӧр воам. И мунісны. Тигрыд пӧртчис Елена Прекраснаяӧ. Иван Сарович босьтіс сійӧс ни пӧлӧдыс и мунӧны орччӧн. Сар ӧшинь пырыс аддзис. Петіс налы паныд и пыртіс дворечас. Иван Сарович и висьталӧ:
— Лӧсялас кӧ, со тай вайӧді. Ме, тэрмася да, ог нин гӧстит, айӧ менӧ виччӧ.
Лӧсьӧдчисны. Елена Прекраснаяӧс сетіс, вӧвсӧ сермӧднас босьтіс и котӧртіс. А сар Елена Прекраснаякӧд пырысь-пыр жӧ кутісны мунны вичкоӧ венчайтчыны. Каретаӧ пуксисны и гӧнитісны. Вичко дорӧ вотӧдз на Елена Прекрасная додьсьыс чеччис и пӧртчис зверӧ, тигрӧ, и пышйис. Сар коли ӧтнас. Тигр локтіс Иван Сарович дорӧ. Вылысас пуксисны и мунісны водзӧ.
Дыр ли, ӧдйӧ ли мунісны, воисны сарствоӧ, кӧні вӧлі югыд лэбачыс мича клетканас. Сувтісны кар дорӧ. Вӧвсӧ да Елена Прекраснаяӧс колисны, а тигрыд да Иван Сарович карӧ пырисны. Тигр и висьталӧ:
— Ме пӧртча вӧлӧ. Вылысам пуксьы, мун сар дорӧ и сет, а лэбачсӧ босьт. И мун тэрмасьӧмӧн.
Вылысас пуксис и гӧнитіс. А сарыс ӧшиньӧдыс аддзис и паныд петіс. Сёрнитісны. Вӧвсӧ сетіс, а лэбачсӧ клетканас босьтіс и муніс. А сар нин любуйтчыны оз вермы. Пырысь-пыр жӧ медбур конюкъяслы тшӧктіс прагитчыны мича каретаӧ и котралыштны неуна выль вӧлӧн. Этша делӧ котӧртыштіс вӧв и кутіс сэсся ыръянитчыны, оз мун. Невӧлитны вӧвсӧ кутісны и воисны сэтчӧдз, мый лои вӧвсӧ швичйӧдыштны плетьӧн. Плетьӧн швичнитісны, а вӧв бергӧдчис и зверӧ пӧри, и пышйис. Каретанас и колисны. Тигрыд воис Иван дорӧ, и найӧ водзӧ мӧдісны путь кутны. Воисны найӧ вӧв сёянінас. Сувтісны. И висьталӧ тигрыд:
— Иван Сарович, служба менам эштіс, неуна шойччыштӧ и мунӧ ай-мамыд дорӧ.
Иван Сарович водіс шойччыны. А Елена Прекраснаялӧн ун оз лок. Регыд кутісны кывны вӧла шыяс, и зэв нин матын кылӧ. Елена Прекрасная кутіс чуксавны, а Иван Сарович оз садьмы, зэв чорыда узьӧ. И синмӧн тыдалан ылнаӧ локтісны кык вӧла. Воисны. Елена Прекраснаякӧд здоровайтчисны и кутісны ас костын сёрнитны. Иван Сарович дорысь янсӧдісны Елена Прекраснаяӧс, нуӧдісны бокланьӧ и кутісны шуны:
— Мунам миянкӧд!
А сійӧ оз кӧсйы. А кык вок водзӧ сёрнитӧны:
— Тэ кут Елена Прекраснаяӧс, а ме юрсӧ керышта Иван Саровичлысь.
Ыджыд вокыс кераліс юрсӧ Иван Саровичлысь, вӧв вылӧ пуксисны, лэбачсӧ да Елена Прекраснаяӧс босьтісны и мунісны.
Сійӧ жӧ луннас тигрыд кутіс вердны челядьсӧ, и тӧвру нырас вачкис: свежӧй морт вир кӧнкӧ кылӧ. Эз терпит, чеччис и муніс сэтчӧ. Воис, а Иван Сарович дорын кырнышъяс лэбалӧны. Лӧсьӧдчӧны пуксьыны да кокавны шойсӧ. Кӧин дорас водіс, нюжӧдчис, синъяссӧ кунис и куйлӧ. Кырныш пи пуксис сэтчӧ и кӧсйӧ тигрыдлысь синсӧ кокыштны. А тигрыд чеччис и кутіс кырныш питӧ. Кырнышъяс, айыс да мамыс, кутісны кевмысьны:
— Эн ви, пиным миян ӧтик, да мый нин тшӧктан, сійӧс и вӧчам тэныд!
