АРАЛЬӦ-ПӦЛЬӦ
Важӧн вӧлі старик гозъя. Налӧн чужис ӧти ныв. Сэсся гӧтырыс висьмис да кулі, а стариклы лои выльысь гӧтрасьны. Выль гӧтырыслӧн мӧд ныв чужис. Сэсся выль гӧтырыс тшӧктӧ важ гӧтырыдлысь нывсӧ вӧрӧ катӧдны, вӧр керкаӧ. Стариклы эськӧ и жаль да быть лои. Старик тшӧктіс сёян лӧсьӧдны. А сылы пуктісны пызь пыдди лыа, нянь пыдди кирпич, сов пыдди дзимбыр. Старик катӧдіс, нылӧс колис вӧр керкаӧ. А вӧр керкаас вӧлі олӧны пон, кань да петук. Найӧ и корӧны сёян. Час пӧ, рок пуа да верда тіянтӧ. Видлас-а, сылӧн кирпичыд нянь лоӧма, лыаыд — пызь, а дзимбырыд — сов. Сэсся рок пуас и вердас, ставыслы паньтыр рок сетас.
Рытнас локтас сэтчӧ Аральӧ-пӧльӧ. Сьылӧ:
— Медыджыд юсӧ посйӧмӧн вуджи,
Шӧркост юсӧ уйӧмӧн уйи,
Меддзоля юсӧ келӧмӧн келі.
Нопйӧ менам пач кодь,
Тошкӧ менам корӧсь пӧв кодь,
Зырымӧ менам бедь кузя.
И шуӧ:
— Лок, нылӧ, нопйӧс пӧрччы.
— Ачыд, пӧльӧ, пӧрччы.
— Лок, нылӧ, тошкӧс сынав.
— Ачыд, пӧльӧ, сынав.
— Лок, нылӧ, зырымӧс суль.
— Ачыд, пӧльӧ, суль.
— Тэ нӧ, нылӧ, кытчӧ водан?
— Ме паччӧрӧ.
— А ме пӧлатьӧ.
Узисны, асывводз чеччис пӧльӧ — ныв абу.
— Тэ нӧ, нылӧ, кӧні?
— Ме мысся.
Кималасӧн корсис, эз сюр.
— Тэ нӧ, нылӧ, кӧні?
— Ме пач ломта.
Бара водлас — абу.
— Тэ нӧ, нылӧ, кӧні?
— Ме рок сёя.
Сэсся тай кыдзи кутісны — пон увтны: «Ув-ув, рок паньтыр!», кань нявзыны: «Кур-няв, кур-няв, рок паньтыр!», петук чуксасьны: «Кикуруллю, рок паньтыр!» — сэтшӧм шум лэптісны. Аральӧ-пӧльӧ повзис да пышйис. А нопсӧ и колис, зарни тыра ноп. Найӧ сёйисны-юисны и рытӧдз сэні олісны.
Бара, зонмӧ, рыт локтӧ, и Аральӧ-пӧльӧ бара локтӧ ыджыдджык на нопъя. Сьылӧ:
— Медыджыд юсӧ посйӧмӧн вуджи,
Шӧркост юсӧ уйӧмӧн уйи,
Меддзоля юсӧ келӧмӧн келі.
Нопйӧ менам пач кодь,
Тошкӧ менам корӧсь пӧв кодь,
Зырымӧ менам бедь кузя.
— Лок, нылӧ, нопйӧс пӧрччы.
— Ачыд, пӧльӧ, пӧрччы.
— Лок, нылӧ, тошкӧс сынав.
— Ачыд, пӧльӧ, сынав.
— Лок, нылӧ, зырымӧс суль.
— Ачыд, пӧльӧ, суль.
И бара узьны кӧсйӧны.
— Тэ нӧ, нылӧ, кытчӧ водан?
— Ме паччӧрӧ.
— А ме пӧлатьӧ.
Узисны, нылыс бара водзджык чеччис.
— Тэ нӧ, нылӧ, кӧні?
— Ме мысся.
Кималасӧн корсис, эз сюр.
— Тэ нӧ, нылӧ, кӧні?
— Ме пач ломта.
Бара водлас — абу.
— Тэ нӧ, нылӧ, кӧні?
— Ме рок сёя.
Уськӧдчисны, пон увтны: «Ув-ув, рок паньтыр!», кань нявзыны: «Кур-няв, кур-няв, рок паньтыр!», петук чуксасьны: «Кикуруллю, рок паньтыр!» Аральӧ-пӧльӧ повзис да пышйис, зарни тыра нопсӧ бара нывлы колис. Сёйисны-юисны, рытӧдз олісны. Рыт локтіс, Аральӧ-пӧльӧ бара локтӧ, ещӧ нин ыджыд нопъя.
— Медыджыд юсӧ посйӧмӧн вуджи,
Шӧркост юсӧ уйӧмӧн уйи,
Меддзоля юсӧ келӧмӧн келі.
Нопйӧ менам пач кодь,
Тошкӧ менам корӧсь пӧв кодь,
Зырымӧ менам бедь кузя.
— Лок, нылӧ, нопйӧс пӧрччы.
— Ачыд, пӧльӧ, пӧрччы.
— Лок, нылӧ, тошкӧс сынав.
— Ачыд, пӧльӧ, сынав.
— Лок, нылӧ, зырымӧс суль.
— Ачыд, пӧльӧ, суль.
Узьны бара лӧсьӧдчӧны, пӧльӧ юалӧ:
— Тэ нӧ, нылӧ, кытчӧ водан?
— Ме пӧлатьӧ.
