АРСЕНЬ ДА ЧӦРТЪЯС

Важӧн ӧти сиктын чукӧртчӧмаӧсь мужичӧйяс, сёрнитӧны. Мукӧдыс шуӧны, эмӧсь пӧ повзьӧдчысьяс, мукӧдыс шуӧны, абуӧсь пӧ. А ӧти морт мырдӧн шуӧ, збыль пӧ эм. Сэні жӧ вӧлі том морт, Арсень нима. Сійӧ шуӧ, ог пӧ эскы, некод пӧ абу!

Сэсся сійӧ мӧд лун чеччис, нянь тупӧсь босьтіс, муніс вӧрӧ. Лунтыр муніс. Рыт нин лои — пемдіс. Лёк шор воис. Сэтчӧ и узьмӧдчис Арсень. Коз улӧ биасис. Сэсся коркӧ коз вылӧ чатӧртчис, аддзӧ: ув вылын пукалӧ кӧмтӧм мужик. Арсень шуӧ:

— Вай лэччы, ӧтлаын узям!

Пукалысь нинӧм оз шыась. Арсень пуртсӧ перйис, кок пыдӧссӧ мужиклысь быдсӧн кырлӧдліс. Арсень узис ӧтнас. Мӧд лун чеччис, чатӧртчис — мужик абу. Сійӧ мӧд лун бара лунтыр муніс. Ю дорӧ воис да, пемдіс. Ю дорын дзоляник керка. Пырис сэтчӧ. Пес кераліс; пач ломтіс. Лабичӧ пуксис, кутіс нянь сёйны. Няньыс сылӧн сӧмын дзоляник край. Лабич костті сылӧн и уси нянь торйыд.

— Ок, няньӧй тай уси! — шуис Арсень.

А нянь торйыс гӧбӧчӧдзыс уси, розя джоджыс вӧлӧма да. Гӧбӧчӧ пырис, а сэні горт. Горт дінӧ муніс — сэн куйлӧ старик, вом паськӧдӧма, нянь сылы вомас усьӧма. Арсень няньсӧ босьтіс. Старик шуӧ:

— Но, зонмӧ, комын во нин куйла да ӧтчыд нянь тор вомӧ усьлі, да сійӧ мырддисны. Коркӧ ме вӧлі тӧдысь, да менӧ татчӧ керӧмӧн йӧртлісны, ог вермы татысь мунны.

Арсень и юалӧ:

— Кынӧмыд ӧмӧй сюмалӧ?

— Сюмалӧ, — шуӧ старик.

Арсень няньсӧ вайис да ставсӧ сылы вердіс. Старик сылы кутіс шуны:

— Пӧгибӧ кӧ воан коркӧ, менӧ казьтышт либӧ ме дінӧ волы.

Петіс Арсень гӧбӧчысь, керкаын пондіс узьны. Сы дінӧ локтісны чӧртъяс — дасӧн. Чӧртъяс шуӧны:

— Ми тэнӧ сёям! Мыйла тӧрыт батьлысь кок пыдӧссӧ быдсӧн кырлалін!

Арсень шуӧ:

— Войдӧр гӧбӧчӧ пыравла.

Старик дінӧ пырис дай шуис:

— Чӧртъяс локтісны менӧ сёйны.

— Энлы, ме петавла на дінӧ, — шуӧ старик.

Старик петіс чӧртъяс дінӧ, шуӧ налы:

— Локтӧ жӧ, сёйӧ менӧ!

Чӧртъяс кутісны матыстчыны Арсень дінӧ, старик ставнысӧ кутіс биӧн пӧлявны. Чӧртъяс пышйисны. Старик бӧр гӧбӧчӧ пырис, Арсеньлы шуис:

— Тэ сэсся узь!

Арсень узис. Мӧд лун югдіс, бара водзӧ мунны пондіс. Воис сиктӧ. А сэні сулалӧ зэв бур ыджыд гажа керка. Сэтчӧ кутіс чуксасьны. Сылы некод оз восьты. Орччӧн сулалӧ важ керка, ыджыд жӧ, сэтчӧ чуксасис, дай лэдзисны.

— Этатчӧ короминаас, чуксаси да, эз лэдзны, — висьталӧ Арсень.

— Сэні ӧд некод абу, — шуӧ кӧзяин. — Сійӧ керкаыс эськӧ миян жӧ, да чӧртъяс овнысӧ оз лэдзны.

— Час, аски ме сэтӧн узя, — шуӧ Арсень, — сӧмын вӧч меным кӧрт мортӧс, мӧлӧт, кӧрт ки, кӧрт кынӧм да кӧрт шапка. Сэсся нӧшта меным ковмас кузь чышъян, четверть вина, карті колода да сись.

