АРТАЛӦМ
Лыдпас 1ʼ вося велӧдчысьяслы
Дасӧдз
Содтӧм, чинтӧм ӧтикаӧн
[...]
20. Ӧгрӧ тьӧтка печкис выльлунӧ кык чӧрс, воторникӧ ӧти чӧрс. Кымын чӧрс сійӧ печкис кык лунӧн?
21. Пӧльӧ войдӧр юис 9 чашка тшай, сэсся нӧрӧвитӧм мысти ещӧ ӧтиӧс. Кымын чашка тшай юис сійӧ ставсӧ?
22. Ичиньӧ пуктіс пызан вылӧ 4 ид нянь. Пон локтіс да ӧти ид нянь пышйӧдіс. Кымын ид нянь коли пызан вылын?
23. Сунлабичын вӧлі 5 тасьті. Чой пуктіс сэтчӧ ещӧ ӧти тасьті. Кымын тасьті лои сунлабичын?
24. Детина сёйис тшай юигӧн ӧти шаньга, сэсся ещӧ кык. Кымын шаньга сійӧ сёйис?
25. Потшӧс вылын пукаліс 9 чикыш. Ӧти чикыш сэтысь лэбзис. Кымын чикыш коли?
26. Гырнич вӧчысь вӧчис 5 кринча, пуктіс найӧс пачӧ ӧжигайтны. Сэні ӧти кринча поті. Кымын дзонь кринча коли?
27. Анна нетшыштіс йӧрысь кымынкӧ сёркни, 2 сёйис ачыс, ӧти сетіс вокыслы. Кымын сёркни сійӧ нетшыштіс? Гашкӧ вит, гашкӧ квайт. Сетӧм бӧрас кымын коли сы серти?
28. Пызан вылын сулалісны 7 кринча. Ӧтиын вӧлі рысь, мукӧдъясас улльӧв. Кымын кринчаын вӧлі улльӧлыс?
29. Мӧс видзысь вӧтліс видзны 8 мӧсӧс. Видзигас сылӧн унмовсьыссьӧма. Сы коста ӧти мӧс пышйӧма. Кымын мӧскӧс сійӧ аддзис садьмӧм мыстиыс?
30. Иван ветліс вадорӧ вуграсьны. Сылы шеді ӧти мык да 3 ёкыш. Кымын чери сылы шедӧма?
31. Маръялӧн батьыс тӧрыт вайис вӧрысь 5 кер. Сылӧн сэтчӧ ещӧ ӧти кер кольӧма. Кымын кер лоас, кор сійӧ ваяс кольӧм керсӧ?
32. Мам пуктіс джаджйӧ 10 чипан кольк. Кань кайис джаджъяс да ӧти кольк уськӧдіс. Кымын кольк коли?
33. Бабалӧн вӧлі 6 чипан. Ӧтиӧс нуис варыш. Кымын чипан бабалӧн коли?
34. Керкаын пукалісны 7 морт. Сэсся пырис ещӧ ӧти морт. Кымын морт лои керкаын?
35. Ӧти нывлӧн вӧлі сарапан вылас 2 тас. Сійӧ вурис ещӧ ӧти тас. Кымын таса лои сылӧн сарапаныс?
36. Ичиньлӧн вӧлі 9 тув вый. Ӧти тув сійӧ аслыс колис, мукӧдсӧ вузаліс. Кымын тув вый сійӧ вузаліс?
37. Миян вӧлі 7 пань. Рок гудралігӧн ӧтиӧс мамӧ чегис. Кымын пань коли.
38. Велӧдчысь ньӧбис ӧтчыд ӧти тетрадь, мӧдысь куим. Кымын тетрадь сылӧн лои?
39. Пельсаын вӧлі 6 ведра ва. Сэтчӧ кисьтісны ещӧ ӧти ведра. Кымын ведра ва лои пельсаын?
40. Кыдз вылын пукалісны 8 катша. На дінӧ локтіс ещӧ ӧти. Кымын лои ставыс?
41. Пилӧн вӧлі 9 ур деньга. Ӧти ур сійӧ воштіс, мукӧдсӧ ставсӧ сетіс чойыслы. Чойыс лыддис сьӧмсӧ дай ошйысьӧ ёртыслы; менам пӧ эм 7 ур. Кужӧма абу сійӧ лыддьыны ассьыс сьӧмсӧ?
42. Миян керка дінын быдмӧ 5 кыдз да ӧти коз. Кымын пу лоӧ ставыс?
43. Крестьянинлӧн вӧлі 4 ыж. Сійӧ ньӧбис ещӧ ӧти. Кымын ыж сылӧн лои?
44. Павеллӧн вӧлі 7 кампет. Ӧтиӧс сійӧ сёйис. Кымын кампет сылӧн коли?
45. Тув вылын ӧшаліс 2 пась. Локтіс бать, пӧрччис ассьыс пасьсӧ, ӧшӧдіс сэтчӧ жӧ. Кымын пась лои тув вылын?
46. Елюк вӧчис аслыс дӧраысь 2 акань. Сэсся батьыс ньӧбис карысь ещӧ ӧти акань. Кымын акань лои Елюклӧн?
47. Менам Иван вокӧй уджаліс кер дорын 6 тӧлысь помся. Сэсся вӧравны муніс да дзонь тӧлысь ветліс. Кымын тӧлысь сійӧ эз вӧв гортын?
48. Бабалӧн вӧлі дас кичышкӧд. 1 сійӧ ӧшӧдіс тув вылӧ, мукӧдсӧ идраліс кудйӧ. Кымын кичышкӧд идраліс кудъяс?
49. Велӧдчысь лыддис луннас 4 лист бок, рытнас ӧти. Кымын лист бок сійӧ лыддис лунтырӧн?
50. Воклы 3 арӧс, чойлы 5. Кымын арӧс кыкнанныслы ӧтлаын?
51. Висьысь мортлы пельшӧр сетіс 4 порошки. Ӧтиӧс сійӧ юис. Кымын порошки сылӧн коли.
52. Воклӧн вӧлі 2 карандаш, чойлӧн ӧти. Кыкнанныс найӧ пуктісны карандашъяссӧ джаджйӧ. Кымын карандаш лои джаджйын?
53. Баба пӧжаліс 9 кӧвдум скӧвӧрда вылын да ӧтиӧс капуста кор вылын. Кымын кӧвдум сійӧ пӧжаліс ставсӧ?
