ТИМОПЕЙ

Оліс-выліс крестьянин. Сылӧн вӧлі куим пи: Василей, Ӧльӧксан да Тимопей. Коркӧ найӧ сэсся лэптісны выль керка. Бать и шуӧ Василейлы.

— Мун жӧ, пиӧ, узь выль керкаад да мый вӧтасян, висьтав.

Василей локтӧ асывнас, чужӧмыс быдӧн сьӧд.

— Мый нӧ вӧтасин? — юалӧ батьыс.

— Войбыд сьӧд кырнышъяскӧд лэбалі.

Бать босьтіс сійӧс, петкӧдіс ӧдзӧс мӧдарӧ дай тойыштіс:

— Кырнышъяскӧд кӧ лэбалін, кырнышъяс дорӧ и мун!

Василей пӧрис сьӧд кырнышӧ дай лэбзис.

Мӧд рыт Ӧльӧксанлы ӧчередь. Муніс, узис. Асывнас локтӧ, чужӧмыс быдӧн вежсьӧма, лӧз.

— Мый нӧ, пиӧ, вӧталін?

— Войбыд лягушаяскӧд чеччалі.

Бать петкӧдіс сійӧс кильчӧ помас дай тойыштіс:

— Лягушаяскӧд кӧ чеччалін, лягушаяс дорӧ и мун!

Ӧльӧксан пӧри лягушаӧ да чеччалігтырйи лэччис ваӧ.

Коймӧд вой ӧчередь Тимопейлы. Вӧтасис сійӧ да быттьӧ войбыд тӧлыся-шондіа костын узис. Мунӧ гортас и думайтӧ:

— Час, ме ог висьтав батьлы, мый вӧтаси.

Бать юалӧ:

— Но мый, пиӧ, вӧтасин?

— Немтор эг вӧтась, нем ог тӧд!

— Кыдзи эн вӧтась, пӧрйӧдлан тай менӧ!

Бать сэсся питӧ судӧ сетас. Суд судитас Тимопейӧс бать пӧрйӧдлӧмысь му тюрмаын пукӧдны. Приговор сюясны пакетӧ да мӧдӧдасны сар ордӧ.

— Ну тайӧ пакетсӧ сарлы да сет, — шуисны Тимопейлы.

А эськӧ сэні пакетас ас йывсьыс приговор. Тимопей лӧсьӧдчис да мӧдӧдчис туйӧ. Муніс да муніс. Дыр-ӧ, регыд-ӧ, паныд сюри старик, киас пӧлян.

— Кытчӧ, бур молодеч, мунан?

— Муна ме сар ордӧ, пакет нуа, а мый сэні пакетас, ачым ог тӧд.

— Вайлы мен пакетсӧ, — шуӧ старик.

— Оз позь, некодлы эз тшӧктыны сетны.

— Он кӧ сет, кутлы киад, а ме пӧльышта.

Тимопей лӧсьӧдіс пакеттӧ, да старик и пӧльыштіс.

— Но, бур молодеч, — шуис сэсся старик, — ӧні верман мунны. На тэныд ещӧ туй вылад месянь козин — тайӧ пӧлянсӧ. Толькӧ пӧльышт, а сійӧ ворсас ачыс, мый колӧ.

Тимопей босьтіс пӧлянсӧ и мӧдӧдчис. Локтіс деревняӧ, узьны вӧзйысис.

— А мыйсяма пӧлян тайӧ, мый сійӧ ворсӧ? Час жӧ, видла.

Кыдзи пӧльыштіс Тимопей — став йӧзыс, пӧрысь и том, вӧв и мӧс, ставӧн пондісны йӧктыны. Йӧктісны да йӧктісны, кытчӧдз эз дугды пӧлясьны.

— Со тай мый тайӧ вӧлӧма. Бур тайӧ, добра!

Деревняын шойччис да бара водзӧ мӧдӧдчис. А сарлӧн вӧліны ныла-пиа. Пиӧс нин колӧ гӧтравны, а ыджыд дружка некысь оз сюр. Ыджыд дружкатӧг корасьны оз вермыны, и свадьба лӧсьӧдны оз вермыны.

Тимопей локтіс сар ордӧ.

