ЕМЕЛЬ

Да, важӧн старик гозъя вӧлі. Налӧн чужисны куим пи: Педӧр, Василей и Емель. Сэсся бать омӧльтчыны пондіс, висьны. И бать шуӧ пиянлы:

— Волӧй менам гу вылӧ, кула да, лун вит войнас переменаӧн куимнанныд.

— Ладнӧ, — найӧ шуӧны.

Бать кулі, и Василей да Педӧр оз кӧсйыны гу вылӧ кайлыны, полӧны. А Педӧрлы ӧчередь. Емельлы висьталӧ:

— Кай, Емель, батьыд гу вылӧ, ме медала тэнӧ, сы вылӧ гӧрд дӧрӧм вурӧда.

— А, сы вылӧ узя, кайла гу вылас, — Емель шуӧ.

Емель кайис узьны. Мургӧ-сьылӧ толькӧ бать гу вылын. Гу воссис, бать юалӧ:

— Коді нӧ? Пиӧ, тэ, Емель?

— Ме, найӧ полӧны тэнад сёйӧмысь, оз лысьтны локны.

Но ладнӧ, полӧны кӧ. Сетіс сылы, Емельыдлы, Сивко-Бурко вӧв. Ӧтар пеляс пывсис-мыссис, мӧдар пеляс кӧмасис-пасьтасис — генеральскӧй морт лои. А сійӧ эськӧ Емельыс зырымӧсь ныра, ветьӧк кодь паськӧма морт и вӧлі. Зэв мича паськӧмӧн пасьтасис, вӧв вылӧ сӧліс, вӧв вылын ветлӧдлыштіс и лэдзис бӧр вӧвсӧ шор дорӧ.

Локтӧ гортас. Ӧдзӧсӧ игӧдчӧ:

— Моньяс, восьтӧ, восьтӧ, батьӧ сёйис, батьӧ сёйис, восьтӧ моньяс! — гымӧдӧ.

Моньяс сэсся эз восьтны да сідзи йиркнитіс — кильчӧ иганыс киссис. Киссис да, пырис. Сэсся, пырис да, шуӧ:

— Он восьтӧ-а, тайкӧ батьӧыд сёяс!

Некод эз шыасьны: мед, сёйӧны кӧ (Емельӧс сэтшӧма ӧтдортӧны, мустӧмтӧны, мед эськӧ сійӧ гу вылӧ каяс да).

Сэсся мӧд вой. Бара мӧд воклы узьны кад.

— Вай тэ, Емель, медась узьны батьыд гу вылын — гӧрд гач вурӧда.

— Медася, мый нӧ огыс?

(Гӧрд дӧрӧм да гӧрд гачыс тай кыскӧ.)

Емель бать гу вылӧ бара кайис узьны.

— Коді нӧ? Тэ, пиӧ, Педӧр?

— Абу. Емель. Найӧ оз лысьтны кайны сёйӧмысь, ме ӧтнам локті.

Неуна олыштісны. Бать сетіс сылы зэв уна зӧлӧта. Сійӧ сэсся кутіс лэччыны бать гу вылысь, труна-трона толькӧ кылӧ зӧлӧтаыс. Воис керка дорӧ:

— Восьтӧ, восьтӧ, батьӧыд сёйӧ, восьтӧ!

Оз восьтны да, бара кильчӧ иган киссис, кодыр вартіс кильчӧ ӧдзӧсад... Кильчӧ иган киссис, пырис, кайис паччӧрӧ, водіс. Аскинас эськӧ-й видісны сійӧс кильчӧ иган кисьтӧмысь, да мый нӧ эн пӧ восьтӧ-а, тайкӧ пӧ сёяс батьӧыд.

Сэсся и Емельлы талун ӧчередь узьны. «Батьыд Емельӧс талун асьсӧ и сёяс сэсся», — думайтӧны. Емель кайис.

— Коді нӧ? Тэ, пиӧ, Василей?

— Абу. Ме, бара Емель!

Батьыс перйис чуньсьыс чунькытш, сетіс Емельлы:

— Тайӧ чунькытштӧ чуньысь чуньӧ вежан — куим молодеч чеччыштасны.