54. Яй вузалысь ньӧбис дядьӧлысь ыж, сетіс сылы 10 шайт. Дядьӧыс сетіс ӧти шайт сдача. Кымын шайт сулалӧ ыжыс?
55. Бабалӧн вӧлі гуалӧма 8 пудовня картупель. Ӧти пудовня сэні сісьмӧма, лои шыбитны. Кымын пудовня картупель сылӧн коли?
56. Детина ас кежас чой вывсянь исковтіс квайтысь, да ёртыскӧд 3-ысь. Кымынысь сійӧ исковтіс ставсӧ?
57. Мам ньӧбис кампет. 5 сетіс челядьыслы, 1 ачыс сёйис. Кымын кампет сійӧ ньӧблӧма?
58. Детиналӧн вӧлі 6 бабки. Ӧтиӧс сійӧ ворссис. Кымын бабки сылӧн коли?
59. Баба косьтіс тӧв кежӧ 9 тув виж гоб да 1 тув гӧрд гоб. Кымын тув тшак сійӧ заптіс?
60. Менам тӧдсалӧн ӧти ныв да ӧти пи. Кымын сылӧн челядьыс?
61. Мужик вузаліс ӧти мешӧк пызь. Гортас сылӧн коли 4 мешӧк. Кымын мешӧк пызьыс вӧлӧма сылӧн вузавтӧдзыс?
62. Ыджыдлун дырйи Катялы сетісны 3 чипан кольк. Ӧти кольк сійӧ вежис преник вылӧ, мукӧдсӧ сёйис. Кымын кольк сійӧ сёйис?
63. Школаын ӧти вежӧсын 6 серпас (картина), мӧдын ӧти. Кымын серпас сэні ставыс?
64. Чоя-вока мунісны пельсаӧн вадорӧ вала. Чойыс кисьтіс пельсаӧ 3 ведра ва, вокыс ӧтиӧс. Пельса тыри. Кымын ведра ва тӧрӧ пельсаӧ?
65. Кодікӧ кыйӧма 8 кӧч. Локтӧма гортас, кульӧма найӧс, пуктӧма паччӧр вылӧ косьтыны. Кань сылысь ӧти кӧч ку сёйӧма. Кымын кӧч ку кольӧма?
66. Детиналӧн ӧти зептас вӧлі 3 кӧлач, мӧдас ӧти. Кымын кӧлач вӧлі сылӧн ставыс?
67. Ӧгаш кыис шӧртысь деньга кӧшель. Батьыс пуктіс сэтчӧ 5 ур, мамыс 1 ур. Кымын ур лои Ӧгашлӧн кӧшеляс?
68. Павел ньӧбис преник, сетіс вузасьысьлы 5 ур. Сылы сетісны сдача 1 ур. Уна-ӧ дон Павел ньӧбасьӧма?
69. Сарайын вӧлі 7 кольта зӧр. 1 кольта вердісны вӧвлы. Кымын кольта коли?
70. Ыджыд чой печкис 4 чӧрс шӧрт, ичӧт чой — ӧтиӧс. Кымын чӧрс печкисны кыкӧн?
71. Йӧрын вӧлі 9 град. Ӧти град вылӧ пуктісны лук, мукӧд град вылас картупель. Кымын град вылын лои картупельыс?
72. Баба ньӧбасис 1 шайт дон. Сьӧмыс сылӧн вӧлі 10 шайт. Кымын шайт сылӧн коли?
73. Жытникын вӧлі 3 пуд пызь. 1 пуд босьтісны пӧжавны нянь. Кымын пуд пызь коли жытникын?
74. Кутшӧмкӧ детиналӧн вӧлі 10 кампет кор. Ичӧт чой ӧти кампет кор сылысь косялӧма. Кымын кампет кор сылӧн кольӧма?
75. Иванлӧн вӧлі 7 ур. Сэсся сылы батьыс сетіс 1 ур. Кымын ур лои Иванлӧн?
76. Дядьӧлӧн вӧлі кык ыж ку. Ӧти ыж кусьыс сійӧ вурис пиыслы шапка. Кымын ыж ку сылӧн ещӧ коли.
77. Кык вӧралысь мунісны лыйсьыны. Ӧтиыс лыйис 4 дозмӧр, мӧдыс ӧти. Кымын дозмӧр найӧ лыйисны?
78. Ӧти салдатлӧн война вылын шӧр чуньыс доймис, лои сійӧс вундыны. Кымын чунь сылӧн коли ӧти киас? Кыкнан киас?
Содтӧм, чинтӧм гоз-мӧдӧн
[...]
119. Вӧрын би дорын пукалісны 2 детина. На дінӧ локтісны 8 пув вотысь вӧзйысьны би дорас шонтысьны. Кымын морт лои би дорын?
120. Пӧльлысь кывзісны мойданкыв 4 детина да кык ныв. Кымын кывзысь вӧлі пӧльлӧн.
121. Сапӧг вурысь вурис 3 гоз сапӧг да 4 гоз кӧті. Кымын гоз кӧмкот сійӧ вурис?
122. Мам ветліс лавкаӧ ньӧбасны, вайис сэсь 2 стӧкан да 4 чашка. Кымын гоз сійӧ вайис ставсӧ?
123. Иван думыштіс аслас керка дінӧ сад лӧсьӧдны, вайис вӧрысь 5 кыдз да 2 льӧм пу. Кымын пу сылӧн лои?
124. Ӧти вежӧсын 3 ӧшинь, мӧдын 2. Кымын ӧшинь ставыс?
125. Туй кузя котӧртісны 2 кукань, на бӧрся ещӧ 2. Кымын кукань котӧртіс туй кузя?
126. Парась краситіс Ыджыдлун кежлӧ 4 кольк лук корйӧн, да кыкӧс — корӧсь корйӧн. Кымын краситӧм кольк сылӧн лои?
127. Велӧдысь сетіс ӧти велӧдчысьлы 5 нига, мӧдлы куимӧс. Кымын нига сійӧ сетіс кык велӧдчысьлы?
128. Гын сапӧг вӧчысь летіс 3 тув еджыд вурун да 1 тув сьӧдӧс. Кымын тув вурун летіс сійӧ ставсӧ.
129. Кык детина мунісны мӧс видзны. Ӧтиыслӧн вӧлі 3 мӧс, мӧдыслӧн 3 жӧ. Кымын мӧс вӧлі 2 детиналӧн?
