РУЧ ДА СЁКЫР

Важӧн олісны-вылісны руч да сёкыр ӧтлаын. Кор няньыс быри, найӧ пуд вӧчисны, кодсӧ начкыны. Пуд уси сёкырӧс начкыны. Сёкыр шуӧ:

— Менӧ начкыны колӧ пан пурт.

Руч мунӧ пан ордӧ:

— Пананӧй, пананӧй, вай тэ пурттӧ, сёкырӧс начкыны, менӧ, ручӧс, вердны.

Пан шуӧ:

— Менам пурт ныж, колӧ ен зуд.

Руч мунӧ ен дінӧ:

— Енмӧй, енмӧй, вай тэ зудтӧ, пан пурт кеслыны, сёкырӧс начкыны, менӧ, ручӧс, вердны.

Ен шуӧ:

— Менсьым зуд кыскыны колӧ тӧлысь ӧш.

Руч мунӧ тӧлысь дінӧ:

— Тӧлысянӧй, тӧлысянӧй, вай тэ ӧштӧ, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Тӧлысь шуӧ:

— Менам ӧш оз мун шонді зонтӧг.

Руч мунӧ шонді дінӧ:

— Шондіанӧй, шондіанӧй, вай тэ зонтӧ, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Шонді шуӧ:

— Менам зон оз мун кӧч йӧвтӧг.

Руч мунӧ кӧч дінӧ:

— Кӧчанӧй, кӧчанӧй, вай тэ йӧвтӧ, шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Кӧч шуӧ:

— Менам йӧв оз пет пипу пӧдӧнчатӧг.

Руч мунӧ пипу дінӧ:

— Пипуанӧй, пипуанӧй, вай тэ пӧдӧнчатӧ, кӧч йӧв лысьтыны, шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Пипу шуӧ:

— Менам пӧдӧнча оз шед кынь пиньтӧг.

Руч мунӧ кынь дінӧ:

— Кынянӧй, кынянӧй, вай тэ мен пиньтӧ, пипу пӧдӧнча перйыны, кӧч йӧв лысьтыны, шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Кынь шуӧ:

— Менам пинь оз шед кузнеч клещитӧг.

Руч мунӧ кузнеч дінӧ:

— Кузнечанӧй, кузнечанӧй, вай тэ клещитӧ, кынь пинь перйыны, пипу пӧдӧнча керны, кӧч йӧв лысьтыны, шонді зонмӧс вердны, тӧлысь ӧш вӧтлыны, ен зуд кыскыны, пан пурт кеслыны, сёкырӧс начкыны, менӧ, ручӧс, вердны.

Кузнеч шуӧ:

— Вомтӧ паськӧд да кывтӧ нюжӧд!

Руч вом паськӧдас, кыв нюжӧдас, а кузнеч пӧсь клещиӧн ручӧс кывйӧдыс кутас да сэтчӧ и виас.