Тигрыд и висьталӧ:
— Вай ӧдйӧ лэбовтлӧ да вайӧ живӧй да мёртвӧй ва. А он кӧ, пиныдтӧ сёя.
Горзігтырйи лэбзисны гозйӧн кырнышъяс. Зэв ӧдйӧ и вайисны: ӧтиыс живӧй ва пузырок, мӧдыс мёртвӧй ва пузырок. И сетісны. Тигр кырныш пиӧс шӧри поткӧдіс. Кырныш гозъя бӧрддзисны. Тигрыд висьталӧ:
— Ас саяныд ӧд делӧыс: живӧй да мёртвӧй ва кӧ ваинныд, пиныд ловзяс, а пӧръялінныд кӧ, пиныд оз ло. Мёртвӧй ваӧн прысьнитіс — кырныш пи воча йитчис, живӧй ваӧн прысьнитіс — кырныш пи жбыр лэбзис и айыс-мамыскӧд кутіс лэбавны. Сэки вӧлисти тигрыд ловзьӧдіс Иван Саровичӧс. Чеччис Иван Сарович и висьталӧ:
— Ок, — шуӧ, — чорыда жӧ унмовсьлӧма!
А тигрыд висьталӧ:
— Унмовськӧдлісны, — шуӧ, — тэнӧ бур вокъясыд да сэсся эськӧ эн и сувт, юрыд янасын вӧлі да! Дыр миянлы сёрнитны некор. Вай пуксьы ӧдйӧ да мунам!
Неуна и мунісны, а суӧдісны нин. Эз и видзаасьны, эз и прӧщайтчыны, а пырысь-пыр мунісны сар дорӧ, кык вок колисны туй вылӧ нажӧвитӧмторнаныс. Ас сарствоас воис Иван Сарович. Тигрыд эз и петкӧдчывлы, прӧщайтчис и муні. А Иван Сарович локтіс айыс дорӧ тыртӧм киӧн. Мунігас нуис вӧв айыслысь, а локтіс куш кинас:
— Видза олан, айӧ, нинӧм эг вай, а вӧлӧс тигр-звер сёйис!
Айыдлы, дерт, эз ло бур сьӧлӧм вылас:
— Но, виччылам нӧшта, гашкӧ, кык ыджыд вокыдъяс мыйкӧ ваясны. Кужи кӧ эськӧ тэнӧ быдтыны, да нажӧвитысь кодь кӧ тэ вӧлін, гашкӧ, мыйкӧ эськӧ нажӧвитін жӧ-а. Но, ог на накажит, виччылам вокъястӧ!
Вокъяс и локтӧны добраӧн, нажӧвитӧмаӧсь: зарни гриваа, зарни бӧжа вӧв тыдалӧ, вайӧны югыд лэбачӧс, клеткаыс быдӧн югъялӧ, и Елена Прекрасная сэні пукалӧ, кыдзи шонді.
Петісны паныд Иван Сарович айыскӧд. Айсьыс водзджык удитіс Иван Сарович, и висьталӧ:
— Видза, Елена Прекрасная, менам гӧтырӧ, видза, менам лэбачӧ, сар киысь ас кинам босьтӧмторйӧ, видза, менам зарни гриваа, зарни бӧжа вӧлӧ, сар киысь ас кинам примитӧмторйӧ, видза оланныд, кокньыда нажӧвитчысь вокъясӧ!
Ай кывзӧ, вокъяс пукалӧны пемдӧм чужӧмӧн, вомсьыныс сёрни оз артмы, нинӧм висьтавны оз вермыны: ӧтарӧ-кӧ, мыжаӧсь, мӧдарӧ-кӧ, Иван Саровичкӧд воча — налӧн вынныс оз судз, а коймӧдарӧ-кӧ, виччӧны — ыджыд наказанньӧ, гашкӧ, налы лоӧ айсяньныс. Сёрнитнысӧ заводитіс Елена Прекрасная. И висьталіс сійӧ ставсӧ батюшкоыслы, кыдзи став делӧыс вӧлі. Сар пырысь-пыр и висьталіс:
— Месянь эськӧ смертнӧй казнь кыкнанныдлы, вокныд кӧ оз прӧстит.
А Иван Сарович и висьталӧ:
— Ловъя народ, ковмасны на, медым оласны найӧ ичӧтджыкъяс туйӧ да мед менӧ кывзасны!
И вот кутісны пируйтны, вӧчисны пир на весь мир. И кутісны найӧ овны-вывны, сарствуйтны. Ӧні на олӧны. А кӧлысь вылас ме ачым вӧлі, вомам тай эз сюрлы, а ус кузя ставыс визувтіс.