130. Велӧдчысьлӧн вӧлі 6 перӧ. Батьыс сылы сетіс 3 перӧ. Кымын перӧ сылӧн лои?
131. Нянь кудйын вӧлі кымынкӧ тупӧсь. Кор сэтысь босьтісны куимӧс, сэні коли 7. Кымын тупӧсь вӧлӧма кудйын?
132. Дядьӧ вайис вӧрысь 4 додь конда пес, 4 додь краж пес. Кымын додь пес сійӧ вайис?
133. Картупель керысь ӧбедӧдз керис 4 пудовня картупель, ӧбед бӧрын вит пудовня. Кымын пудовня картупель сійӧ керис лунтырӧн?
134. Ӧти морт мӧдӧдчис куртны. Муніс сійӧ 5 верст дай зэрмис, лои бӧр бергӧдчыны гортас. Кымын верст вӧчис сійӧ ӧтарӧ-мӧдарӧ ветлігӧн?
135. Ӧти гидын 6 ыж, мӧдын 4. Кымын ыж кык гидын?
136. Видз вылын куртісны войдӧр 5 юр турун, сэсся ещӧ 4. Кымын юр куртісны?
137. Чожиньлӧн вӧлі 4 тув ид шыдӧс. Сылы сусед вайис водзӧс 3 тув. Кымын тув шыдӧсыс лои чожиньлӧн?
138. Крестьянин кӧдзис ӧти му вылӧ 7 пуд сю, мӧдӧ 3 пуд. Кымын пуд сійӧ кӧдзис кык му вылӧ?
139. Мам нывкӧд шабді нетшкисны. Мамыс нетшкис 7 чом, нылыс 2 чом. Кымын чом нетшкисны найӧ кыкӧн?
140. Челядь мӧдісны мӧдлапӧлӧ. Кутісны лыддьыны, кымын морт тӧрис пыжӧ. Нылыс вӧлі 3, детинаыс 2. Кымын морт вӧлі ставыс?
141. Мам кӧсйис 5 аршынысь шӧравны нывлы платтьӧ; сосъяс вылас эз тырмы, лои ещӧ ньӧбны содтӧд 2 аршын. Кымын аршын мунӧ платтьӧ вылӧ?
142. Ӧдюк муніс тшак вотны. Ӧтнас пыдӧ эз лысьт пырны, вотіс доргӧгӧрсьыс. Тшак сюри этша: сӧмын 4 гоб да 3 ельдӧг. Кымын тшак сылы сюри ставыс?
143. Миян каньлӧн 3 еджыд каньпи да 2 руд. Кымын каньпи ставыс?
144. Иван Маръякӧд ворсісны чомйын. Налы ковмӧма сёянтор. Мунісны йӧрӧ лукла. Иваныс нетшыштіс 7 лук, Маръяыс 3. Кымын лук найӧ вайисны чомйӧ?
145. Бабалӧн вӧлі 3 тув нира вый, да 6 тув сывдӧм вый. Кымын тув вый сылӧн вӧлі?
146. Ме сота тӧлысьын 6 тув карасин. Кӧзяйкаӧй водз водӧ, сотӧ сӧмын 2 тув. Кымын тув карасин колӧ миянлы тӧлысь кежлӧ?
147. Ӧти ныв колян гожӧм вузаліс 2 чуман оз да 8 чуман ӧмидз. Кымын чуман вотӧс сійӧ вузаліс?
148. Кык кӧзяйка вӧтлісны мӧсъяссӧ юкмӧс дорӧ юктавны. Ӧтиыслӧн вӧлі 3 мӧс, мӧдыслӧн 2 мӧс. Кымын мӧс вӧлі кыкнанныслӧн ӧтлаын?
149. Йӧв выв вежонӧ 3 челядь доддялісны мича кора доддьӧ вӧв и мӧдӧдчисны гуляйтны. Налы паныд сюрины 4 детина, пуксисны тшӧтш. Кымын челядь лои доддьын?
150. Керка вӧчигӧн 2 мужик кӧсйисны лэптыны кер. Эз вермыны. Лои корны ещӧ 2 мортӧс. Кымынӧн лэптісны керсӧ?
151. Нёль верст сайын миян школасянь эм сикт. Сэтысь волывлӧны велӧдчыны 4 ныв да 4 детина. Кымын велӧдчысь сійӧ сиктысь волывлӧ?
152. Сьтэпан вӧчис 3 ыджыд чипсан да 7 ичӧтӧс. Кымын чипсан сылӧн лои?
153. Кагалӧн 2 пинь, пӧчыслӧн 7. Кымын пинь кыкнанныслӧн ӧтлаын?
154. Сизим челядьлы колӧ вӧлі вуджны мӧдлапӧлӧ. Пуксисны ставныс ӧти пыжӧ. Пыжыс эз лэпты, кыклы лои чеччыны. Кымын мортӧс лэптіс пыжыс?
155. Челядь пуктісны пачӧ пӧжавны 10 картупель. Ворсӧмысла вуні налӧн сійӧ. Видзӧдлісны — 3 картупель сотчӧма. Кымын картупель сюри налы сёйны?
156. Керкаын вӧлі 8 ӧшинь. Шерӧн кымынкӧ ӧшинь жугалі. Шер дугдӧм бӧрас дзоньӧн коли сӧмын 5 ӧшинь. Кымын ӧшинь жугӧдіс шер?
157. Дядьӧлӧн вӧлі кералӧма 9 потш. 8 сійӧ видзис потшӧс лӧсьӧдігӧн. Кымын потш сылӧн коли?
158. Шор вомӧн вуджны вӧчӧма вӧлі пос 7 потшкысь. Ыджыд зэр бӧрын 2 потш кылалӧма. Кымын потш коли?
159. Квайт челядь мунісны коляоз сёйны. Куимӧн кайисны коз вылӧ, мукӧдыс виччысисны найӧс улас. Кымын челядь колисны коз улын?
160. Деньга кӧшельын вӧлі 7 шайт. 5 шайт сэтысь босьтісны. Кымын шайт коли кӧшӧльӧ?
161. Пачын вӧлі 3 гырнич рысь. 2 гырнич кыскисны. Кымын гырнич коли пачас?
162. Йӧрысь вайисны 5 капуста мач. Куимысь пӧжалісны пирӧг, мукӧдсӧ колисны шыд пиӧ пуктыны. Кымын мач коли шыд пиӧ пуктыны?
