НЁРЫМӦ ДЯДЬӦ

Оліс-выліс Нёрымӧ дядьӧ. Коркӧ сійӧ нинкӧм кыис да мӧдӧдчис базарӧ вузавны. Туй вылас пемдіс да ӧти тьӧтка ордӧ узьны вӧзйысис.

— Кытчӧ нӧ, — шуӧ Нёрымӧ, — ме ассьым нинкӧмӧс пукта?

— Пукты, — шуӧ, — нинкӧмтӧ чипан поз дінас. Нинӧм сылы оз ло.

Войнас, кор тьӧтка чорыда унмовсяс, Нёрымӧ дядьӧ чеччыліс, торпыригӧдз косявліс ассьыс нинкӧмсӧ, пуктіс бӧр чипан поз дінӧ, а ачыс бӧр водіс узьны. Асывнас, кор аддзисны, мый чипанъяс нинкӧмсӧ косявлӧмаӧсь, Нёрымӧ пондіс грӧзитчыны кӧзяйка вылӧ:

Ӧксы пилы норася,

Баяр пилы песӧда,

Сё шайт вылӧ бедуйта,

Медбур чипантӧ ог босьт.

— Босьт, — шуӧ кӧзяйка, — медбур чипанӧс, но норасьны эн мун.

Босьтіс Нёрымӧ тьӧткалысь чипан да мӧдӧдчис водзӧ, а вой улӧ бара ӧти тьӧтка ордӧ узьны вӧзйысис.

— Кытчӧ нӧ, — юалӧ Нёрымӧ, — вой кежас ме ассьым чипанӧс местита?

— Местит, — шуӧ, — сійӧс менам ыжъяс дінӧ.

Войнас, кор тьӧтка чорыда унмовсис, Нёрымӧ ачыс виис ассьыс чипансӧ, а асывнас бара грӧзитчӧ кӧзяйка вылӧ:

Ӧксы пилы норася,

Баяр пилы песӧда,

Сё шайт вылӧ бедуйта,

Медбур ыжтӧ ог босьт!

— Босьт, — шуӧ кӧзяйка, — медбур ыжӧс, но норасьны эн мун.

Босьтіс Нёрымӧ тьӧткалысь ыжсӧ да мӧдӧдчис водзӧ, а вой улӧ бара ӧти тьӧтка ордӧ узьны вӧзйысис.

— Кытчӧ нӧ, — юалӧ Нёрымӧ, — вой кежас ме ассьым ыжӧс местита?

— Местит, — шуӧ, — менам мӧсъяс дінӧ.

Войнас, кор кӧзяйка чорыда унмовсис, Нёрымӧ лэччыліс карта вылӧ, виис ассьыс ыжсӧ, а асывнас бара грӧзитчӧ кӧзяйка вылӧ:

Ӧксы пилы норася,

Баяр пилы песӧда,

Сё шайт вылӧ бедуйта,

Медбур мӧстӧ ог босьт!

— Босьт, — шуӧ тьӧтка, — медбур мӧскӧс, но норасьны эн мун.

Босьтіс Нёрымӧ тьӧткалысь мӧс да мӧдӧдчис водзӧ, а воюлас бара вӧзйысис ӧти керкаӧ узьны.

— Кытчӧ нӧ, — шуӧ, — вой кежлас ме ассьым мӧскӧс местита?

— Местит, — шуӧ кӧзяин, — менам конюшняӧ.

Сэсся войнас Нёрымӧ чеччыліс, ачыс начкис ассьыс мӧссӧ, а асывнас грӧзитчӧ кӧзяин вылӧ:

Ӧксы пилы норася,

Баяр пилы песӧда,

Сё шайт вылӧ бедуйта,

Медбур вӧвтӧ ог босьт!

— Босьт, — шуӧ кӧзяин, — медбур вӧлӧс, но норасьны эн мун.

Босьтіс Нёрымӧ кӧзяинлысь вӧвсӧ, доддяліс и мӧдӧдчис гортас. Мунӧ и туй вылас нимкодьпырысь сьылӧ:

Нинкӧм вежи чипан вылӧ,

Чипан вежи баля вылӧ,

Баля вежи тпрутьӧ вылӧ,

Тпрутьӧ вежи чибӧ вылӧ!

Сэки сылы паныдасис ош да и шуӧ:

— Лӧсьыда сьылан, Нёрымӧ дядьӧ. Он-ӧ босьт менӧ седок пыдди?

— Пуксьы.

Мунісны-мунісны, и налы паныдасисны кӧин да руч. Найӧ сідз жӧ седок пыдди вӧзйысьӧны. Босьтіс и найӧс Нёрымӧ. Седокъяс пукалӧны доддьын, а Нёрымӧ ямщичайтӧ да долыда сьылӧ:

Нинкӧм вежи чипан вылӧ,

Чипан вежи баля вылӧ,

Баля вежи тпрутьӧ вылӧ,

Тпрутьӧ вежи чибӧ вылӧ!

Друг Нёрымӧлӧн додьсьыс и заветкиыс ори. Мый керны? Чер ни пурт абу — колӧ матыс сиктӧ черла котӧртлыны.

— Ме ог мун черла, — шуӧ ош, — ме вылӧ сиктын став мужикъясыс и мӧсъясыс лӧгалӧны.

— Ме ог мун черла, — шуӧ кӧин, — ме вылӧ сиктын став мужикъясыс и ыжъясыс лӧгалӧны.

— И ме ог мун черла, — шуӧ руч, — ме вылӧ сиктын став нывбабаясыс и чипанъясыс лӧгалӧны.

Колис Нёрымӧ ошкӧс, кӧинӧс да ручӧс додь дінӧ, а ачыс котӧртіс сиктӧ черла. Нёрымӧ ветлігкості ош, кӧин да руч начкисны сылысь вӧвсӧ, став яйсӧ сёйисны, а сэсся кучик пытшкас идзас сӧвтісны, гӧгӧрбок вурисны да додь вож костӧ бӧр сійӧс сувтӧдісны, а асьныс вӧрӧ пышйисны. Локтіс Нёрымӧ, лӧсьӧдіс заветки, сэсся кутіс вӧлӧс вӧтлыны, а вӧлыс оз мун. Ӧтчыд кучкис, мӧдысь кучкис, коймӧдысь кучкис и вӧлыс бок вылас пӧри. Вӧлисти Нёрымӧ гӧгӧрвоис, мый седокъяс сійӧс бӧбмӧдӧмаӧсь. Шогсис-шогсис и сідз нинӧм абуӧн гортас муніс.