Емель чуньысь чуньӧ вежис — куим молодеч чеччыштісны:

— Но, мый тэныд, выль кӧзяин, колӧ?

— А меным нинӧм оз ков, пока ме толькӧ пробуйті.

Бара чуньысь чуньӧ вежис чунькытшсӧ — бырисны. И лэччис гортӧ. Бара клёнӧдчӧ да клинӧдчӧ.

— Батьӧыд сёйис, батьӧыд сёйис!

(Бать эськӧ кысь нин му пиысь сёяс да.) Сэсся Емель трин-трон, трин-трон пырис, котӧрӧн кайис паччӧрӧ.

Мӧд лун, другӧ, сэтшӧм приказ лэдзисны: сар нылӧс окыштны...

Сэсся вокъяс мӧдӧдчӧны, а Емель вӧзйысьӧ вокъясыдлы:

— Менӧ тшӧтш нулӧ!

Вокъясыд нӧйтісны сійӧс, шуӧны:

— Тэнӧ кытчӧкӧ нуам, зырым беддьӧс!

Вокъяс мунісны. Емель моньяслысь чуман корис, тшак вотны пӧ ветла. Моньяс сетісны чуман. Сійӧ петіс, Сивко-Буркоӧс чукӧстіс, ӧтар пеляс пывсис-мыссис, мӧдар пеляс кӧмасис-пасьтасис — сэтшӧм генеральскӧй морт бара лои. И вӧв вылӧ сӧліс и муні. Неуна муныштіс — вокъяссӧ суӧдіс. Плетьнас тай кыдзи кульыштіс:

— Аминь, аминь! Код нӧ тайӧ? Илля Великӧй али коді?— вокъяс шензьӧны.

Вачкаліс да вачкаліс найӧс да сэсся пановтіс. Муніс да эськӧ и окыштіс сар нывтӧ, да эзджык судз. Ставыс горзӧны:

— Кутӧ, кутӧ!

Сійӧ толькӧ вӧвнас чардыштіс-муніс, некод эз и вермы кутныыд. Муніс. Гортӧ локтіс, тшак вайис моньяслы. Моньяс видчӧны:

— Понтшак вотӧмыд!

— Он кулӧ, сёйӧ, — шуӧ Емель.

Мӧд лун сэсся бара лэдзисны приказ: став йӧзӧс чукӧртны, коді вермас сар нылӧс окыштны. И вокъяс бара кутісны мӧдӧдчыны, а Емель бара вӧзйысьӧ:

— Вокъяс, нулӧй тшӧтш и менӧ!

Вокъяс сійӧс бара нӧйтісны-нӧшалісны: вот пӧ тэныд сар ныв пыдди, зырымӧсь ныр, сар нылӧс окыштысь!

И вокъяс мунісны. Сійӧ петіс, Сивко-Буркоӧс чукӧстіс. Ӧтар пеляс пывсис-мыссис, мӧдарас кӧмасис-пасьтасис и бара мӧдӧдчис. Вокъясӧс суис да бара плетьнас бура и козьналіс-нӧйтіс. «Вот пӧ тіянлы!» — думайтӧ толькӧ, оз эськӧ нинӧм шу-а.

Но, вокъяс повзисны, толькӧ шуӧны:

— Свят, свят, свят! Коді тайӧ, Илля Великӧй али коді? Коді тайӧ пондіс тадзисӧ вачкасьны?

И муніс Емель. Чеччыштіс ӧшиньӧдзыс да сар нывтӧ шняп — окыштіс, а сар ныв сылы плешкас клейма пуктіс. А ставыс горзӧны:

— Кутӧ, кутӧ, кутӧ, кутӧ, таысь вылӧ некод нин сэсся оз чеччышт!

Емельӧс тай он на кут. Сивко-Бурко вылын толькӧ уйкнитіс-муніс.

Гортӧ локтіс, бара чуман тыр вайис понтшакъястӧ. А моньяс бара ёна видӧны сійӧс понтшак вайӧмысь. Емель шуӧ:

— Он кулӧ, йӧзыс тай тайӧс жӧ сёйӧны, ті сёянныд жӧ.