163. Жытникын вӧлі 9 мешӧк пызь. 4 мешӧкас ид пызь, мукӧдас рудзӧг. Кымын мешӧкын вӧлі рудзӧг пызьыс?
164. Видз вылын куртісны 8 юр турун, 5 юр тэчисны зорӧдӧ. Кымын юр коли тэчтӧм?
165. Керка вылын пукалісны 10 рака. Кымын рака коли 9 рака лэбзьӧм бӧрын?
166. Кӧзяйкалӧн вӧлі 5 тув яй. 3 тувйысь пуис шыд, мукӧдсӧ колис мӧд лун кежӧ. Кымын тув яй сылӧн коли?
167. Велӧдчысь вайис школаӧ пажын вылӧ 4 пызя шаньга. Кыкӧс сійӧ сетіс ёртыслы. Кымынӧс сёйис ачыс?
168. Кринчаӧ тӧрӧ 8 стӧкан йӧв. Сэтысь юисны 2 стӧкан. Кымын стӧкан йӧв коли кринчаын?
169. Гӧбӧчын пӧв вылын вӧлі 6 тупӧсь нянь. Гӧбӧч ӧшиньыс вӧлі омӧля тупкӧма. Сэті пырӧма пон дай 2 тупӧсь нянь сёйӧма. Кымын тупӧсь коли гӧбӧчын?
170. Ёгор видзис ывлаын 7 чипанпи. Сылӧн кутіс кынӧмыс сюмавны, пырис гортас няньла. Мыйкӧ дыр эз пет. Пыралігкостіыс каньыс 3 чипанпиӧс сёйӧма. Кымын чипанпи коли Ёгорлӧн?
171. Ӧтчыд ми став семьянаным мӧдім вӧлӧн мӧд грездӧ гӧститны. Семья миян ыджыд — буретш сизимӧн пуксим рӧзвалльӧ. Колӧ вӧлі чой лэччыны. Вӧвным ӧддзис, додьным пӧри. 2 мортӧс ылӧ лым пиас шыбитіс. Кымын морт колимӧ доддяным?
172. Керка водзӧ пуктісны 6 ӧмидз куст. Куимыс кулі. Кымын куст кутіс быдмыны?
173. Тыртӧм туис кыскӧ 2 тув. Кор сэтчӧ пуктісны вый, сійӧ пондіс кыскыны 4 тув. Кымын тув вый пуктісны туисӧ?
174. Нывлӧн вӧлі кымынкӧ сикӧтш. Кор сылы сетісны ещӧ 3, сылӧн лои ставыс 5. Кымын сикӧтш сылӧн вӧлӧма войдӧрсӧ?
175. Вӧлі 7 аршына кер. 4 аршынсӧ пилитісны. Кузь-ӧ коли керйыс?
176. Пызан вӧчысь лӧсьӧдіс 8 пӧв. 5 пӧвйысь сійӧ вӧчис пызан, коляссьыс улӧсъяс. Кымын пӧвйысь вӧчис сійӧ улӧсъяссӧ?
177. Пызан вылын вӧлі кымынкӧ карандаш. Кор сэтчӧ содтісны куимӧс, лои 6. Кымын карандаш вӧлӧма пызан вылын войдӧрсӧ?
178. Лабичын пукалісны кымынкӧ морт. Кор сэтчӧ пуксисны ещӧ 2 морт, лои ставыс 5. Кымын морт вӧлі пукалӧны лабичын?
179. Нывлӧн вӧлі кыӧма кымынкӧ аршын прӧшви. Сійӧ кыис ещӧ 4 аршын, лои ставыс 8 аршын. Кымын аршын сылӧн вӧлі кыӧма войдӧр?
180. Дорччысь вӧчис 9 пурт. Куимӧс сійӧ вузаліс. Кымын пурт коли дорччысьлӧн.
181. Детина вӧчис вӧрын 8 рос. Гортас локтігӧн сійӧ пыраліс ыджыд мамъясас, колис сылы 3 рос. Кымын рос вайис сійӧ гортас?
182. Велӧдчысьлы колӧ вӧлі тӧдӧдны 6 задача. Кыкӧс сійӧ эз сяммы тӧдӧдны. Кымын задача сійӧ вермис тӧдӧдны?
183. Сапӧг вурысьлы колӧ вӧлі вурны Петыр лун кежӧ 6 гоз сапӧг. Сійӧ вермис вурны сӧмын 5 гоз. Кымын гоз коли вуртӧм?
184. Баба пуис свадьба вылӧ 8 ведра сур. Воддза лунас юисны 6 ведра. Кымын ведра сур коли мӧд лун кежас?
185. Лизалӧн аслас ичӧтик град вылын волі пуктӧма 10 сёркни. Ӧтчыд сы дінӧ локтісны ёртъясыс. Лиза петкӧдліс налы ассьыс градсӧ, вердіс налы 3 сёркни. Кымын сёркни коли град вылӧ?
Ӧтластитӧмӧн арталӧм
186. Ӧти войпуканінын вӧлі 7 печкысь, мӧдын ӧти печкысьӧн этшаджык. Кымын печкысь вӧлі мӧд войпуканінас?
187. Энька Ыджыдвидз дырйи кыис 8 берд дӧра, моньыс 2 бердӧн унджык. Кымын берд дӧра кыис моньыс?
188. Карта водзын вӧлі 2 кер. Ӧтиыс 6 аршына, мӧдыс 2 аршынӧн кузьджык. Кымын аршына вӧлі мӧд керйыс?
189. Кык вок кыисны гез. Ӧти вокыслӧн вӧлі кыӧма 6 аршын, мӧдыслӧн 2 аршынӧн дженьыдджык. Кымын аршын кузя вӧлі гезйыс мӧд вокыслӧн?
190. Иванлӧн керкаыс школасянь 7 керка сайын, Митрейлӧн 2 керкаӧн матынджык. Кымын керка сайын школасянь Митрейлӧн керкаысь?
191. Миян кыкысь ветлісны нюрӧ мырпомла. Войдӧрсӧ ветлісны 5 верст сайӧ, мӧдысьсӧ 3 верстӧн ылӧджык. Кымын верст сайӧ ветлісны мӧдысьсӧ?
192. Петырлӧн картузыс 5 шайта, Павеллӧн шапкаыс 2 шайтӧн донаджык. Кымын шайт Павеллӧн шапкаыс?
