ОЛӦМА-ВЫЛӦМА КРЕСТЬЯНИН

Олӧма-вылӧма крестьянин. Крестьянинлӧн вӧлӧма сӧмын гӧтыр, толькӧ кыкӧн олӧны. Ӧтчыд мунас мужик вуграсьны, вугыръястӧ чӧвтас юӧ. И сылӧн ёна кутас горш косьмыны. Сійӧ писькӧдас юкмӧс, пондас васӧ юны, сійӧс и кутас васа бесыс.

— Лэдз менӧ! — пондас горзыны мужичӧйыд.

— Ог лэдз! Мый тэнад эм гортад, сійӧс кӧ сетан, лэдза, он сет — ог лэдз!

— Немтор менам абу: вӧлӧ чань эз вай, мӧскӧ кукань эз вай. Но ладнӧ, лэдз, сета, мый эм, сійӧс и босьт.

Локтӧ гортас. А гӧтырлӧн чужӧма кык кага: ӧтиыс нывка, мӧдыс зонка. Сэтшӧм мичаӧсь, батьыс помтӧг радуйтчӧ. Но мый вӧчан, кытчӧ воштысян, раз беслы кӧсйӧма?! Быть ковмас сетны. Челядь кутісны туны-быдмыны, оз лунӧн, а часӧн быдмӧны — и нылыс, и зонмыс. Айыслы эськӧ и жаль, оз кӧсйы висьтавны, мый найӧс беслы кӧсйӧма. Но коркӧ-некоркӧ и висьталас батьыс:

— Вот, — шуас, — сідз и сідз, менам тіянтӧ лои кӧсйысьӧма беслы. Вайӧ, — шуас, — кытчӧкӧ пышйӧ гортысь. Он кӧ, — шуас, — воас да тіянтӧ босьтас.

Но ладнӧ. Раз тадзи, колӧ мунны. Кутасны мӧдӧдчыны. Батьыс сетас налы кӧрт бедь, зу и лэчтан:

— Мунӧ, — шуас, — а тайӧ туяныд ковмылас.

Но ладнӧ. Чоя-вока сэсся и мунісны. Кытчӧ мунӧны, асьныс оз тӧдны. Мунісны, мунісны, мунісны. А бесыс и локтіс, батьыс ордӧ воис.

— Кытчӧ, — шуас, — тэ воштін йылӧмтӧ? Тэнад договоренносьт вӧлі, и колӧ меным сетны найӧс!

— Мун нин, — шуас, — мун, кысь корсян — корсь, а ме ӧні ог тӧд, кытчӧ найӧ мунісны.

Но вот, сійӧ бӧрсяньыс кутас вӧтчыны, бесыс. Кылӧны тайӧ чоя-вокаыд, бӧраныс ыджыд шум кутіс лыбны. И вокыс чойыслы шуас:

— Вай, — шуас, — шыбит зутӧ.

Кыдзи тай шыбитасны зутӧ — сэтшӧм пемыд вӧр бӧрладораныс лоӧ, весиг джыдж оз вермы писькӧдчыны. Бесыд пондас пӧрлӧдлыны пуяссӧ, нечистӧй дукыд, нечистӧй дук — сійӧ нечистӧй дук и эм. Бесыд коркӧ-некоркӧ пӧрӧдлас пуяссӧ и писькӧдчас всё равно. А найӧ пышйӧны век. Пышйӧны, пышйӧны, пышйӧны. Тайӧ бара пондас суны. Сійӧ (нылыд) и лэчтантӧ шыбитас. Сэтшӧм лоӧ из гӧра, некытчӧ он вермы кайны. Сійӧ бесыд всё равно писькӧдас туй. И бара пондас суӧдны. Сэсся и некытчӧ нин пышйыны.

— Миян на ӧд кӧрт бедь эм, сійӧс шыбитам.

Кӧрт бедь шыбитісны — сэтшӧм ю лоӧ, весиг биӧн сотчӧ. И бесыд сійӧ юсӧ вуджны оз вермы сэсся, кольӧ.