Коркӧ вокъяс локтісны. Емель юаліс:

— Окыштінныд-ӧ сар нылӧс?

— Кысь нӧ миянлы! Миян дорысь на геройяс волісны да, ог тӧдӧ бара, вермис эз окыштны-а.

Но, узисны. Аскинас, другӧ, бара приказ. Чукӧртӧны став йӧзсӧ. Колӧ тӧдны, коді окыштӧма сар нылӧс. Чукӧртісны. Ставыс локтісны, и некод эз сюр. И мӧд лун чукӧртісны и бара корсисны, и бара некод эз сюр. Вокъяс висьталӧны:

— Миян эськӧ эм Емель вок, паччӧрын век куйлӧ, гашкӧ и, сійӧ да.

— Мунӧ да вайӧдӧ, кыдзи верманныд, сідз и вайӧдӧ!

Сэсся вокъяс даддьӧ пуксьӧдісны Емельӧс и вайӧдісны. Юрсӧ тӧбӧма. Разисны юрсӧ, другӧ, — сар нывлӧн клеймаыд.

Сэсся сар ныв зырымсӧ чышкис платтьӧ бӧж дорад, и сарлӧн зять лои, коймӧд зять нин, ыджыдджык нывъясыс нин верӧс сайынӧсь, куим ныв сарлӧн. Сэсся мунісны. Сар пырис комнатаӧ. Ныв пырис жӧ комнатаӧ, дзоляник комната сетіс сар овны налы. И сэтӧн олӧны найӧ сэсся, Емель да сар ныв.

И зятьясӧс сар кутіс ыстыны, другӧ, куим ӧкмыс му сайын, куим ӧкмыс ва сайын зӧлӧта сюра меж эм, да сійӧс кутны. Да. Зятьяс мӧдӧдчисны. А Емель шуӧ жӧ:

— Вай петав, — нывсӧ ыстӧ, гӧтырсӧ.— Петав да батьыдлысь кор ӧтик вӧв, да ме ветла жӧ.

А сар видіс нывсӧ да шуӧ:

— Вай сет ва кыскалан кӧбыласӧ, мед мунас!

Ва кыскалан кӧбыла эськӧ сетісны. Сійӧ муніс. Муніс да сійӧ ва кыскалан кӧбыласӧ начкис, да коз увйӧ ӧшӧдіс кучиксӧ. Ассьыс Сивко-Буркосӧ чукӧстіс, вылас сӧліс и муніс. Чуньысь чунь вежлӧдліс чунькытш, и куим молодеч чеччисны:

— Мый тэныд, выль кӧзяин, колӧ?

— А меным вот, куим ӧкмыс му сайын, куим ӧкмыс ва сайын зӧлӧта сюра меж эм, да сійӧ колӧ.

— О, эн шогсьы, ставыс лоӧ!

Мунісны, кутісны и вайӧдісны. Паныд нин локтӧны. Сэсся чуньысь чунь вежлӧдліс бара чунькытш, и детинаяс, молодечьяс, бара бырисны. Меж босьтіс и локтӧ.

Зятьяскӧд паныдасис:

— О-о, кыдзи тэ тайӧс кутін? Вай миян вузав тайӧс?

— А, вузала, — мӧдыс шуӧ, Емельыд.— Ог зэв донъясь: ӧтик кок чунь кӧ сетанныд, вунданныд ыджыд кок чуньясныдтӧ да, сы вылӧ и сета.

Ыджыд кок чунь вундісны. И сетіс налы межтӧ. Ачыс муніс гортӧ. А зятьяс локтісны коркӧ, да сарлӧн нин нимкодьыс: найӧс и окалас, и кутлас, кык зятьӧс. Сы выйӧдз любитӧ. А Емельӧс видӧ.

Сэсся бара тӧдмаліс сар, мый куим ӧкмыс му сайын, куим ӧкмыс ва сайын зӧлӧта тшӧтя порсь эм, да сійӧ пӧ вот колӧ эськӧ кутны, ветлыны да. И зятьясӧс ыстӧ. Зятьяс мунӧны. Мӧдӧдчисны мунны. Емель тожӧ мӧдӧдчӧ.