193. Кутшӧмкӧ ныв ньӧбис кашемир да ситеч чышъян. Ӧти чышъян вылас сетіс 5 шайт, мӧдыс вылӧ 3-ӧн унджык. Кымын шайта вӧлі кашемир чышъяныс?
194. Телеграфнӧй сюръя 4 сывъя, верстӧвӧй 3 сывйӧн дженьыдджык. Кымын сывъя верстӧвӧй сюръяыс?
195. Орччӧн сулалӧны кык керка. Ӧтиыс 6 сыв судта, мӧдыс сывйӧн ляпкыдджык. Кымын сыв судта мӧд керкаыс?
196. Семенлӧн батьыс зэв ыджыд да кыз, кыскӧ 7 пуд. Семеныс ачыс ичӧтик да косыник, кыскӧ 5 пудӧн батьсьыс кокньыдджыка. Кымын пуд кыскӧ Семеныс?
197. Кык мужик нуисны дорсьысь ордӧ кӧрт. Ӧтиыслӧн вӧлі 4 пуда тор, мӧдыслӧн ӧти пудйӧн сӧкыдджык. Кымын пуда тор вӧлі мӧд мужикыслӧн?
198. Кык ныв мунісны лавкаӧ. Ӧтиыс ньӧбис 7 аршын лента, мӧдыс 3 аршынӧн этшаджык. Кымын аршын ньӧбис мӧдыс?
199. Миян гортын вӧлі 10 арӧса кань. Сійӧ тшӧги, дышӧдчыны пондіс кыйсьыныс. Ми босьтім мӧд кань, 8 арӧсӧн томджыкӧс. Кымын арӧса вӧлі мӧд каньыс?
200. Пызан вылын ӧти блюд вылӧ пуктӧма 10 сӧчӧн, мӧд вылӧ ӧтиӧн этшаджык. Кымын сӧчӧн вӧлі мӧд блюд вылын?
201. Керка ӧшинь 4 весьт пасьта, гӧбӧч выв ӧшинь 2 весьт пасьта. Кодыс векньыдджык и кымын весьтӧн?
202. Пызан 5 весьт пасьта, лабич 3 весьт пасьта. Кодыс паськыдджык и кымын весьтӧн?
203 Марина путшкис кык сикас шӧрт. Ӧтисӧ сійӧ кӧсйис вӧчны ёнджыкӧс и путшкис 3 сунисысь, мӧдсӧ 2 сунисысь. Кымын сунисӧн воддзаыс кызджык?
204. Сарапан вылӧ мунӧ 10 аршын дӧра, дӧрӧм вылӧ 4 аршын. Кымын аршынӧн унджык мунӧ сарапан вылӧ?
205. Иван лунлань паныд эня-ныла мунісны корӧсьла. Мамыс вундіс 9 корӧсь, нылыс квайтӧс. Кымын корӧсьӧн и кодныс вундісны унджык?
206. Бабалӧн вӧлі 5 тув нигӧн вурун да 9 тув канті вурун. Код сикас вуруныс вӧлі унджык и кымын тувйӧн?
207. Митрей рисуйтіс урок дырйи 8 вӧв. Сыкӧд пукалысь ёртыс, Ӧндрей, видзӧдліс сійӧ тетрадьӧ дай шуис: «Он тай куж рисуйтчыныд. Медводдзаыс дзик абу вӧв кодь. Вайлы ме тэд рисуйта», — рисуйтіс кык вӧв. Кымын вӧв лои рисуйтӧма Митрей тетрадьын?
208. Велӧдысь ӧти шкап джаджйысь босьтіс 5 нига, мӧдысь нёльӧс и пуктіс пызан вылӧ. 7 нига сетіс велӧдчысьяслы. Кымын нига коли пызан вылын?
209. Тыла вылын вӧлі вундӧма 10 суслан сю. Ӧтчыд нуисны сэтысь 4 суслан, мӧдысь 3. Кымын суслан сю коли ещӧ нуны?
210. Батьлӧн вӧлі куим шайта деньга да 5 шайта. Сійӧ видзис 7 шайт. Уна-ӧ деньга сылӧн коли?
211. Тӧрыт ми пыралім Пиля-Ӧньӧӧ кӧч ньӧбны. Сылӧн 10 челядь (ставныс вӧліны гортас кор ми пырим). Кыкӧн пукалісны лабичынӧсь, кыкӧн куйлісны пӧлатьын, 3 ворсісны паччӧр вылын, ӧти вӧлі потанын, мукӧдыс котралісны джодж кузя. Кымынӧн котралісны?
212. Ӧти семьяын 2 морт, мӧдын 4 мортӧн унджык. Кымын морт кык семьяас ӧтлаын?
213. Классын вӧлі 9 парта. Кыкӧс ёна важысла лои петкӧдны. На пыдди вайисны 3 выльӧс. Кымын парта лои классын?
214. Лавкаын вӧлі 4 виж юр сынан, 2 сьӧд, ӧти лӧз. Локтісны нывъяс, босьтісны 3 юр сынан. Кымын юр сынан коли лавкаын?
215. Кодкӧ ньӧбис 3 тув гырысь кӧрт тув да 5 тув шӧркоддьӧмӧс. 7 тув кӧрттув видзисны. Кымын тув коли?
216. Сыктывдінкар улӧ сувтісны 6 пуръя, сы бӧрын ещӧ 4. Кыкыс сійӧ жӧ лунӧ кывтісны водзӧ. Кымын пур коли сэні сулавны?
217. Кымынкӧ челядь ворсісны дзебсясьӧмӧн. Кыкӧн дзебсисны звӧз улӧ, 3-ӧн сарайӧ — турун пытшкӧ, ӧти корсис. Кымын ворсысь челядь вӧлі?
218. Менам нимлунӧ локтісны ме ордӧ гӧститны 6 нывбаба да 4 мужик. Ӧти гӧститысь кутіс тэрмасьны, регыд бӧр муні. Кымын гӧсьт коли сійӧ мунӧм бӧрын?
219. Ӧньӧ Васьлӧн вӧлі вайӧма ӧти видз вылысь 3 додь турун, мӧд видз вылысь 5 додь. Кымын додь турун сылӧн коляс, вузалас кӧ сійӧ на пытшкысь 4 додь?