Мӧд лун петіс Арсень узьны выль керкаӧ. Пызан вылӧ пуктіс вина, сись, карті колода. Кӧрт мортӧс сувтӧдіс пач водзӧ, кӧрт шапка пуктіс юрас, кӧрт кынӧм — морӧсас, кӧрт ки — киас. Карті кутіс тасуйтны. Локтіс чӧрт.

— Ме тэнӧ сёя! Мыйла кокъясӧс кырлӧдлін!

— Мый тэныд бурыс менӧ сёйӧмысь, лок вина юам!

Юисны. Чӧрт коддзис.

— Вай картіӧн ворсам!

Чӧрт шуӧ:

— Мыйӧн скон?

Арсень шуӧ:

— Менам ӧд сьӧмыд абу, вай дуракысь ворсам. Кодным дуракнас лоам — кынӧм кучик гыжйыштны.

Заводитісны найӧ ворсны куимысь гыжйыштӧмысь. Арсень лои дурак. Арсеньлысь чӧрт кынӧмсӧ чабыртіс, шаркнитіс-кульыштіс кӧрт кынӧм и шыбитіс.

— Кынӧм кучикыд эз коль! — шуӧ чӧрт.

— Ещӧ ёнджык на колис! — шуӧ Арсень. — Вай мӧд скон ворсам.

Заводитісны мӧд скон. Чӧрт лои дурак.

— Вай, бара, тэнсьыд гыжйышта!

Арсень кӧрт киӧн сылысь кынӧм кучик гыжйыштіс — чӧртлӧн кынӧм кучик поті. Куимысь гыжйыштіс — быдсӧн сылысь кынӧм кучик косявліс да сювсӧ орйӧдліс.

— Ещӧ ӧти пӧв ворсам, — шуӧ Арсень.

Чӧрт шуис:

— Сэсся ог нин: кынӧмӧй висьӧ.

Чӧрт мунны мӧдӧдчис. Арсень юалӧ:

— Сэсся волан он?

— Аски вола, — шуӧ чӧрт.

Арсень лӧсьыда узис. Кӧзяин мӧд лун корис Арсеньӧс чай юны. Найӧ лунйисны. Нинӧм некод оз юась Арсеньлысь. Воис рыт. Арсень шуӧ:

— Вай ещӧ четверть вина!

Босьтіс четверть вина, сись, петіс бара выль керкаӧ узьны. Рытнас бара локтіс чӧрт:

— Ме тэнӧ сёя!

Арсень шуис:

— Лок вина юам, бурджык лоӧ!

Найӧ юисны да коддзисны. Чӧрт шуӧ:

— Вай дураксьыд бара ворсам, кынӧмтӧ гыжйыштӧмсьыд.

Арсень шуӧ:

— Тӧрыт быдсӧн сювтӧ орйӧдлі да талун гырк пытшкӧсыд орӧ, вай лучшӧ печикысь ворсам.

Найӧ заводитісны ворсны печикысь. Арсень лои дурак. Арсеньлӧн юрас кӧрт шапка. Чӧрт сэтчӧ куимысь печиктас. Медбӧръя печиктігас пыркнитас юрысь шапка и сійӧ уси. Чӧрт шуӧ:

— Юр лыыд тай уси жӧ!

— Вемыс ещӧ коли на, тайӧ кышыс на уси. Вай мӧдысь ворсам.

Найӧ ворсісны мӧдысь. Чӧрт лои дурак. Арсень шуӧ:

— Кодӧс ме печиктывлі, сылӧн синмыс петавліс. Вай, колӧкӧ, кузь чышъянӧн кӧрталам.

Чӧртлысь кузь чышъянӧн син кӧрталіс. Босьтіс мӧлӧт. Чӧртлы куимысь плешас вартіс. Чӧртлӧн плешыс весиг потіс.

— Вай ещӧ ворсам, — шуӧ Арсень.

— Огӧй, — чӧрт шуӧ, — юрӧ висьӧ, сэсся муна.

— Сэсся волан он? — юалӧ Арсень.

— Аски унаӧн волам, — чӧрт шуӧ.

Арсень узис. Мӧд лун кӧзяин корис чай юны. Найӧ лунйисны. Воис рыт. Арсень шуӧ:

— Вай куим четверть вина.

Вина босьтіс, петіс узьны. Локтісны чӧртъяс дасӧн.

— Ми тэнӧ сёям, батьӧлысь плешсӧ жугӧдін да.

— Мый бурыс менӧ сёйӧмысь? Локтӧ вина юамӧй.

Найӧ юисны. Чӧртпиян коддзисны да усины. Арсень бара дуракысь ворсны пуксис ыджыд чӧрткӧд. Шуисны, код пӧ дуракӧ кольӧ, пӧльӧлы вомас чуньӧн гудравны. Арсень лои дурак. Пӧльӧ дінӧ муніс, вомас чунь сюйис, ёна кутіс гудравны. Чӧрт ёна сералӧ.

