ГОЗЪЯ ДА ӦТИК ПИ

Олісны-вылісны гозъя, налӧн вӧлі ӧтик пи Иван. Иван зэв кыйсьысь-вийсьысь. Вӧрӧ мунас, пӧтка ваяс тырыс. Батьлы-мамлы век вайӧ, быд лун вайӧ нопйӧн. Сэсся ӧтчыд сійӧ муні мельнича пруд дорӧ, пруд дортіыс ветлӧдлӧ, а ныв сэтысь петӧма прудсьыс да сылысь став утка-пӧткатӧ и мырддис. Бать-мамыс дорӧ воис, да найӧ шуӧны:

— Мый нӧ, Иван, нинӧм эз сюр?

— А эз тай сюр талун!

Мӧд лун муніс. Вайӧ вӧлі. Бара нылыс босьтіс, и бара абу.

— Менӧ кӧ ваян, — нылыс шуӧ, — сета, он вай — ог сет.

Сійӧ думайтчис, думайтчис да нинӧм эз шу, а мамыслы висьталіс:

— Вот, мамӧ, татшӧмтор. Ме, — шуис, — кык лун нин вая вӧлі, а менсьым кыкысьсӧ ӧтик нывка мырддис. Менӧ кӧ пӧ ваян, сета. А ме вот ог кӧсйысь вайны, да оз и сет.

Мамыс и шуис:

— А вот тэ видзӧд. Мельнича прудсьыс петас, да видзӧдлы, синкыма кӧ нылыс, кӧсйысь вайнысӧ, а синкымыс кӧ абу, эн кӧсйысь вайнытӧ.

И вот сійӧ коймӧд лун муніс, и бара нылыд босьтіс сылысь ноптӧ, прӧмыс ноптӧ и шуис:

— Иван, менӧ ваян он?

Ныв вылӧ видзӧдліс Иван и шуис:

— Вая.

— Ваян, и бур!

И ныв ставсӧ сетіс, куимнан лунся прӧмыстӧ. И шуӧ:

— Если кӧ тэ менӧ ваян, тэ, — шуӧ, — лок аски та пӧраясӧ татчӧ, и ветлам менам бать-мам ордӧ приданнӧйла.

Иван муніс и бать-мамлы висьталіс, мый аски сійӧ мунас ныв ордӧ.

Иван муніс. И нылыд петіс бара. И нылыдкӧд мельнича прудъяд пырисны, ваас пырисны. Ва увтіыс мунісны, мунісны и воисны нывлӧн бать-мам ордӧ. И налы вайисны зэв уна гӧснеч. Гӧститісны, мыйкӧ мында олісны, и зэв уна вӧв додь тыр вайисны приданнӧй нывлы. Ныв зэв сюсь: воисны да, налӧн вӧлі лёкиник керка, а нылыд керка керис и быдтор, выль керка вӧчисны и кутісны овны. А сарыдлы завидь лои (важӧн ӧд, кыдз шуасны, саръяс гӧтраліснысӧ), мый найӧ ӧти войӧн керка вӧчисны. И корисны Ивантӧ сэтчӧ, сар дорӧ. А сарлӧн сэтӧн вӧліны думщикъяс, и думщикъяс шуӧны:

— Иван кӧсйысьӧ ӧтик войӧн керны вичко!

Иван эськӧ нинӧм эз шулы. Иван чуймис:

— Мый нӧ тайӧ?

— А вот, оз кӧ ло, юр керавны!

Иван сэсся шогӧ уси, муніс гӧтыр дінӧ. Гӧтыр и шуӧ:

— Мый, Иван, тэ сэтшӧм шог?

— А мый нӧ, — шуас, — ӧтик войӧн тшӧктісны вичко керны! Кыдз нӧ тайӧс ме верма вӧчны?!

— Эн шогсьы, вӧчам!

И ичмонь ӧти войнас вӧчис сійӧс. Вичко зэв мича лои.

— Мун, — шуас, — вичко дінын толькӧ тотшкӧдчышт, ӧтилаӧ тотшӧд да мӧдлаӧ тутшӧд, мед вӧлі, мый вӧчсьӧ.

Сійӧ вӧчис. Сар чеччис, аддзис — вӧчӧма. Бара думщикъяс думайтісны, думайтісны и бара шуӧны:

— А Иваныс ӧд кӧсйӧ вӧчны гортсяньыс тэӧдз пос. Сэтшӧм кӧрт пос, и гӧгӧрыс мед сад вӧлі, а пос дорас мед ты вӧлі, и ты вылас мед утка-пӧткаяс плавайтісны.

Иванӧс бара корисны.

— Иван, — шуас сар, — тэ вот ошйысьӧмыд татшӧмтор...

— Ме, — шуас, — нинӧм эг кӧсйысьлы!

— Да, — шуас, — тэ ошйысьӧмыд. Он кӧ тайӧс ӧти войӧн вӧч, тэн смерть — юртӧ керавны!

Гӧтырлы бара висьталіс.

— А, — шуас гӧтырыс, — мый нӧ, Иван, эн пов, кыдзкӧ, гашкӧ, вӧчам!

Бара водіс Иван. Асывводз гӧтырыс чеччӧдӧ:

— Нолы, — шуӧ, — чеччы, кӧзяин. Мун, — шуас, — да кытӧнкӧ ты дорас мыйкӧ ӧтиӧн швучкы да мӧдӧн швачкы, мыйкӧ вӧч.

Иван муніс, мыйкӧ сэтӧні век быттьӧ вӧчӧ. Локтіс сар бара, шуӧ:

— Смотри, мый сійӧ вӧчӧ?!

Этійӧ думщикъяслы бара завидь, кӧсйӧны кыдзикӧ изведитны Иванӧс. Сэсся шуӧны сарлы:

— Иваныд со нин мый кӧсйӧма керны: мый пӧ зверыс эм вӧрас: ош, кӧин — быдсяма пӧлӧссӧ кӧсйӧ вайӧдны татчӧ дворас тэныд.

Иванӧс бара корисны.

— Иван, тэ, — шуас сар, — кӧсйысьӧмыд?!

— Эг, ме нинӧм ог тӧд!

— А кысь, — шуас, — он тӧд, тэ жӧ кӧсйысьӧмыд! Быть ковмас вӧчны, ошйысьӧмыд кӧ.

Мый сэсся воча шуан?! Бара муніс гортас шогӧн. Шогаліс, шогаліс, и гӧтырыс юалӧ:

— Мый нӧ, Иван, тэ татшӧм шог талун пукалан?

— А кыдзи нӧ, — шуас, — он пукав, татшӧмтор мен тшӧктісны вӧчны да.

— Но, — шуас, — вод, узь спокойнӧя. Асывнас толькӧ водз колӧ чеччыны.

Но сійӧ петіс, чукӧстіс няньки-мамкияссӧ, чукӧртӧй пӧ став зверсӧ, мый вӧрас эм.

Зверъяс кутісны чукӧртчыны. Сэтӧні коді ымзӧ, коді мый. Сарыд повзис да асывнас тшӧктӧ:

— Кыдзи гажыд, бӧр найӧс вӧтлав!

Страк сылы лои, петны оз лысьт дворас. То кӧин, то ош сэтӧні, то кӧч, то руч, быдсяма пӧлӧс зверыс. И повзис да бӧр тшӧктіс вӧтлавны найӧс вӧрас.

Сэсся Иванкӧд нинӧм эз вермыны вӧчны. И ӧні олӧны-вылӧны. Пом.