— Вай ветлы, — гӧтырыслы шуӧ, — петав да кор батьыдлысь ӧтик вӧв, да ме ветла жӧ тшӧтш.

Видіс сійӧс сар буриника, но сетіс жӧ сэсся ва кыскалан кӧбыла. Ва кыскалан кӧбыласӧ сӧмын сетӧ, мед мунас Емельыд кытчӧкӧ.

Петіс Емель. Неылӧ муніс. Ва кыскалан кӧбыла начкис, коз увйӧ кучик ӧшӧдіс, ассьыс Сивко-Буркоӧс чукӧстіс. Локтіс Сивко-Бурко. Ӧтар пеляс пывсис-мыссис, мӧдарас кӧмасис-пасьтасис — сэтшӧм генеральскӧй морт лои. И муніс. Муніс, муніс. Найӧс суис и пановтіс. Муніс и бара чуньысь чунь вежлӧдліс чунькытш, куим молодеч чеччыштісны:

— Мый тэныд колӧ, выль кӧзяин?

— А мен вот колӧ, куим ӧкмыс му сайын, куим ӧкмыс ва сайын зӧлӧта тшӧтя порсь эм, да сійӧ мен колӧ.

— Но, эн шогсьы, ставыс лоӧ!

Найӧ мунісны, кутісны, вайӧдісны. Паныд нин локтӧны. Сійӧ бара чуньысь чунь вежис чунькытш — найӧ бырины, куим молодеч. И локтӧ, другӧ, зӧлӧта тшӧтя порся, Емель. (Оз тӧдны, мый сійӧ Емель.) Сэсся коркӧ — висьтавнытӧ регыд — зятьяскӧд паныдасис:

— О-о, кыдзи тэ тайӧс кутін? Вай миян вузав тайӧс?

— Вузала. Ог и зэв донъясь: ӧтик кок чунь кӧ сетанныд, вунданныд да, сы вылӧ и сета.

Мӧд кокысь чунь вундісны, и сетіс порсьтӧ. Воис сійӧ сарскӧй дворечӧ, Сивко-Буркоӧс лэдзис шор дорӧ. Пырис и водіс. И зять, другӧ, кык зять, локтісны. Аминь-аминь! Сарлы нимкодь. Сар нин пӧльышттӧг оз пуксьӧд зятьясӧс, сэтшӧм нин любӧ.

Но олісны, олісны. И бара пондіс кывсьыны, сар кывлӧма, мый куим ӧкмыс му сайын, куим ӧкмыс ва сайын комын сывъя кӧбыла эм, да комын жӧ и чань сы бӧрысь вӧтлысьӧны. Но и найӧс эськӧ колӧ бара кутны. А найӧс пӧ некыдзи он вермы кутны, некод пӧ оз вермы пӧкӧритны: курччӧ. Но ладнӧ. Курччӧ кӧ, пӧкӧритысь петас кодкӧ. И мӧдлун зятьясӧс ыстӧ. Зятьяс мунісны, бара кык зять. Емель бара тшӧктіс вӧв корны:

— Вай, петав да, батьыдлысь вӧвсӧ кор, ме ветла жӧ.

Сар видіс ёна нывсӧ, но сэсся сетіс жӧ ва кыскалан кӧбылатӧ:

— Кыкӧс нин нуис да эз вай, тайӧс бара жӧ ӧд оз нин вай, ва кыскалан кӧбылатӧ, — сар сідзи видӧ.

Сэсся муніс. Петкӧдіс ва кыскалан кӧбыла. Муныштіс неуна, начкис вӧв, чуньысь чунь вежис чунькытш, куим молодеч чеччыштісны:

— Мый тэныд колӧ, выль кӧзяин?

— Меным вот мый колӧ: куим ӧкмыс му сайын, куим ӧкмыс ва сайын комын сывъя кӧбыла эм и комын чань вӧтлысьӧны сы бӧрся. Сійӧ эськӧ меным колӧ.

— Эн шогсьы, сійӧ лоӧ, — молодечьяс шуӧны.— Тэ толькӧ босьт ем дюжина кыкӧс да кучикъяссӧ кӧбылаясыдлысь, сэсся кучикас емъяссӧ сатшйӧдлы. Сэсся и ставыс лоӧ, сійӧс пӧкӧритам, мыйӧн мунам.