— Вай мӧдысь!

Чӧрт лои дурак.

— Вай сэсся тэ гудрав! — шуӧ Арсень.

Сійӧ кӧрт пӧльӧлы вомас сюйис ки, кутіс гудравны. Арсень юр пыдӧссяньыс винтӧн топӧдіс китӧ, кӧрт морт курччис. Чӧрт кутіс горзыны:

— Ой, ой, сёйис, сёйис!

Пиян быдсӧн повзисны, чеччисны. Чӧрт горзӧ ёна повзьӧмӧн, шуӧ:

— Вай тшӧкты лэдзны!

Арсень шуӧ:

— Пӧльӧ, лэдз!

Ачыс мый вермӧ пыр зэлӧдӧ. Чӧртпиян быдсӧн кӧсйӧны пышйыны. А чӧрт ёна горзӧ. Арсень шуӧ:

— Оз лэдз сьӧмтӧг.

— Уна-ӧ корӧ?

— Морт ӧти нопйӧн корӧ, ӧкмыс ноп зарни.

Чӧртпиян ветлісны, ӧкмыс ноп зарни вайисны, джодж шӧрӧ кисьтісны. Арсень шуӧ:

— Пӧльӧ ещӧ кӧсйӧма ставнытӧ сёйны.

Найӧ ещӧ ёна повзисны сёйӧмысь.

— Лэдзас кӧ да оз сёй, эськӧ воланныд он тайӧ керкаас?

— Сэсся бара ог!

Арсень лэдзис. Найӧ горӧдісны и пышйисны. Эз сэсся кӧсйыны волыны. Арсень лӧсьыда узис. Мӧд лун кӧзяинсянь локтіс казак чай юны корны.

— Кӧзяин мед ачыс локтас дай туй вылысь кодӧс аддзас, мед тшӧтш вайӧдас, — шуӧ Арсень.

Сэсся локтіс сэтчӧ кӧзяин, мужикъясӧс тшӧтш вайӧдіс.

— Вайӧ китырӧн босьтӧ зарни деньгасӧ, а мый кольӧ — кӧзяинлы ставыс! — тшӧктіс Арсень.

Сэсся овмӧдчисны выль керкаӧ. Кӧзяинлӧн вӧлі зэв мича ныв, сійӧ шуӧ:

— Тайӧ нывсӧ менсьым вай!

— Часлы, войдӧр повзьӧм корсьны ветла, повзя кӧ, сэк вая нывтӧ, — шуӧ Арсень.

Мӧд лун сійӧ босьтіс нянь тупӧсь, би, чер и муніс вӧрӧ. Ветліс лунтыр, дай пемді. Аддзис дзоляник вӧралан керка, сэтчӧ сійӧ и узьмӧдчис. Кодкӧ войнас друг кутіс йирксӧ косявны. Арсень горӧдіс:

— Код сэні?

Шыасис ош, ме пӧ тэнӧ кӧсъя сёйны.

— Тэ сэсянь менӧ он сёй, тэ керкасӧ лэптышт да сэті пыр, сэк менӧ сёян.

Ош лэччис керка вылысь, кутіс мусянь гудйысьӧмӧн пырны. Гудйысис, гудйысис да юрсӧ керкаӧ мыччис. Арсень юрас керыштіс чернас — ош сэтчӧ кулі. Кучиксӧ кулис, кӧзяинлы лэччӧдіс. Кӧзяинлы зэв нимкодь лои ош кучик вайӧм вылӧ:

— Вай гӧтрась! — сійӧ шуӧ Арсеньлы.

— Эг на повзьы да, ог на гӧтрась!

Кӧзяин думайтӧ, кыдзи эськӧ тайӧс повзьӧдны. Сійӧ вӧчис зэв ыджыд вор и крӧвать. Крӧватьсӧ вӧчис дзирйӧн, мед мыйӧн водас — усьӧ. Сэсся крӧвать улас сюйис вор, а воръяс тырыс тэчис сӧніка ва. Найӧ сёйисны-юисны, и кӧзяин шуӧ:

— Татчӧ крӧватяс вод да шойччышт.

Арсень коркӧ уськӧдчис крӧватьӧ, сэсянь сӧніка ваӧ уси, пондіс горзыны:

— Ой, пӧді, пӧді, пӧді!

Кӧзяин юалӧ:

— Повзин ӧмӧй?

— Ёна повзи, — шуӧ Арсень. — Вот сэсся и гӧтрася.

Кӧзяинлысь нывсӧ вайис, да найӧ ёна пируйтісны-свадьбуйтісны, ёна бура кутісны овны.