Чоя-вокаыд неылӧ муныштісны, а сэні сулалӧ келля, дзоляник келля. Пырисны, а сэтӧн старик куйлӧ. Зэв ыджыд, нырыс йиркас тшукӧ, льӧбйыс порог улӧдзыс ӧшӧдчӧма. Найӧ здоровайтчисны.

— А локтӧ, локтӧ, небывалӧй гӧсьтъяс кыськӧ усины!

— Да, — шуас, — усим тай, дедӧ.

Сэсся сійӧ, вокыд, ставсӧ висьталас, кыдзи делӧыс. И старик шуас:

— Но, — шуас, — давайте татӧн пондад овны, ме дінам. Некытчӧ, — шуас, — ме тіянтӧ ог лэдз. Ме, — шуас, — ӧдйӧ нин кула, став эмбурыс тіянлы кольӧ.

Но ладнӧ. Сэсся старикыд пондас петкӧдлыны ассьыс вӧр-васӧ. Чой сійӧ месанитӧ, пуӧ-пӧжалӧ, понъястӧ вердӧ и. А найӧ ветлӧны, ветлӧны вӧр-ваӧд. Ӧтчыд сэсся пӧльыд и шуас:

— Да, пиӧ, сэсся ме эшті, ог вермы сэсся, навернӧ, и кула!

Коркӧ-некоркӧ, дыр ли, недыр ли, старикыд и кулі. Найӧ чоя-вока колины. Но ладнӧ. Ныв пыр ӧтнас гортын, да сылы и гажтӧм овнысӧ. Коркӧ и воис сэтчӧ ю дорад этайӧ бесыд, коді тай айыслысь челядьсӧ корис. Пӧртчӧма сэтшӧм добрӧй молодечӧ, весиг он гӧгӧрво, мый сійӧ нечистӧй дук. И ю дорас пуксьӧма и гармоньӧн ворсӧ, зэв нора ворсӧ. И нылыслы тшӧктӧ вуджӧдны:

— Вуджӧд, — шуас, — менӧ, Белаӧ, ме тэд, — шуас, — ковмыла на.

— Ог, — шуас, — вокӧ мем эз тшӧкты, ог вуджӧд.

Но, сійӧ ӧти лун волас, мӧд лун волас, тайӧ добрӧй молодечыд, — оз вуджӧд.

Но бӧрыннас сійӧс всё равно ылӧдлас:

— Павкнит, — шуас, — ки чышкӧдтӧ ю вылас, сы кузя сэки ме и вуджа.

Но, сійӧ вуджас нылыс дінӧ. Вуджас, дай найӧ и договоритчасны, нылыдкӧд.

— Вот давай, кыдзкӧ колӧ миянлы мездысьны воксьыд, вины. Виам, да миян сэсся спокой лоӧ!

— А кыдзи виам?

Вот найӧ пондасны план лӧсьӧдны.

— Вай, — шуас, — тэ висьӧмӧ уськӧдчы, вод да сэсся тэ сійӧс ысты ош дінӧ йӧвла, медым йӧвнас бурдӧдчыны.

Но ладнӧ. Вок воас, а сылӧн, дерт, кык пон, старикыс сылы кольліс, воас, и сэн труба, да прамӧя пондасны понъясыд трубасӧ чашйыны толькӧ. Сійӧ вокыс локтігкежлӧ бесыд сійӧ лэччас трубаас, пырас, медым оз аддзы сійӧс вокыд. Сідзи пондасны чашйыны трубасӧ понъясыд. Вокыд шуӧ:

— Эн, — шуас, — дурӧ, трубасӧ пондінныд пурны.

Сійӧ лачкас найӧс ёна, понъяссӧ. Сэсся пырас, а чой висьӧ:

— Мый нӧ лои, чойӧ?

— Да, — шуас, — сідз, Иван, лои, висьӧм босьтіс. Аски кӧ, — шуас, — ветлін да ошлысь кӧ йӧвсӧ вайин, ме эськӧ, гашкӧ, сійӧн бурді.

— Ладнӧ, — шуӧ, — мый нӧ ог ветлы, ветла, вая.