220. Кӧкъямыс детина мӧдӧдчисны купайтчыны. Локтісны вадорӧдз, друг ӧтиӧс босьтіс висьӧм. Сійӧс ӧти ёрткӧд бӧр бергӧдісны гортас. Кымын детина коли вадорын?
221. Куим уджалысьлы сетісны 10 шайт. Медводдзаыслы сетісны 4 шайт, мӧдыслы 1 шайтӧн этшаджык. Кымын шайт сетісны коймӧдыслы?
222. Лавкаын вӧлі 2 пома лента: гӧрдыс 5 аршын кузя, лӧзыс 1 аршынӧн унджык. Лӧзсӧ вузалісны 4 аршын. Кымын аршын лента коли лавкаын?
223. Ыджыдлун дырйи 7 детина кайисны кӧлӧкӧльня вылӧ звӧнитны. Неуна звӧнитыштісны, сэсся кыкӧн мунісны качай вылӧ, 3-ӧн бабкиасьны, мукӧдыс сэтчӧ на кольччисны. На дінӧ локтісны ещӧ кымынкӧ звӧнитысь, кӧлӧкӧльня вылын лоины 6 морт. Кымын выль звӧнитысь локтіс?
224. Ӧти бабалӧн вӧлі 6 тув вый, сійӧ суседкалӧн 2 тувйӧн этшаджык. Кымын тув лоас мӧд бабаыслӧн, кор сійӧ чӧжас ещӧ 5 тув вый?
225. Кодлыкӧ колӧ вӧлі ӧти му вылӧ кӧдзны 4 пуд зӧр, мӧдӧ 3. Сылӧн кӧйдысыс сӧмын 5 пуд. Кымын пуд кӧйдыс сылӧн оз судзсьы?
226. Кык детина мӧс видзигӧн вӧчисны корӧсьяс. Ӧтиыс вӧчис 4 гоз, мӧдыс 3. Вӧчӧм корӧсьяссӧ найӧ тэчисны пу улӧ, асьныс мунісны выльысь вундавны. Вайисны 3 гоз. Ветлігкостіыс мӧсъясыс 2 гоз корӧсь сёйӧмаӧсь. Кымын гоз корӧсь налӧн лои.
227. Елен ордӧ локтісны гӧсьтъяс. Сійӧ кутіс найӧс пӧсь ваӧн юктавны. Перйис кудйысь чашкаяс: 2 вижӧс, 3 лӧзӧс, 2 еджыдӧс. Ачыс тшӧтш пуксис пызан саяс. Видзӧдӧ да — ӧти чашка лишнӧй. Елен сійӧс бӧр пуктіс кудъяс, мукӧдас кисьталіс тшай. Чашкаыс тырмис став гӧсьтыслы и аслыс. Кымын гӧсьт вӧлі Елен ордын?
228. Кӧзӧд вылын сулаліс 8 тыра туис, 2 туисын вӧлі шома йӧв, ӧтиын рокӧс, куимын ырӧш, мукӧдас сур. Баба мӧдӧдчис сурла. Вайигас туис вевтыс мыні, став сурыс киссис. Сылы лои мӧд туисла мунны. Кымын туис сур ещӧ коли кӧзӧд вылас?
229. Кык дядьӧ мӧдӧдчисны мельничаӧ изны. Ӧтиыслӧн вӧлі 4 мешӧк, мӧдыслӧн 2 мешӧкӧн унджык. Кымын мешӧк найӧ вайисны мельничаӧ?
230. Ӧти вундысь вундіс 7 кольта ид, мӧд — 2 кольтаӧн этшаджык, коймӧд 3 кольтаӧн унджык мӧдсьыс, нёльӧд ӧти кольтаӧн этшаджык коймӧдсьыс. Кымын кольта ид вундіс нёльӧд вундысьыс?
231. Ме тӧда ӧти семья. Налӧн 6 челядь: ӧти пи служба вылын, кыкӧн велӧдчӧны гортса школаын, 1 Мӧскуаын, мукӧдыс ичӧтӧсь на, да прӧста гортын олӧны. Кымын налӧн посни челядьыс?
232. 4 детина да 5 ныв мунісны анягур сотны. 2 челядьӧс на пытшкысь мамыс корис ужнайтны. Кымын челядь сэні коли?
233. Бабалӧн вӧлі кудйын 8 чӧрс, да джаджйын 6 чӧрсӧн этшаджык. Кымын чӧрс сылӧн вӧлі?
234. Ӧньӧлӧн вӧлі 5 шег. Сійӧ кутіс шегъясьны ёртыскӧд. Войдӧр воис 3 шег, бӧртинас бӧр нёльӧс ворссис. Кымын шег сылӧн лои?
235. 3 ныв вотісны пув. Воддзаыс вотіс 3 чуман, мӧдыс ӧти чуманӧн унджык, коймӧдыс 2 чуманӧн этшаджык мӧдсьыс. Кымын чуман пув вотӧма лои налӧн ставыслӧн?
236. Ветлысь-мунысь муніс ӧти грездсянь мӧдӧдз 3 час. Воддза часнас муніс 3 верст, мӧд часнас ӧти верстӧн унджык, коймӧднас 2 верстӧн этшаджык мӧд час сертиыс. Кымын верст кык грезд костын?
237. Вокӧй 9 арӧса, чойӧй 6 арӧсӧн томджык. Кымын арӧса лоас чойӧй 5 во мысти?
238. Педӧсь мӧс корсигӧн аддзис 7 гоб, 2 уртшак, сэсся ӧти рыжик. Локтіс гортас, кӧсйис пуны шыд. Кутіс весавны тшаксӧ да 2 тшак эз шогмы, шыбитны лои. Кымын тшакысь пуис шыдсӧ Педӧсся?
239. Нывлы платтьӧ вылӧ мунӧ 5 аршын ситеч, мамыслы 4 аршынӧн унджык. Мамыслы козьналісны 8 аршын. Кымын аршын ещӧ оз судзсьы сылы платтьӧ вылас?
240. Кильчӧ пос вылын шондіа лунын шонтысисны 5 каньпи мамыскӧд. Друг ӧти каньпи аддзис му вылысь шомгаг уськӧдчис сы вылӧ; сы бӧрся чеччыштісны ещӧ 2 каньпи. Кымынӧн колины пос вылын?
Ӧктӧм, юкӧм
[...]
267. Куим детиналӧн вӧлі 3 урӧн. Найӧ тэчӧмӧн ньӧбисны ӧрешки. Мый дон найӧ ньӧбасисны?