— Сідз и сідз, сар батюшко, вайи тэд пакет.

Сар косяліс пакеттӧ.

— Ок, ыджыд дружкаыд тай ачыс ме ордӧ локтіс. Мыйӧн тэ верман асьтӧ петкӧдлыны?

Тимопей босьтіс пӧлянтӧ да пӧльыштіс. Сэки сар-сарича, нылыс сылӧн и пиыс, став прислугаыс, став йӧзыс матігӧгӧрсьыс — ставыс пондісны йӧктыны. Йӧктісны да йӧктісны — усурныс чуть оз ор.

— Тырмас нин, — кевмысьны пондіс сар.

Тимопей дугдіс пӧлясьны, да сар и шуӧ:

— Татшӧм и колӧ меным ыджыд дружкаыд. Мый коран, сійӧ и сета.

— Часлы, сар батюшко, первой ме карад петавла да картӧ видзӧдла.

Сар сетіс Тимопейлы бумага, ыштӧ кытчӧ пырас, сэтчӧ и лэдзны, мый корас, сійӧ и сетны.

Тимопей петіс кар вылӧ. Ветлӧдліс да ветлӧдліс, тюрмаяс дорӧ воис.

— Менӧ ӧд тюрмаын пукавны судитлісны. Пырала, час, да видла, кутшӧм сэні олӧмыс.

Пырис тюрмаӧ. Сэні тырыс йӧз, ставсӧ кӧрт чепӧн дорӧмаӧсь, ставӧн ойзӧны-горзӧны. Тимопей юалӧ:

— Окотитад-ӧ вӧля вылӧ петны?

— Эн нин сёрнит, бур мортӧ, окота кувтӧдз югыд шондісӧ видзӧдлыны, вӧльнӧй сынӧдсӧ лолыштны.

Тимопей локтіс сар ордӧ.

— Сідз и сідз, сар батюшко, уна йӧз тэнад мучитчӧны тюрмаясын. Лэдзан кӧ найӧс — ыджыд дружкаӧн муна, он лэдз — ог мун!

Быть лои сарлы приказ лэдзны, тюрмаысь йӧзӧс мездыны.

Аски-бурӧ Тимопей бара петіс кар вылӧ. Ветлӧдліс да ветлӧдліс, му тюрмаяс дорӧ воис.

— Татчӧ ӧд менӧ пукавны судитлісны. Пырала, час, да видзӧдла, кыдзи сэні йӧзыс олӧны.

Пырис му тюрмаӧ (сарскӧй бумага сетӧма, пырӧмысь кутны оз вермыны). Видзӧдӧ: народыс сэні лыдтӧм, морӧсӧдзныс му гуӧ гуалӧмаӧсь, горзӧны да ойзӧны.

— Кӧсъяд-ӧ, коньӧръяс, тась мездмӧдчыны, вӧльнӧй свет вылас петны?

— Ой, эн нин сёрнит, бур мортӧ, кысь нӧ сэтшӧм енмыс сюрас, миянӧс мездысьыс!

Муніс Тимопей сар ордӧ.

— Сідз и сідз, сар батюшко, тэнад тай на и му тюрма вӧлӧма. Видзӧдлі да, йӧзыс сэні сэтшӧма мучитчӧны! Лэдзны найӧс ковмас. Лэдзан — ыджыд дружкаӧн муна, он лэдз — ог мун!

Бара сар лэдзис приказ, му тюрмаысь йӧзӧс мездыны: ыджыд дружкаыд сылы коланаджык.

Сэсся вежань-вежайӧс корсисны, судно вылӧ пуксисны и мӧдӧдчисны невеста корсьны да корасьны.

Мунӧны найӧ море кузя. И вот ӧти местаын судноыд и крукасис. Мый вӧчны? Думайтісны, думайтісны, шуисны Тимопейӧс ваас лэдзлыны. Кӧрталісны Тимопейӧс гезйӧн да лэдзисны.

Видзӧдӧ Тимопей: кык вакуль кутчысьӧмаӧсь винтас да кутӧны.

— Мый нӧ тані ті вӧчад, мыйла судносӧ кутанныд?