Асывнас кӧмасяс, пасьтасяс и мӧдӧдчас. Мунӧ, и ошкыд сылы паныд локтӧ. Толькӧ кӧсъяс пищальсӧ лэптыны, а сылы и горӧдчас ошкыд:

— Энлы, энлы, — шуас, — молодеч! Тӧда ӧд, мыйысь тэ страдайтан. Сетам, — шуас, — тэд йӧв дай пиӧс на сета ёрт вылӧ.

Но, сылы йӧв сетасны и ошпи на сетасны. Локтӧ. Чойӧс йӧлӧн вердас. Чой оз бурд. А сэк кості нин бесыд бара волӧма да шуӧма, оз кӧ пӧ сійӧс ошкыд ви, кӧин дорӧ аски ысты, кӧиныд ӧні ёна скӧр да орйӧдлас сійӧс.

Но ладнӧ. Аски сійӧс и кӧин дорӧ бара жӧ йӧвла ыстас. Мунӧ. Сідзи жӧ сылы кӧин йӧв сетас, писӧ сетас. И локтӧ бара чойыс дінӧ. Чой мыйкӧ век оз бурд. Сэсся сійӧ ыстіс лев дорӧ. Бара жӧ йӧвла. И бара ваяс левлысь и писӧ бара жӧ вайӧдас. Сэсся сійӧ сідзи жӧ ветлас сюзь дорӧ. Сюзьлысь ваяс йӧв. Сюзь бара жӧ писӧ сетас. Сэсся кутшлысь ваяс писӧ да йӧвсӧ.

А сэк кості бесыс бара договоритчас чойыскӧд, бесыс шуас:

— Вай тэ лучшӧ ысты воктӧ мельничаӧ бусла.

Сылӧн, старикыслӧн, вӧлӧма сэні мельнича. Ставыс сылӧн вӧлӧма: амбар, мельнича — зэв озыр старик вӧлӧма.

— Мельничаас, — шуӧ, — ысты воктӧ, да сэтчӧ толькӧ ми вермам сиптыны зверъястӧ да вины воктӧ, а сэсся некыдзи ог вермӧ.

Но ладнӧ. Вок воас, чой бурдӧма. Сылы нин лӧсьӧдӧма сёян-юан, пӧжасьӧма и быдсӧн. Шуӧ:

— Тэ менӧ, вокӧ, бурдӧдін, тайӧ тэныд!

А вокыслы и нӧшта на бур, мый чойыс бурдӧма, кутас сылы локтігкежлӧ лӧсьӧдны и дасьтыны, ставыс мед гӧтов вӧлі. Сійӧ ӧд лун и вой ветлӧ-вӧралӧ.

— Босьт, — шуӧ чойыс, — мешӧкъястӧ и мун мельничаӧ да тэч сэні буссӧ, чышкышт буссӧ, тэч мешӧкъясас да вай — зверъястӧ кутам сійӧн вердны.

И Иваныд мунӧ. Мунӧ, а зверъясыд тшӧтш. Тайӧ бус вылад найӧ зэв окочӧсь, понъяс бара жӧ сійӧн чӧсмасьны радейтӧны. И найӧ пондасны сэні нювны буссӧ. Сэсся Иван тэчас дай ӧти мешӧк петкӧдас, мӧдсӧ кӧсъяс на петкӧдны, петас, а ӧдзӧсыс пӧдлассьӧма. Зверъясыс сылӧн пытшкас кольӧны.

Сэсся нӧ мый? Вок тожӧ повзис: «Мый тайӧ лои? Татшӧм чудесаыс тай эз на вӧвлы?!» Вок гортас локтӧ. А найӧ нин пукалӧны, бесыс да чойыс орчча.

— Но, ӧні, — шуас, — Иван, сюрин тэ миян! Виам тэнӧ ми татчӧ! Пырт, — шуас, — плака и чер — юртӧ керала!

— Но мый, сідз кӧ, кералӧ!

Петас Иван плакала да черла. А сэтчӧ бадь йылӧ пуксьӧма кай да чивгӧ:

— Иван, кор вит минут, прӧщайтчыны вӧльнӧй светыскӧд.

