СТРӦЙ ГОЗЪЯ

Олӧмаӧсь-вылӧмаӧсь стрӧй гозъя. Стрӧй пондас тшупны шы, а гӧтырыс блин кисьтӧ. Бабыд кисьтас, кисьтас блинсӧ, дай блин сылӧн кисьтыссяс. Кисьтыссяс, дай горӧдас:

— Стрӧйӧ, стрӧйӧ, шыыд тшупсис-ӧ?

— Тшупсис, тшупсис! А тэнад, старука, блиныд эштіс-ӧ?

— Эштіс!

— Но, эштіс кӧ, сідзкӧ, вай сёям!

— Час жӧ, ме петала ывлаӧ, кӧсъя видзӧдлыны.

Баб петӧ ывлаӧ, вильдас, усьӧ и кулӧ. Стрӧй кутас бӧрдны. Бӧрдас, бӧрдас, бӧрдас да: «Час, — шуӧ, — ветла бӧрдӧдчысьӧс корсьны». Телегаӧ вӧв доддялас, телега вылӧ шердын пуктас, чаг пуктас. Мӧдӧдчас бӧрдӧдчысьясӧс корсьны.

Гӧнитас, гӧнитас, гӧнитас, дай сылы и тэсӧ кӧч:

— Стрӧйӧ, стрӧйӧ, кытчӧ нӧ мӧдін?

— Мӧді ме бӧрдӧдчысьясӧс корсьны, бабным кулі да. А тэ кужан-ӧ бӧрдӧдны?

— Кужа.

— Но, сідзкӧ, бӧрдӧдышт!

— Пи-пи-пи-пи-пи, пи-пи-пи-пи-пи! — бӧрдӧ.

— Но, кужан, кужан. Пуксьы.

Водзӧ мунасны. Гӧнитасны, гӧнитасны, и ещӧ воча воас кӧин:

— Кытчӧ нӧ ті мӧдінныд кыкӧн?

— Мӧдім бӧрдӧдчысьясӧс корсьны, бабным кулі да. А тэ кужан-ӧ бӧрдӧдны?

— Кужа.

— Но, сідзкӧ, бӧрдӧдышт!

— Тюль-тюллю, тюль-тюллю, тюль-тюллю, тюль-тюллю!

— Кужан, кужан, пуксьы.

Куимӧн нин найӧ лоисны. Муніныс, муніныс, гӧнитісны, гӧнитісны, дай налы тэсӧ лягӧй:

— Кытчӧ нӧ ті мӧдінныд?

— Ми мӧдім бӧрдӧдчысьясӧс корсьны, бабным кулі да. А тэ кужан-ӧ бӧрдӧдны?

— Кужа.

— Но, сідзкӧ, бӧрдӧдышт!

— Ква-ква-ква-ква-ква, ква-ква-ква-ква-ква! — бӧрдӧ.

— Кужан, кужан, пуксьы.

Сэсся и лягӧй пуксяс. Нӧшта водзӧ мунӧны, мунӧны, мунӧны, да сэсся и руч тэсӧ. Руч и мудер.

— Кужан-ӧ тэ бӧрдӧдны? — юалас стрӧй.

— Кужа.

— А кыдзи тэ бӧрдан, нолы петкӧдлы?

— А ме тіян ог висьтав, кыдзи бӧрда. Верданныд-уданныд кӧ менӧ, висьтала. Он кӧ вердӧ-удӧ, ӧбӧдня дырйи вердасны.

— Вай, тэ он куж бӧрдӧдныд! — ручӧс оз и босьтны.

Сэсся гӧнитасны, гӧнитасны, гӧнитасны, мунӧны, мунӧны, мунӧны, и налы ош воча лоӧ. Ош, тэсӧ да, шуас:

— Ті нӧ кытчӧ мунанныд, та мындаӧн сӧвтчӧмныд да?

— Ми мӧдім бӧрдӧдчысьясӧс корсьны, бабным кулі да. А тэ кужан-ӧ бӧрдӧдны?

— Кужа.

— Но, сідзкӧ, бӧрдӧдышт.

— Ума-ама, ума-ама, ума-ама!

— Но кужан, кужан. Пуксьы!

Ош пуксяс телегаӧ. Телега чаж чегӧ, дай гатшмоз ставыс усьӧны. Вӧвныс гӧнитас. И ставыс кытчӧсюрӧ разалӧны, гортаныс оз и воны. Всё.