ШЫР ДА КАТША
Олісны-вылісны шыр да катша. Ӧтчыд шыр мӧдӧдчис удж вылӧ да шуӧ катшалы:
— Ме, катша-чойӧ, турунла ветла, а тэ сы коста горт пытшкӧс идрав да шыд пу ме воиг кежлӧ.
Шыр муніс, а катша мӧдіс керка пытшкын пелькӧдчыны да шыд пуны. Пуис-пуис шыдтӧ да увлань юрӧн и сунгысис пуан шыд пиӧ.
Коркӧ шыр локтіс гортас да пондіс кильчӧ ӧдзӧсӧ гольӧдчыны:
— Катша-чойӧ, восьты, восьты!
Шыр гольӧдчис да гольӧдчис да сідз сылы катша-чойыс ӧдзӧссӧ эз и восьты. Сэсся сюри сылы ичӧтик розь, пырис сараяс, катӧдіс додьсӧ, ректіс турунсӧ и керкаас пырис. А катша некытӧн абу.
Шыр кыскис пачысь шыд да аддзис сэсь катшаӧс. Вӧчны нинӧм. Сійӧ вильӧдіс катшалысь яйсӧ, а кӧясӧ лэччӧдіс ва дорӧ, пуксис сэтчӧ да пондіс сьывны:
Шыр кывтӧ-катӧ
Катша кӧя пыжа,
Мой лапта пелыса,
Вурд бӧж зібъя,
Низь бӧж паруса,
Кыркӧтш дорті сыныштӧ,
Лыа дорті зібйыштӧ!
Сэки кӧч сылы паныдасис да шуӧ:
— Шырӧ-чойӧ, лэдз менӧ пыжад.
— Ог лэдз, пыжӧй менам ичӧт.
— Но, кӧть лапа выйӧн лэдз.
— Но, мый тэкӧд керан, лок пуксьы.
Мӧдісны найӧ кывтны кыкӧн, а шыр бара сьывны:
Шыр кывтӧ-катӧ
Катша кӧя пыжа,
Мой лапта пелыса,
Вурд бӧж зібъя,
Низь бӧж паруса,
Кыркӧтш дорті сыныштӧ,
Лыа дорті зібйыштӧ!
Вот налы руч паныдасис да шуӧ:
— Шырӧ-чойӧ, босьт менӧ тшӧтш пыжад.
— Ог босьт, пыжӧй менам ичӧт.
— Но, кӧть лапа выйӧн лэдз,
— Мый тэкӧд керан, лок пуксьы.
Мӧдісны найӧ кывтны куимӧн, а шыр бара пондіс сьывны:
Шыр кывтӧ-катӧ
Катша кӧя пыжа,
Мой лапта пелыса,
Вурд бӧж зібъя,
Низь бӧж паруса,
Кыркӧтш дорті сыныштӧ,
Лыа дорті зібйыштӧ!
Сэки паныдасис налы кӧин да шуӧ:
— Шырӧ-чойӧ, лэдз менӧ тшӧтш пыжад.
— Ог лэдз, пыжӧй менам ичӧт.
— Но, кӧть лапа выйӧн лэдз.
— Мый тэкӧд керан, лок пуксьы.
Мӧдісны найӧ кывтны нёльӧн, а шыр бара пондіс сьывны:
Шыр кывтӧ-катӧ
Катша кӧя пыжа,
Мой лапта пелыса,
Вурд бӧж зібъя,
Низь бӧж паруса,
Кыркӧтш дорті сыныштӧ,
Лыа дорті зібйыштӧ!
Вот налы паныдасис ош да и шуӧ:
— Шырӧ-чойӧ, босьт менӧ тшӧтш пыжад!
— Ог босьт, пыжӧй менам ичӧт.
— Но, кӧть лапа выйӧн лэдз.
— Ог лэдз, тэ вывті ыджыд места босьтан да пыжӧс менсьым вӧйтан.
— Но, сідзкӧ, ме став тушаӧн пукся.
И пуксис ош сэк став тушанас пыжӧ да ставнысӧ и вӧйтіс.