Но ладнӧ. Сійӧ пырас, плака да чер пыртас и шуӧ:

— Вайӧ, — шуас, — меным вит минут, прӧщайтчыны вӧльнӧй светыскӧд.

— А босьт, — шуас, — кӧть дас минут, меным абу жаль. Мун прӧщайтчы.

Сылӧн дас минут кольӧ, мый сетлісны, и пырас.

— Но, — шуас, — ӧні юртӧ пукты плака вылас.

— А вайлӧ, — шуас, — меным нӧшта вит минут, овмӧссӧ бӧръяысь видла, прӧщайтча.

— Но, босьт вит минут, прӧщайтчы, тэ ӧні миян дорысь некытчӧ жӧ нин он мун-а, зверъясыд тэнад томналӧмаӧсь-а!

А зверъясыд нин мусӧ кодйӧны мельнича улӧдыс, медым петны, казялӧмаӧсь, мый кӧзяинкӧд неладнӧ мыйкӧ. Толькӧ петӧ Иван, а зверъясыд нин локтӧны-поиктӧны, прамӧя нёльпод локтӧны. Воисны да тайӧ бестӧ дзикӧдз орйӧдлісны да чашйӧдлісны.

Сэсся вокыс босьтіс да чойсӧ сюръя бердӧ домаліс гезйӧн, керкасӧ ӧзтіс, би тшукӧдіс дай муніс ачыс путешествуйтны. Дыр ли, недыр ли сійӧ муніс — ни сикт, ни кар сійӧ эз аддзывлы. Коркӧ-некоркӧ сійӧ петіс кар вылӧ. Карӧ воис, а карас гӧгӧр сьӧд ной ӧшалӧ. Мый лоӧма карас, оз тӧд. Сійӧ медся кар помас пырис ӧти баб ордӧ. Баб сійӧс лэдзис, бабыс ӧтнас олӧма да.

— Лок, лок, — шуӧ, — добрӧй молодеч, меным гажаджык лоас!

— Но а менам ӧд зверъяс, да кытчӧ найӧс меститны?

— Немтор!

Зверъясӧс йӧртісны. Пырис и пондіс баблысь юасьны:

— Мый нӧ, бабӧ, тіян карныдтӧ сьӧд нойӧн кышӧма? Пемыд караныд.

— Да, — шуас, — пиӧ, сэтшӧм беда суис: миян сарыслысь медся ичӧт нывсӧ, красавичасӧ, дас кык юра змей корӧма сёйӧм вылӧ.

А Иван нинӧм оз и шу, асьсӧ оз петкӧдлы, мый сійӧ ён да смел, водас узьны. Но ладнӧ. Войсӧ сійӧ узяс бабыс ордын, да бабыслы и нарадитас:

— Вот, — шуас — бабӧ, ме со сатшка этатчӧ пӧлать сёръяс пурт, кор этатысь пуртсьыс кутас петны вир, сэки тэ лэдз зверъяссӧ.

— Но, но! — шуас.

Сэсся мӧдысь на казьтыштас:

— Смотри, лэдз!

— Лэдза, лэдза, эн шогсьы, пиӧ!

Сэсся Иваныд мунӧ сэтчӧ, море дорад, а сэні келля, келляас нылыд нин пукалӧ и бӧрдӧ. Пырас Иваныд, шуас:

— Мый нӧ бӧрдан?

— А мый нӧ ог бӧрд?! Аски кежлӧ корис менӧ сёйӧм вылӧ дас кык юра змей. Некутшӧм мыж эг вӧч, а кӧсйӧ сёйны, сар-батюшколысь корис.

Но ладнӧ.

— Эн шогсьы, — шуас. — Вай менсьым юрӧс корсь, а сыкӧд ми аддзам, мый вӧчны.

Нылыд кутас юрсӧ корсьны. Иваныд унмовсяс. А моресянь шум лыбӧ — локтӧ дас кык юра змейыд. Пырас. А нылыд некыдзи оз вермы чуксавны Ивантӧ, сэтшӧм багатырскӧй унмӧн унмовсьӧма. Сэсся сійӧ босьтас булавка да пондас сьыліас чутйӧдлыны. Чутйӧдлас, чутйӧдлас дай садьмӧдас Ивантӧ. А змейыд и шуӧ:

— Бур жӧ сар-батюшко, кори ӧтиӧс, а кыкӧс мӧдӧдӧма. Но талун бура лоӧ ужнайтӧма!

