РУЧ ДА ЧОКЫР

Олісны-вылісны руч да чокыр. Дерт, вӧрын кӧнкӧ олісны. Налӧн сёйныыс нинӧм лои, тшыгъявны кутісны кыкнанныс да сёрнитӧны:

— Вай жӧ пудъясям, коднымӧскӧ начкам да ӧтиным кӧть ловйӧн колям!

Пуд вӧчисны-керисны, пудъясисны да чокырӧс начкыны пуд усис. Руч и шуӧ:

— Начкыныыд пӧ эськӧ начка, да менам ӧд пуртыд абу! Мыйӧн ме тэнӧ начка?

— Ветлы чадӧ ордӧ да кор сылысь пуртсӧ.

Муніс руч тринь-бринь, чадӧ ордӧ воис дай корӧ:

Чадӧӧй дай чадӧӧй,

Ван меным пурттӧ

Чокырӧс начкыны,

Мен, коньӧрлы, выль яй, выль яй.

А чадӧ и шуӧ:

— Сета эськӧн ме тэныд пурттӧ, да менам зэв ныж, начкыныыд он вермы. Колӧ кеслыны.

— А кеслам дай.

— Менам ӧд и зудйыд абу. Нинӧмӧн кеслыныыд.

— А кысь нӧ эськӧ зудйыс сюрас?

— Сійӧ енлӧн эм. Мун тэ ветлы ен дорӧ зудла. Корлы сылысь зудсӧ.

Тринь-бринь муніс бара кокни кока руч ен ордӧ зудла, воис дай енлы шуӧ:

Енмӧй, енмӧй,

Вай тэ меным зудтӧ

Чадӧ пурт кеслыны,

Чокырӧс начкыны,

Мен, коньӧрлы, выль яй, выль яй.

— Сета эськӧ ме и тэныд зудсӧ, да менам ӧд зэв ыджыд да тэ нуныыд он вермы.

— Кыдз нӧ эськӧ сэсся сійӧ нуныс колӧ?

— Ветлы тӧлысь ордӧ ӧшла. Сійӧ вермас, а сэсся некод оз вермы менсьым зудтӧ кыскыны.

Бара тринь-бриньмуніс зэв ӧдйӧ руч тӧлысь ордӧ. Воис да бара кевмысьӧ:

Тӧлысьӧй, тӧлысьӧй,

Вай меным ӧштӧ

Енлысь зудсӧ кыскыны,

Чадӧлысь пурт кеслыны,

Чокырӧс начкыны,

Мен, коньӧрлы, выль яй, выль яй.

А тӧлысь воча:

— Сета эськӧ ме тэныд ӧштӧ, да тэ он вермы вӧтлыныыд, менам сійӧ наян. Тэ мун ветлы шонді ордӧ зонла да кор.

Бара руч муніс тринь-бринь кокӧн шонді ордӧ зонла да кевмысьӧ:

Шондіӧй, шондіӧй,

Вай тэ меным зонтӧ

Тӧлысь ӧшкӧс вӧтлыны,

Енлысь зудсӧ кыскыны,

Чадӧ пурт кеслыны,

Чокырӧс начкыны,

Мен, коньӧрлы, выль яй, выль яй.

— Сета эськӧ ме тэныд зонтӧ, да менам ӧд талун сійӧ сёйтӧм, да оз мун. Колӧ вердны да сідзикӧн.

— А мыйӧн нӧ эськӧ сійӧс со вердан?

— Сійӧ миян кӧч йӧв юӧ. Колӧ кӧч ордӧ йӧвла ветлыны.

Бара кӧч ордӧ йӧвла, тринь-бринь, зэв кокни кокӧн мунӧ. Воис кӧч ордӧ дай шуӧ:

Кӧчӧй, кӧчӧй,

Вай тэ меным йӧвтӧ

Шонді зонмӧс юктӧдны,

Тӧлысь ӧшкӧс вӧтлыны,

Енлысь зудсӧ кыскыны,

Чадӧлысь пурт кеслыны,

Чокырӧс начкыны.

Мен, коньӧрлы, выль яй, выль яй.