Сэсся вӧчис сійӧ, мый колӧ: вӧв вылӧ шлапкис кучикъяс, ем сатшйӧдліс. И мунісны. Мунісны, другӧ, да сразу вӧв оз пӧкӧритчы. Полметра пасьта лоӧ на костын, толькӧ пурны кӧсйӧ, курччыны. Да сылы шняпкисны кык пель костад кӧрт паличнад. Дасысьтӧ кымын вартісны. Сэсся уськӧдчис пидзӧс йылас вӧлыд:

— Водзӧ ме лоа пӧкӧрнӧйӧн!

И домалісны вӧлӧс, вайӧдӧны, а комын чань бӧрсяньыс вӧтчӧ. Зятьяскӧд паныдасисны.

— О-о, кыдзи тэ тайӧс кутін? Вай миянлы вузав.

— Вузала. Ог и зэв донъясь: мышкусьыныд кӧ тасма пасьта кучик кульыштанныд, сы вылӧ и вузала.

Найӧ, другӧ, чажнитісны-кульыштісны. И сетіс сійӧ чаня кӧбылатӧ, ставсӧ сетіс. Ачыс локтіс. Эз, другӧ, сэсся Емельнад вод, генеральскӧй паськӧмнад водіс узьныыд. А сар ныв воис и сэтшӧм нимкодь:

— Батьӧ, батьӧ, волы! Емельыд местаын ӧд аминь мича морт узьӧ!

— Да мун сэтысь, чужъя! Тіянлы век кодкӧ мича кажитчӧ!

— Да, менам именнӧй чунькытшӧй чуняс дай носӧвикӧй чуньяс костас! Да ог тӧд, Емельыд абу-а, зэв ӧд мича, батьӧ.

Сэсся мӧдысь локтіс корны батьсӧ.

— Да мун сэтысь, чужъя! Мый нӧ чуймӧмыд? Век тіянлы кодкӧ кажитчӧ.

И петіс сар. И сарыдлы, другӧ, кажитчис жӧ, сэтшӧм мича:

— Но, аттӧ штука тайӧ! Мый бара тайӧ лоӧма?! — сар шензьӧ.

Сэсся шуӧ:

— Зятьяс локтасны, вай пывсянтӧ вӧдитӧ!

Пывсян вӧдитісны. Зятьяс локтісны. Комын сывъя кӧбыла да комын чань вайӧдісны. Пывсьыны лэччисны. Емель шур-шар пӧрччысис. Зятьяс оз пӧрччысьны.

— Мый нӧ ті он пӧрччысьӧй? Пӧрччысьӧй. Поланныд ӧмӧй пӧрччысьӧмысь? Ме тай со пӧрччыси, — Емель шуӧ.

Сар тшӧктіс пӧрччысьны. Коркӧ-некоркӧ заводитісны пӧрччысьны, пӧраыс воис да. Вылысъяссӧ пӧрччалісны, а улыс дӧрӧмсӧ оз пӧрччыны. Сэсся Емель:

— То нӧ зӧлӧта сюра межыд, то нӧ зӧлӧта тшӧтя порсьыд, то нӧ комын сывъя кӧбылаыд! — кучикъяссӧ мышкусьыныс да кок чуньяссӧ пуктіс пывсян ӧшинь вылад.

— Но, трасичаясӧ, — сар дӧзмис на вылӧ. Сэсся, кайисны да, ӧти пельӧсӧ налы дзоляник комната сетіс:

— Татӧн ті олӧ, тіянлы дӧвӧль!

А Емельлы сетіс джын сарствосӧ да ыджыд комната сетіс. И быдсяма пӧлӧс сёян-юаныс ӧні эм Емельлӧн, прамӧ руалӧ. Сэтшӧма сэсся Емельӧс уважайтны кутіс: «Емель тай вӧлӧма куталысьыд, абу тай найӧ вӧлӧмаӧсь куталысьясыд!» Найӧс сэсся ненавидитны кутіс, кык зятьтӧ. А Емельӧс радейтны кутіс.

Вот, всё!