Иван и шуӧ:

— Эн на ошйысь! Вай петалам кось вылӧ, кодным коднымӧс вермам. Сэсся вӧлисти сёй!

— А мый, — шуас, — абу ошйысьны, дерт, ме тіянтӧ кыкнаныдтӧ сёя!

Иваныд и шуӧ:

— Вай первой жеребей чӧвтам, кодлы медводдзаӧн шучкыны.

Вот жеребей чӧвтісны. Жеребейыд уси Иванлы, Иванлы первой шучкыны змейыдлы. Петісны поле вылӧ, пондісны косясьны. Иван шучкис, а толькӧ куим юр ори. Сэсся змейыд шучкас Иванлы — Иваныд пидзӧсӧдз вӧйӧ.

— Ладнӧ, — шуӧ Иван. — Вайлы вит минут шойччам.

Вит минут сетас шойччӧг. Сэк кості Иваныд перъяс кокъяссӧ. Сэсся бара шучкас — квайт юр орӧ змейыдлӧн. Змейыдлы бара немтор оз ло. Сійӧ шучкас Иваныдлы. Иваныдлы шучкас — сійӧ сітанӧдзыд вӧйӧ.

— Ладнӧ, — шуас. — Вайлы вит минут шойччӧг.

Вит минут сетас. Сэк кості Иван бара мездысяс. Сэсся шучкас — толькӧ кык юр орӧ. Слабмис сэсся Иваныд.

А баб чеччас — пӧлатьыс вирӧн тырӧма.

— Фу, фу, — шуӧ, — кудзавсьӧма тай талун!

А сэні нин ойдӧма пӧлатьыс вирнас. Сійӧ эськӧ Иваныд нарадитіс зверъясӧс лэдзны, кор вирыс кутас пуртсьыс петны, а сійӧ вунӧдӧма, бабыд. А зверъяс грӧмитӧны, оз вермыны некыдзи петны. Сэсся баб кылас да ӧдйӧджык лэдзас зверъяссӧ. Зверъяс зырӧдасны, весиг бабтӧ таляласны. Мунӧны да, змейӧс босьтасны да орйӧдласны разі-пели. Иван нывтӧ босьтас да найӧ мӧдӧдчасны сарыс дорӧ. А сар сійӧ нин рад, мый сэтшӧм смел морт локтӧма да сылысь нывсӧ дорйӧма. Шуӧ:

— Пыр жӧ вай свадьба керам да кольччы миянӧ овны!

Но, Иван эз кут пыксьыны: кытӧнкӧ ӧд быть колӧ овны. Ладнӧ. Сэні свадьбуйтісны-пируйтісны вежон-мӧд и пондісны овны. А эсійӧ чойыслы век вӧлі вокыс мӧдӧдӧ зверъясыскӧд сёянсӧ: нянь да, преник да, кампет да — век новлісны домӧм чой дінас, вердісны сійӧс. И ӧтчыд Иван и юалас сарыдлысь, чой пӧ эм да позьӧ оз вайӧдны сійӧс татчӧ.

— А мый нӧ, — шуас, — озыс, татшӧм миян бур кар, да тэ кӧть став семьятӧ вайӧд, кӧть мамтӧ, кӧть айтӧ. Вайӧд, вайӧд!

Сійӧ ыстылас зверъястӧ. Найӧ разясны гезсӧ. А разигкостіыс чойыс босьтас бесыслысь пиньсӧ. Сотіс, видзӧд, Иваныд бессӧ, а пиньыд кольӧма. Но, нылыд босьтіс пиньсӧ и зептас пуктіс. Но и локтӧ сэтчӧ, сарыд ордӧ.