— Вот, — шуӧны вакульяс, — эм миян невидимка платтьӧ. Платтьӧыс ӧтик, а колӧ кыкнаннымлы.

— Кӧні сійӧ платтьӧыс?

Платтьӧ сетісны Тимопейлы. Тимопей перйис зепсьыс ыргӧн вит ура и лэдзис ваас.

— Кодныд кутанныд вит урасӧ, сылы и платтьӧ.

Вакульяс уськӧдчисны вит урасӧ кутны, а Тимопей гез кузяыс кайис выліӧ, и судно мӧдӧдчис. Невидимка платтьӧ коли Тимопей киын.

Мунісны, мунісны судноӧн, дыр-ӧ, регыд-ӧ, пондіс матыстчыны кутшӧмкӧ сарство. Тимопей петіс палуба вылӧ видзӧдны локтысь сарствоӧс. Друг сэтчӧ лэбзис сьӧд кырныш. Пуксис палуба вылад и пондіс шуны морт гласӧн:

— Вокӧ, Тимопей, дыр жӧ ме корси тэнӧ да аддзи жӧ ас кадӧ. Мунан тэ ыджыд дружкаӧн невестала, да ог кӧ ме отсав, оз сюр тіянлы невеста.

Сэсся и висьталіс, кыдзи невестаӧс корсьны:

— Петад ті кар вылас да кар кузяыс пондад мунны — быд кварталын кутасны паныд петны да невеста вӧзйыны. Невестаясыс эськӧ мичаысь-мичаӧсь да эн на вылӧ ыштӧ, тайӧ медалӧм невестаяс. Воанныд дворечас, да вайӧдасны квайт комнатаӧ. Некодас эн пырӧ, а пырӧ сэтчӧ, кытчӧ ме пыра. Ме гутӧ пӧртча да тіян водзын лоа. Пыранныд комнатаас, да сэні квайт ныв: невестаыд да сылӧн служанкаясыс, ставыс мичаысь-мичаӧсь. Эн ылав тані да сюся видзӧд: код вылӧ гут пуксьылас — сійӧ и невеста.

Судно матыстчис пристаньӧ да сувтіс. Иностраннӧй судно встречайтны сар ыстӧма.

— Кодъяс ті да кысь, кутшӧм могъясӧн ветлад? — юасьӧ сар. Ыджыд дружка ӧтвет сетӧ:

— Сэтшӧмтӧ-сэтшӧм сарствоысь ми, сар пи локтӧ сарлысь невеста коравны. Примитӧй да любитӧй!

— Локтӧй, локтӧй, бур гӧсьтъяс. Эм менам квайт невеста, коді сьӧлӧм вылад воас, сійӧс и босьтӧ.

Петісны берегӧ. Первой квартал дорӧ воисны — невеста сулалӧ, мичаысь-мича, коскӧдзыс копыртчӧ.

— Марпида саровнаӧ менам, медыджыд ныв. Медмичаыс медводзын. Туяс да шогмас кӧ, китӧ сетӧ.

Тимопей копыртчыліс да шуӧ:

— Мича эськӧ Марпида саровна, да ог жӧ ӧд ывла вылысь невестатӧ ӧкталӧ. Невестаыс миянлы керкаысь колӧ.

Копыртчыліс, да водзӧ мӧдӧдчисны. Воисны мӧд кварталӧ да сэні ещӧ мича ныв. Сар шуӧ:

— Елена саровна, тайӧ менам мӧд ныв. Туяс кӧ да шогмас, китӧ сетӧ!

Тимопей копыртчыліс да бара водзӧ. Квайт квартал прӧйдитісны да быд кварталын невеста, мичасьыс-мичаӧсь.

— Мичаӧсь жӧ тэнад нывъясыд, — шуӧ Тимопей.

— Бур жӧниклы бур и тӧвар, — висьталӧ сар.

Сэсся и дворечӧ пырисны. Воисны коридорӧ, да сэні квайт жыр. Ӧдзӧсъясыс быдсӧн восьсаӧсь. Ӧтикӧ видзӧдлісны — квайт ныв, мичаысь-мичаӧсь. Мӧдын — бара жӧ сідзи. Видзӧдӧ Тимопей: гут пырис медбӧр комнатаӧ.