— А ме паччӧрӧ.
Сэсся асыв воис, бара нылӧс чуксалӧ:
— Тэ нӧ, нылӧ, кӧні?
— Ме мысся.
— Тэ нӧ, нылӧ, кӧні?
— Ме пач ломта.
—Тэ нӧ, нылӧ, кӧні?
— Ме рок сёя.
Пон авӧстас: «Ув-ув, рок паньтыр!» Кань нявӧстас: «Кур-няв, кур-няв, рок паньтыр!» Петук чукӧстас: «Кикуруллю, рок паньтыр!» Аральӧ-пӧльӧ повзяс и пышъяс, нопйыс бара кольӧ. Куим ноп кольӧма, ставыс зарни.
А ичиньыс висьталӧ стариклы: вай пӧ ветлы вӧр керкаас да вай нылыдлысь лысьӧмсӧ. Бать кайис вӧр керкаӧ — ныв ловъя и куим зарни тыра ноп. Доддьӧ сӧвтчисны и локтӧны, зонмӧ, гортас. А налӧн кутю дзоляник вӧлі. Ичинь нӧк гудралӧ, а кутю сэні жӧ бергалӧ дай увтӧ:
Лювк-лявк, энька,
Лювк-лявк, айка,
Старик вӧрысь вайӧ
Додь тыр эмбур!
А ичинь дӧзмас да уськӧдчас кутю вылӧ, нӧк кольтаннас вачкалӧ: оз пӧ ӧд эмбур, лысьӧм ӧд вайӧ. Кутю ланьтыштлас и бара увтӧ:
Лювк-лявк, энька,
Лювк-лявк, айка,
Старик вӧрысь вайӧ
Додь тыр эмбур!
Ичинь бара уськӧдчылас кутю вылӧ, а кутю оз ёна и шогсьы, толькӧ марсйӧ-нюлӧ резсьӧм нӧксӧ.
Сэсся старик локтас, ныв ловъя и куим зарни тыра ноп. Котӧрӧн воча петіс ичинь, и пыртлісны зарнисӧ. Завидь босьтӧ:
— Вай, — шуӧ, — старик, менсьым нылӧс катӧдлы аски вӧр керкаас.
Ассьыс нывсӧ мӧдӧдас, зэв пӧ тай уна нажӧвитӧма. Пуктісны сылы нянь, пуктісны пызь, пуктісны сов, уна сёян сӧвтісны доддяс.
Нывсӧ катӧдіс, вӧр керкаас колис, ачыс бӧр гортас лэччис. Пон, кань да петук сёян корӧны. А ичинь ныв оз сет налы. Сэсся няньыд сылӧн лоас кирпич, пызьыд — лыа, солыд — дзимбыр. Сёйны лоас нинӧм. Рытнас бара локтіс сэтчӧ Аральӧ-пӧльӧ.
— Медыджыд юсӧ посйӧмӧн вуджи,
Шӧркост юсӧ уйӧмӧн уйи,
Меддзоля юсӧ келӧмӧн келі.
Нопйӧ менам пач кодь,
Тошкӧ менам корӧсь пӧв кодь,
Зырымӧ менам бедь кузя.
Пырис вӧр керкаӧ:
— Лок, нылӧ, нопйӧс пӧрччы.
— Ачыд, пӧльӧ, пӧрччы.
— Лок, нылӧ, тошкӧс сынав.
— Ачыд, пӧльӧ, сынав.
— Лок, нылӧ, зырымӧс суль.
— Ачыд, пӧльӧ, суль.
— Тэ нӧ, нылӧ, кытчӧ водан?
— Ме паччӧрӧ.
— А ме пӧлатьӧ.
Водісны. Узисны. Асывнас чеччис Аральӧ-пӧльӧ, нылӧс корсьӧ:
— Тэ нӧ, нылӧ, кӧні?
— Ме мысся.
— Тэ нӧ, нылӧ, кӧні?
— Ме пач ломта.
— Тэ нӧ, нылӧ, кӧні?
— Ме рок пуа.
Видлас сёянторсӧ-а, ставыс кирпич, лыа да дзимбыр. Роксӧ пуны нинӧмысь. Аральӧ-пӧльӧ кутас нывсӧ, пон, кань да петукыд оз шыасьны да. Кутас да куляс нывсӧ. Яйсӧ сёяс, а кучиксӧ пӧльтас-зэлӧдас да ӧшӧдас юр йыв ӧшиньӧ, быттьӧ видзӧдӧ сэтчӧ да нюмъялӧ.
Куим лун мысти ичинь мӧдӧдӧ старикӧс:
— Мун, старик, ветлы нылыдла, да додьсӧ эн пӧрӧд, зӧлӧтасӧ эн кисьты.
Старик мунӧ. Локтӧ, вӧр керкаланьӧ матыстчӧ. Аддзӧ: нылыд юр йыв ӧшиньӧд видзӧдӧ, нюмъялӧ радысла. Воас-а, лысьӧмыс толькӧ.
А ичинь гортас нӧк гудралӧ, сёян чӧскыдӧс лӧсьӧдӧ, зӧлӧта тыра нопъяса нывсӧ виччысьӧ. Понйыс сэні жӧ бергалӧ да увтӧ:
Лювк-лявк, инька,
Лювк-лявк, айка,
Старик вӧрысь вайӧ
Телега тыр лысьӧм.
Инька скӧрмас да горӧдас:
— Эн сідз висьтав! Телега тыр эмбур вайӧ!
Старик локтас — телегаас нылыслӧн лыыс да кучикыс.