268. Вӧрысь нёльысь вайисны кер. Быд вайӧмӧн кыскисны 2 керӧн. Кымын кер вайисны ставсӧ?
269. Детина вайис град вылысь куимысь 2 галанкаӧн. Кымын галанка сійӧ вайис?
270. Кымын ки 5 мортлӧн?
271. Кымын юр 10 ошлӧн?
272. Ӧти карандаш сулалӧ 4 ур. Кымын ур сулалӧ 2 карандаш?
273. Нёль челядь сёйисны морт ӧти пирӧгӧн. Кымын пирӧг найӧ сёйисны?
274. Мам ньӧбис кык пилы дӧрӧм вылӧ. Быд дӧрӧм вылӧ мунӧ 3 аршын. Кымын аршын сійӧ ньӧбис?
275. Туй кузя муніс 5 вӧла. Быд доддьын пукалісны 2 мортӧн. Кымын морт вӧлі ставыс?
276. 3 морт кӧртмалісны видз. Быд морт вылӧ лои 3 додь турун. Кымын додь вӧлі видз вылын?
277. Пожъясьӧм бӧрын Даръя ӧшӧдіс 2 гез вылӧ 4 дӧрӧмӧн. Кымын дӧрӧм сійӧ ӧшӧдіс?
278. Туй кузя мунӧны 3 гозъя. Кымын сэні морт?
279. Ыджыдвидз дырйи баба чӧжис 3 пельса тыр шомйӧв. Быд пельсаӧ тӧрӧ 2 ведра. Кымын ведра шомйӧв вӧлі чӧжӧма бабалӧн?
280. Ытшкигӧн вайисны видз вылӧ туисӧн ырӧш. Иван юис сэтысь нёльысь 2 дарйӧн. Кымын дар ырӧш сійӧ юис?
281. Вежонын 7 лун. Кымын задача ме тӧдӧда, кута кӧ быд лун тӧдӧдны ӧти задачаӧн?
282. Баба ньӧбис кизь. Кизьыс вӧлі вуралӧма кабала вылӧ 2 визьӧ, 5 кизьӧн быд визьын. Кымын кизь сійӧ ньӧбис?
283. Мамӧ карӧ лэччӧдліс кушман вузавны. 3 ньӧбысьлы 3 кушманӧн вузалӧма. Кымын кушман сійӧ вузалӧма?
284. Велӧдысь сетіс 8 велӧдчысьлы ӧти карандашӧн. Кымын карандаш сійӧ сетіс ставсӧ?
285. Керкаын пукалісны 2 баба. Кыкнаныслӧн вӧлі 2 челядьӧн. Кымын челядь 2 бабалӧн ӧтлаын?
286. Кӧч кыйысь пуктіс 3 капкан. Быд капканӧ шедіс ӧти кӧчӧн. Кымын кӧч шеді ставыс?
287. Детина мунӧ ӧти часӧн 4 верст. Кымын верст сійӧ мунас 2 часӧн?
288. Маша муні гӧрд гоб вотны. Кыклаын сылы гоб кындзи сюри 3 рыжикӧн. Кымын рыжик сылы сюри?
289. Пошта нуны колӧ вӧлі 2 пара вӧв. Кымын вӧлӧн нуисны поштаӧс?
290. Крестьянинлӧн 2 гидын 4 ыжӧн. Кымын сылӧн ыжыс?
291. Керка дінын 3 кыдз. Быд кыдз вылын 2 рака позйӧн. Кымын рака поз ставыс?
292. Мам сетіс 5 челядьлы морт ӧти преникӧн. Кымын преник сійӧ сетіс ставыслы?
293. Кык детина мунісны вуграсьны. Кыйисны морт 5 чериӧн. Кымын чери налы шеді?
294. Кымын карандаш ковмас 5 велӧдчысьлы, быд мортлы кӧ сетны 2 карандашӧн?
295. Чоя-вока сёйисны морт 3 блинӧн. Кымын блин найӧ сёйисны ставсӧ?
296. Вит парта сайын пукалӧны 2 мортӧн. Кымын морт лоас ставыс?
297. Колӧ 10 парта вылӧ пуктыны ӧти чернила дозйӧн. Кымын чернила доз ковмас ставыс?
298. Петыр Ёгорлӧн пинжак вылас вурӧма 2 визь кизь, быд визьын нёль кизьӧн. Кымын кизь пинжак вылын?
299. Нёль чоя-вокалы вӧчӧдісны морт гын сапӧг гозйӧн. Кымын гын сапӧг вӧчисны?
300. Бабаяс мӧдісны мӧдлапӧлӧ ельдӧгла. Найӧ пуксисны 3 мортӧн 3 пыжӧ. Кымынӧн найӧ вӧліны?
301. Миян эм кык мешӧк кос тшак. Быд мешӧкын 5 тув. Кымын тув тшак миян ставыс?
302. Крестьянин ньӧбис 3 шайтӧн 3 ыж. Уна-ӧ деньга сылы лои сетны?
303. Кымын гӧгыль 2 телегаын?
* * *
304. Баба ньӧбис 2 ковта вылӧ 8 аршын ситеч. Кымын аршын мунӧ ӧти ковта вылӧ?
305. Ӧкмыс морт мӧдӧдчисны карӧ 3 пур вылын. Быд пур вылӧ пуксисны ӧтмындаӧн. Кымын морт вӧлі быд пур вылын?
306. Ю вылын пукалісны 6 дзодзӧг. Найӧ лэбзисны кыклаӧ ӧтмындаӧн. Кымын дзодзӧг муніс ӧтарас и кымын мӧдарас?
307. Ӧшинь вӧчысь видзис 6 тор стеклӧ 3 ӧшиньӧ ӧтмындаӧн. Кымын тор стеклӧ пуктіс быд ӧшиньӧ?
308. Кык мужик пилитісны вӧрын 4 сыв пес, сэсся юкисны сійӧс шӧриӧн. Кымын сывйӧн лои быд мужиклы?
309. Гырнич вӧчысь вузаліс 3 ньӧбасьысьлы ӧтмындаӧн 9 кринча. Кымын кринча ньӧбис быд ньӧбасьысь?
310. Кык ыж сулалӧ 10 шайт. Дона-ӧ сулалӧ ӧти ыж?
311. Куим воклы мам сетіс пӧжасигӧн 6 шаньга. Кымын шаньга воис морт вылӧ?