— Пырамӧй, сар батюшко, этайӧ комнатаас, оз-ӧ тась сюр миянлы невестаыс.

Сар весиг чужӧм вылас вежсис.

Пырисны — сэні бара квайт ныв.

— Эсы мында ныв тэнад, сар батюшко, — шуӧ ыджыд дружка, — вошан татчӧ и сорлассян.

— Медмичасӧ бӧрйӧ да он и сорлассьӧ.

— Пасибӧ, сар батюшко, бӧръям нин ми сійӧс, коді миянлы глянитчас да коді миян вылӧ мича синмӧн видзӧдлас!

Видзӧдӧ Тимопей: гутыд пуксьыліс медбӧръя ныв вылӧ.

— Со тай коді миянлы медглянитчӧ. Сет вай китӧ, — тшӧктіс Тимопей сетны кисӧ сар пилы.

— Но, — шуӧ сар, — бӧрйысид, бӧрйысид да аддзинныд жӧ невестапутӧ. Толькӧ ӧд тайӧс сьӧкыд лоӧ босьтнытӧ. Ковмас ещӧ куим задача решитны. Решитанныд кӧ, босьтанныд, он кӧ решитӧ — бӧр тась он мунӧ!

— Ладнӧ, — шуӧ ыджыд дружка, — ковмас кӧ, и квайт задача решитам!

Сетісны сэсся налы торъя комнатаяс.

— Шойччӧ да лӧсьӧдчӧ куим задача решитны!

Тимопей думайтӧ:

— Тайӧ, зонмӧ, лёк делӧыд. Ковмас, тыдалӧ, сюсьмӧдчыны, а то вермам и юрнымӧс пуктыны.

Тимопей пасьталіс невидимка платтьӧтӧ, лоис дзик тыдавтӧм да и пырис невеста ордад. А сэні найӧ сёрнитӧны батьыскӧд:

— Сетам медпервой татшӧм задача: ваям лавкаысь дас вит ботинки пӧв да мед жӧ вурасны мӧд пӧвъяссӧ. Мун жӧ, служанка, сэтшӧмтӧ-сэтшӧм магазинӧ да ньӧб дас вит ботинки пӧв, а мӧд пӧвъяссӧ мед дзебас да некодлы оз сет.

Служанка мӧдӧдчис, а Тимопей сы бӧрся — сійӧ ӧд оз тыдав. Лавкаын служанка босьтіс дас вит ботинки пӧв да накажитіс вузасьысьлы:

— Смотри, мӧд пӧвъяссӧ некодлы эн вузав.

Вузасьысь тэчаліс ботинки пӧвъястӧ да и пуктіс прилавок улас. Тимопей думайтӧ: «Мый вӧчны? Ӧні кӧ ме босьта ботинки пӧвъяссӧ, ящиктӧ аддзыласны, ящикыд тыдавны кутас. А дзебся кӧ лавкаас, менӧ игналасны, дай петнытӧ ог вермы».

Виччысис рытӧдз да петіс лавкаысь вузасьысьыс бӧрся. Виччысис войӧдзыд да локтіс вузасьысь ӧдзӧс дорӧ да пондіс гымӧдны:

— Ой купеч, лавкатӧ ӧд петкӧдісны!

Вузасьысь садьтӧг повзис да ӧдйӧ тай котӧртіс лавкаад. Видзӧдӧ: томанъяс дзоньӧсь:

— Мый тайӧ? Томанъясыс тай дзоньӧсь.— Тӧвар, видзӧдӧ да, местаын жӧ. Ботинки пӧвъяса ящик стойка улын куйлӧ.

— Час, пыравла складас, эз-ӧ сэсь петкӧдны.

А Тимопейлы сійӧ и колӧ, ящик кватитіс и муні. Войын некод эз аддзывны морттӧг ящиклысь мунӧмсӧ.

Аски-бурӧ корисны жӧникӧс дружкакӧд невеста ордӧ.

Сар шуӧ:

— Вот тіянлы первой мог пукта: со дас вит ботинки пӧв, вермад кӧ вурны мӧд пӧвъяссӧ стӧч ӧткодя — невеста тіян лоӧ, он кӧ вермӧ — юрныдтӧ он нуӧ. Аски срок!

