АРӦЙ ДРӦЙ
Олісны-вылісны крестьянин гозъя. Налӧн ныв чужи. Сэсся сійӧ нылыс быдмыштіс. Мамыс кулі, батьыс тьӧтка вайис. Тьӧткаыс зэв скӧр вӧлі. Тьӧткаыслӧн ныв чужи. Тьӧткаыс шуӧ батьыслы:
— Ну тайӧс кытчӧкӧ вӧр керкаӧ, сэні бубуляяс да!
Бать доддясяс дай катӧдас. Воас вӧр керка. Сэні петук да чипан, да пон, да кань. Ныв дінӧ найӧ уськӧдчасны. Ныв зэв ёна найӧс кутас вердны, корсялас яй да шыдӧс, налы сёянтор. Зэв ёна кутас дӧзьӧритны. Сэсся водасны найӧ да узясны. Аскинас чеччасны да кылӧны — кодкӧ зэв ыджыд кок шыа локтӧ. Пос помсяньыс на кылӧ шуалӧ:
Арӧй Дрӧй локтӧ.
Нопйӧ менам пач ыджда,
Юрӧ менам сур пуан пӧрт ыджда,
Синмӧ менам чась пасьта,
Пельӧ менам кушенча пӧв ыджда,
Зырымӧ менам бедь кузя,
Тошкӧ менам корӧсь гоз ыджда...
Уп! Мудзи!
Пуксяс, да лабичыс и джоджыс толькӧ вазмунӧ. Арӧй Дрӧй шуӧ:
— Нылӧй, лэччы, йӧкты!
Ныв лэччас паччӧрысь да йӧктас, да йӧктас. Арӧй Дрӧй эськӧ кватитас нылӧс, да сы дінӧ уськӧдчасны кань да петук, да чипан, да пон. Бордъясны да бордъясны Арӧйӧс, чашъясны да чашъясны Дрӧйӧс. Арӧй Дрӧй шуӧ:
— Уп-уп, мудзи, лолӧс кӧть кольӧ!
Сэсся Арӧйӧс котӧртӧдасны верст ылнаӧдз. Сылӧн пач ыджда нопйыс и кольӧ. Сэтӧн вӧлӧма тырыс эзысь. Гӧбӧчӧ нопсӧ пыртасны.
Ныв век ёна радейтӧ пон да кань, да чипан, да петукӧс, вердӧ найӧс да дӧзьӧритӧ. Сідзи Арӧй Дрӧй куимысь, куим лун помся волас. Быд волӧм бӧрын кольӧ вӧлі нывлы эзысь ноп.
Ныв сэсся лэччас гортас куим эзысь нопйӧн. Сійӧс зэв ёна жалитӧны кольччысьяс, бӧрдӧмӧн колльӧдасны. А гортас налӧн вӧлі кычипи. Сійӧ зэв ёна кутас увтны:
— Тяв-тяв, айтӧм-мамтӧм ныв локтӧ, куим эзысь ноп вайӧ!
Тьӧтка петас кычи дінӧ да кутас сійӧс нӧйтны:
— Эн сійӧс шу! Айтӧм-мамтӧм нывлысь лысьӧмсӧ вайӧны!
Ныв локтас гортӧ, да зэв ёна кутасны шензьыны. Тьӧтка ыстас сэсся ассьыс нывсӧ. Ныв воас вӧр керкаӧ, да сідзи жӧ уськӧдчасны петук да чипан, да кань, да пон, чайтасны айтӧм-мамтӧм нылӧн. Ныв, сійӧ ӧтиӧс чужъяс, мӧдӧс вачкас, коймӧдӧс шыбитас, некодӧс оз сибӧд.
Найӧ сідз жӧ водаласны, узясны, аскинас чеччасны да бара кодкӧ кылӧ зэв ыджыд кок шыа локтӧ:
Арӧй Дрӧй локтӧ.
Нопйӧ менам пач ыджда,
Юрӧ менам сур пуан пӧрт ыджда,
Синмӧ менам чась пасьта,
Пельӧ менам кушенча пӧв ыджда...
Зырымӧ менам бедь кузя,
Тошкӧ менам корӧсь гоз ыджда...
Уп! Мудзи!
Пуксяс, да ставыс вазмунӧ. Ныв паччӧрын.
— Нылӧй, лэччы, йӧкты!
Йӧктыны кутас, да Арӧй Дрӧй кыдзи кватитас — муз-маз и керас. Чипан да петук, да кань, да пон оз и дорйыны. Арӧй Дрӧй сэсся мунас гортас.
Мешӧкӧ лысьӧмсӧ тэчасны дай гортас лэччӧдасны. Воны на кутасны, а кычипи бара нин сьылӧ:
— Кляв-кляв, ая-мама нывлысь лысьӧмсӧ вайӧны!
Мам сылӧн кылас сійӧс, кычиӧс нӧйтас да нӧйтас:
— Эн сійӧ шу! Тэ сьыв: ая-мама ныв куим эзысь ноп вайӧ!
Локтасны-а, сӧмын лысьӧмыс.