— Сета эськӧ ме йӧвтӧ, да ме ӧд тшыг да менам талун йӧлыд абу. Колӧ меным сёйыштны да вӧлись сэсся менам йӧлыд лоӧ.

— Мыйӧн нӧ эськӧ колӧ тэнӧ вердыштны?

— Ветлы пипу ордӧ кырсьла. Ме пипу кырсь толькӧ сёя. Сэсся менам йӧлыд и лоас.

Бара руч муніс пипу ордӧ, воис дай кевмысьӧ:

Пипуӧй, пипуӧй,

Вай меным кырсьтӧ

Кӧчӧс вердны,

Йӧвсӧ лысьтыны,

Шонді зонмӧс юктӧдны,

Тӧлысь ӧшкӧс вӧтлыны,

Енлысь зудсӧ кыскыны

Чадӧлысь пурт кеслыны,

Чокырӧс начкыны,

Мен, коньӧрлы, выль яй, выль яй.

— Сета эськӧ ме тэныд кырсьтӧ, да тэ ӧд менсьым он вермы кырссьыныыд. Тэн ковмас мой дорӧ ветлыны пиньла. Тэнад пиньыд оз кырссьы, менам кырсьыс зэв крепыд. Ветлы мой ордӧ пиньла.

Бара руч вӧрті котӧртіс, муніс, кӧн вӧлі мойыс олӧ, корсис дай шуӧ:

Мойӧй, мойӧй,

Вай тэ меным пиньтӧ

Пипу кырсь кырссьыны,

Кӧчӧс вердны,

Йӧвсӧ лысьтыны,

Шонді зонмӧс юктӧдны,

Тӧлысь ӧшкӧс вӧтлыны,

Енлысь зудсӧ кыскыны,

Чадӧлысь пурт кеслыны,

Чокырӧс начкыны,

Мен, коньӧрлы, выль яй, выль яй.

— Сета эськӧ ме тэныд пиньтӧ, да менам ӧд зэв крепыд, да тэ нетшыштныыд он вермы, ковмас ветлыны кузнеч ордӧ клещила.

— Ладнӧ, уна нин ветлӧдлі да ветла и клещила.

Кузнеч ордӧ бара тринь-бринь муніс, воис дай шуӧ:

Кузнечӧй, кузнечӧй,

Вай тэ меным клещитӧ

Мойлысь пиньсӧ кыскыны,

Пипу кырсь кырссьыны,

Кӧчӧс вердны,

Йӧвсӧ лысьтыны,

Шонді зонмӧс юктӧдны,

Тӧлысь ӧшкӧс вӧтлыны,

Енлысь зудсӧ кыскыны.

Чадӧ пурт кеслыны,

Чокырӧс начкыны,

Мен, коньӧрлы, выль яй, выль яй.

— Сета ме эськӧ клещитӧ, да менам жугалыштӧма, колӧ дорыштны. А тэ зэв ёна мудзин, кынӧмыд сюмалӧ, вай сёйышт да паччӧр дорӧ пӧ водыштлы, татчань рожаӧн бок вылад вод, а ме ветла кузнечаӧ да дорышта клещитӧ.

Ладнӧ, ручӧс вердыштіс, руч паччӧр дорӧ кайис, сёйӧм бӧрад шоналіс да унмовсис. Вомсӧ паськӧдіс, кывсӧ ӧшӧдіс да узьӧ. А кузнеч петаліс, клещитӧ донӧдіс, локтіс да кывсӧ ручлысь кватитіс, песовтіс дай нетшыштіс.

Руч куліс, а кузнечлы сійӧ и вӧлі колӧ. Кучиксӧ пӧрччис, яйсӧ вузаліс, воротник кучиксьыс вӧчис, гашкӧ, вузаліс, гашкӧ, и ачыс, новліс. Ог тӧд, кытчӧ сійӧ лоис? А чокыр век на бӧрдлывлӧ:

— Менӧ пондас руч начкыны, пурт ваяс да.

А руч сідзи и эз волы. Чокыр ӧні на, гашкӧ, ловъя.