Тимопей босьтіс ӧти ботинки пӧв да шуӧ:

— О, та вӧсна дзонь лунтӧ воштыны нинӧмла на. Тайӧ пӧлыс куим кизя, пыдӧсыс весьт кузя. Вӧчам! — да-й шыбитіс ботинки пӧвъяссӧ ящикас. Сэсся и шуӧ вежайыслы:

— Петав, вежай, менам комнатаӧ да вай пӧвъяссӧ!

Вежай петіс, вайис ящиктӧ да гузь кисьтіс джоджас мӧд ботинки пӧвъяссӧ.

Видзӧдӧны — быд пӧв, зонмӧ, стӧч лӧсялӧ. Шензьӧны. Сар и шуӧ:

— Ладнӧ, тайӧс вӧчид, а аски мӧд мог пукта. Тӧданныд — невеста босьтанныд, он тӧдӧ — юрныдтӧ он нуӧ.

Тимопей бара невидимка платтьӧ пасьталіс да кольччис ая-ныв ордӧ. Кывзӧ, мый кутасны сёрнитны.

Сар шуӧ:

— Тшӧкты лӧсьӧдны зарни вольӧс ботинки пӧлад. Мӧд пӧлас сэтшӧм вольӧстӧ найӧ оз вермыны вӧчны-лӧсьӧдны.

«Ок, — думайтӧ Тимопей, — збыль ӧд татшӧм вольӧсыд оз и сюр». Сар муніс, а сар ныв шуӧ служанкаыслы:

— Лэччы, служанка, ты дорӧ, ботинки пӧлам вольӧстор вайышт!

Тимопей думайтӧ: «Час, зонмӧ, ме та бӧрся вӧтчыла». Служанка петіс, а Тимопей сы бӧрся. Воисны ты дорӧ. Служанка тольӧдіс-тольӧдіс васӧ да горӧдіс:

— Дедушко, дедушко, волы, юртӧ корсьышта.

Ва вылыс валъяліс, валъяліс да юр мыччысис: юрсиыс зарниӧн дзирдыштӧ. Матыстчис берег дорӧ да зупкысис, мед юртӧ корсясны. «Со тай кӧні вӧлӧма зарни вольӧсыд», — думыштіс Тимопей. Служанка корсьыштіс да нем тӧдлытӧг сё-мӧд юрси и нетшыштіс:

— Сэсся, дедушка, бӧрти корсьышта, — шуӧ служанка.— Ӧні сэсся ог эшты.

Служанка мӧдӧдчис гортӧ, а дедушко бӧр вӧйтчис ва пытшкӧ. Рыт воис, и Тимопей лэччис ва дорӧ. Тольӧдыштіс ватӧ да горӧдіс:

— Дедушко, дедушко, лок, юртӧ корсьышта!

Ва вылыс валъяліс, валъяліс да мыччысис дедушкоыд — юрси сиясыс зарни. Локтіс да пуктіс юртӧ, синъясыс куньса. Тимопей корсьны пондіс юртӧ. Юковтас бедь помнас да бедь йывнас сьӧктанӧн моз шарӧдӧ. Сэсся босьтіс кӧкыльяссӧ кырымас да шуны кутіс:

— Лэпты, дедушко, юртӧ да бергӧдчышт мӧдар бокнад, мӧдар боксьыс бара корсьыштам.

Дедушко лэптіс юрсӧ, а Тимопей перйис саблясӧ, швич керыштіс — дедушколӧн юр коли Тимопей киӧ. Босьтіс Тимопей юртӧ да катӧдіс гортас, кӧні найӧ патеруйтісны. Аски бара корасны жӧникӧс да ыджыд дружкаӧс сар ныв ордӧ. Сар ныв шуӧ:

— Вот, бур молодечьяс, ботинки пӧлын со менам эм вольӧс, а мӧд пӧлас абу. Ваяд кӧ, пасибӧ шуа, он вайӧ — батьӧй ёна скӧрмас.