Сэсся, дыр ли, недыр ли сэні олӧны, гашкӧ, тӧлысь, гашкӧ, кык, сылӧн, чойыдлӧн, век дум вылас эськӧ водзӧс перйыны вокыслысь, вины сійӧс. Кӧть кыдзи, а колӧ вины. Медым эз ло сійӧ. Вот ӧтчыд сійӧ пырис спальняас, чойыс, войын дай лэдзис пеляс Иванлы бес пиньсӧ. Асыв сувтісны — вок кулӧма. Сэсся сарыд и юалӧ чойыслысь:

— Кытчӧ, — шуас, — тшӧктіс дзебны вокыд, кутшӧм местаӧ?

— А вот, — шуас, — менам вок век шулывліс, мый сійӧс колӧ нуны море шӧрас, нёль кӧрт сюръя сувтӧдны да горт вӧчны, да сэтчӧ сюръяяс вылас ӧшӧдны, пуктыны сэтчӧ. А зверъяссӧ некытчӧ эз тшӧкты лэдзны, а дас кык томан сайӧ томнавны. Вот, — шуас, — сійӧ сэтшӧм мен наказ кольліс.

Ладнӧ. Сар тадзи и вӧчис: дас кык томан сайӧ томналіс зверъяссӧ, горт вӧчисны, мореӧ нуисны, сюръяяс вылӧ пуктісны. И чойыс тані жӧ, сар дорын кутіс овны. Воксӧ виис. А зверъяс сэсся эз пондыны сёйны некутшӧм сёян. Кутшӧм нин сёянӧн оз верд сарыд, оз сёйны. Толькӧ нин лыыс да куыс коли зверъясыдлӧн. Сэсся сарыд ӧтчыд думайтӧ: «Лэдзла жӧ ме найӧс вӧльнӧй воздук вылас, оз-ӧ бурджыка кутны сёйны». Лэдзас. Лэдзас да, зверъясыд сідзи йӧткасны сартӧ, сійӧ усьӧ. Пыр жӧ котӧртасны море дорӧ. Мунӧны море дорӧ и колӧ корсьны, кӧні сійӧ дзебӧма, кӧні кӧзяинныс. Первой ыстасны сюзьӧс. Сюзь ветлас, оз аддзы. Сэсся кутш лэбӧ. Кутшыд всё-таки аддзас:

— Вот, — шуас, — сэн и сэн миян кӧзяинным, кыдзкӧ колӧ берегӧ кыскыны.

Но и мунасны ставныс: ош, лев, кӧин, понъяс. Кутш, сійӧ водзын мунӧ, ныр кутӧ. Воасны. Ош вылӧ пуктасны горт, мукӧдыс бокъясӧдыс кутӧны. Берег дорӧдзыс вайӧдасны. Берегӧ воасны, колӧ пазӧдны кӧрт горт. Ош сэсся пазӧдас, жулляс быдӧн. Горт жугӧдасны, сэсь кыпӧдасны Иванӧс. Сэсся колӧ кыдзикӧ перйыны беслысь пиньсӧ пельсьыс. Кывъясныс ӧтилӧн кыз, мӧдлӧн дженьыд. И лев шуас:

— Нолӧ, лэдзлӧ, ме, — шуас, — ог-ӧ вермы перйынысӧ. А левлӧн кылыд, видзӧд, кузь.

Винтитас пеляс кывсӧ и перъяс. Сэсся сьӧвзяс, и кӧзяин пыр жӧ ловзяс. Ловзис и пыр жӧ тӧдмаліс, мый тадзи сыкӧд вӧчис чойыс. Зверъяслы любӧыс. Иван да зверъяс мӧдӧдчасны сар дорӧ. Гӧнитӧны, но быттьӧ дурмӧмъяс. Сарыд быдӧн повзяс: мый пӧ тайӧ лоӧма, некор эз вӧвлы татшӧмыд, мед тадзи котӧртісны миян зверъяс? Петӧ-а, сэні савана морт локтӧ. Ивантӧ саванӧн дзеблісны, еджыд саванӧн. Зятьыс локтӧ. Любӧыс лои сарлы.

Но ладнӧ. Воас Иван. Чойсӧ босьтас да карасинӧн киськалас дай ӧзтас. Сотас сійӧс, чойсӧ, бырӧдас. Дай ӧні на, буракӧ, олӧны-вылӧны гозйӧн. И зэв бура.