Тимопей шуӧ:

— Мый нӧ ботинки пӧлӧ вольӧс ог вайӧ! Колӧ кӧ, кӧть дзонь юрлӧс ваям.

Петіс сэсся да вайис юртӧ. Сар и невеста сэки акнитісны да кинаныс бок кузя лап-лапкерисны.

— Ок, ті тай збыль верманныд!

А асьныс думайтӧны: «Тайӧяс тай, зонмӧ, ыджыд тӧдысьяс, тайӧяскӧд, тыдалӧ, нем он вермы вӧчны». Сэсся сар шуӧ:

— Ещӧ тіянлы сета ӧти задача: эм миян кык моль, пуктам ми сійӧс вески вылӧ да верманныд кӧ сійӧс вескинас веситны, сэки невеста тіянлы лоӧ, он вермӧ — юр он нуӧй!

Петісны ас патераӧ, да Тимопей и думыштчис: «Но, сар-саревич, решитім ми кык задача, а тайӧ, коймӧдсӧ, кыдзи решитам, ог тӧд, юрӧй оз судзсьы. Лоӧ, тыдалӧ, юрнымӧс татчӧ кольны».

— Тэ вылӧ став надеяӧй, Тимопей, — шуӧ сар пи, — думайт да асьтӧ и миянтӧ спасит. Тимопей петіс ывлаӧ, муніс поле вылӧ да пондіс чуксасьны:

— Кырнышӧ-вокӧ, кӧн тэ ветлан, кӧн лэбалан? Волы тэ, волы, муса воктӧ смертысь мезды!

Видзӧдӧ: сьӧд кырныш лэбзьӧ и пуксис сы дорӧ:

— Мый нӧ, муса вокӧ, кутшӧм неминуча суис?

— Сідз и сідз, муса вокӧ, сар сетіс задача: гоз моль веситны; веситам — невеста сар пилы лоӧ, ог веситӧй — юрнымӧс воштам.

— О, — шуӧ кырныш, — тайӧ задачаыд абу на зэв сьӧкыд, шогсьыны нинӧмла на. Гоз молльыс сійӧ дедушкоыслӧн, кодлысь тай тӧрыт юрсӧ керыштін, синъясыс. Синъяссӧ кӧ сійӧ восьтас, свет джынсӧ аддзӧ, свет джынйыс вески вылӧ личкӧ, сэки ті он вермӧй сійӧс веситны. Но ті со кыдзи вӧчӧ: пукты зептад посни лыа да кор сійӧ синъяссӧ восьтас, лыа китырнад и чапкы синмас. Сэки сійӧ оз кут аддзыны, сэки и веситны вермад.

Ыджыд пасибӧ шуис воклы Тимопей да муніс дворечӧ. Аски бара корисны сар ныв ордӧ. Сар ныв шуӧ:

— Вот вески. Пуктам татчӧ дедушколысь юрсӧ да ті и веситӧй. Вермад веситны — ладнӧ, он вермӧ — батьӧ ёна лӧгасяс.

Пуктіс сар ныв дедушколысь юрсӧ вески вылӧ да шуӧ:

— Дедушко, восьтлы синъястӧ, видзӧдлы, мый вӧчсьӧ водзад!

Дедушко восьтіс синъяссӧ. А сэк кості Тимопей босьтіс лыатӧ китырнас да чапкис синмас, мӧд китыр босьтіс да мӧд синмас. Веситісны юрсӧ — квайт килограмм веситӧ.

— Со, Марпида саровна, вескиыд оз пӧръяв, — шуӧ Тимопей, — стӧч квайт килограмм веситӧ гоз молльыд.

Вӧчны нем. Сар шуӧ:

— Аддза ме — тіянкӧд ми немтор ог вермӧ вӧчны. Со тіянлы невеста, менам ӧтка ныв Марпида саровна.

Сэсся сар пир лӧсьӧдіс. Пируйтісны сэн лун, мӧд лун и коймӧд лун. Сэсся и Тимопей лӧсьӧдчыны кутіс гортӧ. Судноӧ грузитісны приданнӧйяс. Колльӧдны кутісны. Тимопей и шуӧ:

— Но, сар, бура тэ миянӧс примитін, бура и колльӧдан. Ог кӧсйӧ и ми уджйӧза кольны.

Перйис сэсся дудкасӧ да кыдзи тай пӧльыштіс — став ловъя лолыс пондісны йӧктыны: сар и сарича йӧктӧны, Марпида саревна и сар пи — став йӧзыс, выйӧн вӧвъяс и мӧсъяс. Йӧктісны да йӧктісны, йӧктісны да йӧктісны. Сар пи нин кевмысьны пондіс:

— Тырмас нин, Тимопей, кок сӧнъяс орисны!

Кытчӧдз эз сӧвны судно вылӧ, пыр йӧктӧдіс Тимопей.

— Мед омӧльджыка тешитчис миян вылын сар-батюшконыд тіян.

Ладнӧ. Судно мынтӧдчис прикол йылысь и мӧдӧдчисны. Мунісны, мунісны — висьтавны регыд-а, колӧкӧ, мый дыра нин мунӧны — судноыд бара сибдіс. Сибдіс дай сувтіс, бӧрӧ оз вӧрзьы ни водзӧ. Ӧти лун сулалісны дай мӧд лун. Мый вӧчны? Бара пондісны Тимопейлы кевмысьны:

— Пырав, Тимопей, мезды!

— Ог пыр, ме ӧтчыд пыравлі нин.

— Пырав, мый коран, сійӧ и сетам!

— Ладнӧ инӧ, пыравла, толькӧ татшӧма сёрнитчӧм мысьт: гортӧ локтам да, невестакӧд первой войсӧ мем узьны.

Сар пи сӧгласитчис — мый вӧчан, муннытӧ ӧд колӧ! Тимопей кӧртасис гезйӧн — лэччис. Видзӧдӧ: судноыд труба йылӧ крукасьӧма. Трубатӧ кокнас чужйис, дай судноыд вӧрзис. А вылысас сар пи босьтіс чер да гезтӧ и сӧтіс — Тимопей уси труба розьӧ.

Усис да усис — воис керкаӧ. А сэні лягуша — сылӧн Ӧльӧксан вокыд.

— Ок, — шуӧ лягуша, — кыськӧ муса вок менам усис. Кыдзи нӧ татчӧ веськалін?

— Сідз и сідз, — шуӧ Тимопей и быдсӧн висьталіс, кыдзи мый вӧлі.

— Эн шогсьы, вокӧ, тайӧ зэв на ичӧт беда. Гӧстит ме ордын, шойччышт.

— Коля ӧд ме наысь!

— О, — шуӧ лягуша, — вӧтӧдан на тэ найӧс дай ылӧ на колян!

И пондіс Тимопей гӧститны лягуша вок ордын. Пуксис сійӧ пызан сайӧ, да мыйыс сӧмын сэні абу: тӧдса сёяныс и тӧдтӧмыс, мый он куж думайтны, сійӧ и эм сэні. Сёйисны да юисны. Сёрни-басни помтӧм. Сэсся и кутіс шуны лягуша:

— Но, вокӧ, пӧра мӧдӧдчыны.

— Кыдзи нӧ пӧра, вой на эг узь-а?

— Ок, дона вокӧ, куим лун и куим вой нин тэ олін.

Тимопей толькӧ шензьӧ. Чӧскыд сёян-юан дорад абу и тӧдлӧма пӧра кольӧмтӧ. Лягуша пуксьӧдіс Тимопейӧс ас вылас, дай мӧдӧдчисны. Ӧтчыд чеччыштіс лягуша да верст колис, мӧдысь кык верст чеччыштіс. Судноыд нин ылӧ колис. Берегад воисны. Берегӧ петіс Тимопей. Лягуша вокыд и шуӧ:

— Дона вокӧ, вӧтасин тэ, да тӧлыся-шондіа костын узян. Ладнӧ вӧчин, батьыдлы эн висьтав да. А ӧні, кор тэ тӧлыся-шондіа костас веськалан, миян йылысь, ыджыд вокъяс йылысь, думыштлы жӧ.

Шуис дай муніс. Тимопей кайис сар ордӧ.

— О, ыджыд дружка локтӧ. А кӧн нӧ менам пиыс?

Тимопей быдсӧн висьталіс, кыдзи вӧлі. Сар шуӧ:

— Но, кодыр сідз, ме найӧс ог примит!

Куим лун мысти сэсся и судноыд воис. Сар оз лэдз судноӧс пристаньӧ сувтӧдны.

— Кӧні ыджыд дружкаыд?— юалӧ сар.

— Ваӧ вӧйи.

— Ваӧ кӧ вӧйис, ваысь лэптӧ да вайӧдӧ!

Ӧти лун оз примит суднотӧ сар дай мӧд лун. Сэсся и кевмысьны кутіс сар пи:

— Лэдз, батьӧ, ог вермы ме ыджыд дружкаӧс судзӧдны.

— А мый тэ кӧсйысьлін ыджыд дружкаыдлы, кор сійӧс ваас лэдзин?

— Кӧсйысьлі невестаӧс первой вой сыкӧд узьтӧдны.

— Ладнӧ, лэдза ме тэнӧ берегӧ, да ассьыд кӧсйысьӧмтӧ пӧртан он олӧмӧ, петан да?

— Пӧрта, батюшко!

Судно матыстчис пристань дорӧ, сувтіс прикол вылӧ, и став свита лэччис берегӧ. Видзӧдӧны: Тимопей тшӧтш паныд локтӧ. Босьтіс Тимопей дудкатӧ да кыдзи пӧльыштіс — став ловъя лолыс пондісны йӧктыны. Йӧктісны да йӧктісны, йӧктісны да йӧктісны. Кевмысьны пондіс сар пи:

— Тырмас нин, Тимопей, ради бога, кок сӧнъяс нин орласьӧны, сювъяс нин петӧны!

— Йӧктышт жӧ, йӧктышт ещӧ, он-ӧ бурджыка гӧгӧрво, кыдзи колӧ сетӧм кывтӧ кутны.

Ставӧн укшальмисны да вӧлись дугдіс. Сар сэсся свадьба лӧсьӧдіс. Сурӧн юктасисны — сур юи, маӧн паньӧдісны — ма паньышті. Винаыд вӧлі море мында, сёяныд — мыйта лолыд лэптӧ. Сёясны-юасны, рушкуяс зэлаласны — Тимопей бара дудкасӧ пӧльыштас, бара йӧктасны да нёпкалас. Бара сёйны-юны пуксьыласны.

Сэсся и рыт воис. Колӧ жӧник-невестаӧс водтӧдны. Сар шуӧ:

— Но, ыджыд дружка, катӧд да водтӧд!

— Водтӧда: невестаӧс спальняӧ, жӧникӧс — ӧдзӧс сайӧ, сідзи ӧд миян вӧлі сёрнитчылӧма.

— Вот, Тимопей, менам эм ныв, он-ӧ сыкӧд вод?

— Вода эськӧ, да ӧд ачыс мый шуас?

Нывлысь юалӧны:

— Сідз и сідз, жӧник тэд эм.

— А тайӧ батьлӧн делӧыс. Бласлӧвитас кӧ, Тимопейысь ӧтдор мӧд жӧникыс мем оз ков!

Бать бласлӧвитіс нылӧс, дай мунісны водны кык гозъя: ӧтарас Елена Прекрасная, Тимопейлӧн невеста, мӧдарас — Марпида саровна.

— Со тай тӧлыся-шондіа костас кор ме веськалі. Кӧн нӧ бара дона вокӧ менам Василей ветлӧ-лэбалӧ, кӧн нӧ дона вокӧ Ӧльӧксан ветлӧ-чеччалӧ? Воисны кӧ, ёна жӧ эськӧ гажӧдчим.

Кодъяскӧ сэсся ӧдзӧсад зымӧдны пондісны:

— Эй, Тимопеюшко, восьты ӧдзӧстӧ, вокъясыд локтісны!

Тимопей восьтіс ӧдзӧстӧ, видзӧдӧ: кык вок локтӧны, сэтшӧм шаньӧсь да мичаӧсь. Кутшӧм нин сэні узьӧм. Пӧльыштіс Тимопей дудкасӧ да наперво ставсӧ бура йӧктӧдіс, а сэсся бара мӧдіс пир на весь мир.