312. Уджалысь босьтіс 3 лунысь 3 шайт. Уна-ӧ деньга сійӧ босьтӧ лунысь?
313. Мам ньӧбис 6 аршын лента, юкис 3 нывлы ӧтмындаӧн. Кымын аршынӧн воис быд нывлы?
314. Нёль уджалысьлы мынтісны 8 шайт. Кымын шайт воис быд мортлы?
315. Чувки кыысьлӧн вӧлі кыӧма 5 гоз чувки. Сы ордӧ пырисны ньӧбасьны 5 ныв и босьтісны став чувкисӧ ӧтмындаӧн. Кымын гозйӧн босьтіс быд ныв?
316. Иван, Ильӧ да Семӧ вундісны 9 вугыршайт и юксисны ӧтмындаӧн. Кымын вугыршайтӧн босьтіс быд детина?
317. Нёль детиналӧн вӧлі 4 гоз лямпа. Кымын гозйӧн вӧлі быд детиналӧн?
318. Ӧпрӧсь юкис 8 шег 2 пельӧ. Кымын лои быд чукӧрын? Сэсся бӧр ӧтлааліс да юкис выльысь 4 пельӧ нин. Кымын лои быд чукӧрын? Сэсся бара ӧтлааліс ставсӧ да юкис 8 пельӧ. Кымын шег лои быд чукӧрын?
319. Квайт лист кабалаысь велӧдчысь вурис 2 ӧткодь тетрадь. Кымын листа лои сылӧн быд тетрадь?
320. 2 аршын нойысь мынтӧма 10 шайт. Дона-ӧ сулалӧ ӧти аршыныс?
321. Велӧдысь сетіс 8 тетрадь 8 велӧдчысьлы. Кымын тетрадьӧн сійӧ сетіс быд мортлы?
322. Куим жырӧ сувтӧдісны ӧтмындаӧн 9 улӧс. Кымын улӧсӧн лоӧ быд жырын?
* * *
323. Семеновна кыис 8 кепысь. Кымын гоз сійӧ лоӧ?
324. Ӧкмыс ур пукалӧны кымынкӧ пу вылын. Быд пу вылын 3 урӧн. Кымын пу вылын найӧ пукалӧны?
325. Вайисны 6 кер, быд вайӧмӧн 2 керӧн. Кымынысь кайлісны керйысла?
326. Педӧр лыддьӧ 5 лист бокӧн ӧти часӧн. Кымын часӧн лыддяс 10 лист бок?
327. Вурсьысь вурис 4 аршынысь челядь дӧрӧм. Быд дӧрӧм вылӧ мунӧ 2 аршын. Кымын дӧрӧм сійӧ вурис?
328. Кымынкӧ капканӧ шеді 5 кӧч, ӧти кӧчӧн быд капканӧ. Кымын капкан вӧлі пуктӧма?
329. Кымынкӧ чой печкисны ӧти рытӧ 3 чӧрс, ӧти чӧрсӧн быд чой. Кымын чой вӧлі?
330. Дорсьысь вузаліс кымынкӧ ньӧбысьлы 2 черӧн. Ставыс сылӧн вӧлі 6 чер. Кымын мортлы сійӧ вузаліс?
331. Крестьянин кисьтіс 8 пудовня сю мешӧкъясӧ, быд мешӧкӧ 4 пудӧн. Кымын мешӧкӧ сійӧ кисьтіс сюсӧ?
332. Пӧль ньӧбис 7 преник и сетіс челядьыслы морт ӧти преникӧн. Кымын челядьлы тырмис?
333. Кымын парта ковмас 10 мортлы, быд парта сайӧ кӧ пуксяс 2 мортӧн?
334. Мам лӧсьӧдіс нывъясыслы 4 гоз кӧті, кык гозйӧн быд нывлы. Кымын сылӧн нылыс?
335. Мам вайис челядьлы пызан вылӧ 6 пӧсь шаньга. Кымын сылӧн челядьыс, быд мортлы кӧ воис 3 шаньгаӧн?
336. Кымын пӧткалӧн лоӧ 10 кок?
337. Кык ныв-посни вӧчисны ворсігӧн сёйысь 10 кӧвдум, юкисны шӧриӧн. Кымын кӧвдумӧн воис ӧти пай вылӧ?
338. Челядь вотісны 9 пестер пув. Коймӧд юкӧнсӧ найӧ вузалісны. Кымын пестер пув вузалісны?
339. Баба босьтіс 8 аршын ситеч. Джынсӧ видзис ковта вылӧ. Кымын аршын муніс ковта вылас?
340. Паладьлӧн мӧскыс лысьтӧ кык кринча йӧв. Ӧтчыд лысьтӧм бӧрас мӧскыс чужйис, йӧлыс киссис и коли сӧмын джынйыс. Кымын кринча йӧв лои сійӧ лунӧ Паладьлӧн?
341. Бабалӧн вӧлі 8 шайт сьӧм. Нёльӧд юкӧнсӧ сійӧ видзис. Кымын шайт сійӧ видзис?
342. Гуын вӧлі 9 мешӧк картупель. Коймӧд юкӧныс сісьмис, лои шыбитны. Кымын мешӧк картупель шыбитісны?
343. Лавкаын вӧлі 10 аршын ной. Витӧд юкӧнсӧ вузалісны. Кымын аршын вузалісны?
344. Жытникын вӧлі 8 пуд рудзӧг пызь. Нёльӧд юкӧнсьыс пӧжалісны нянь. Кымын пудысь пӧжалісны нянь?
345. Велӧдчысьлы колӧ вӧлі тӧдӧдны 6 задача. Сійӧ тӧдӧдіс сӧмын джынсӧ. Кымынӧс сійӧ тӧдӧдіс?
346. Керкаын 2 пач. Ӧти пачас тӧлысьнас мунӧ ӧти сыв пес, мӧдас кыкысь унджык. Кымын сыв пес мунӧ тӧлысьӧн мӧд пачас?
347. Кепысь вылӧ мунӧ кык тупыль вурун, а чувки вылӧ кык сы мында. Кымын тупыль вурун мунӧ чувки вылӧ?
348. Вӧрын сулалӧны орччӧн 2 коз — ыджыд да ичӧт. Ичӧтыс ӧти аршын судта, ыджыдыс вит сы кузя. Кымын аршын судта ыджыд козйыс?
349. Ирина печкис 4 чӧрс сунис, Машӧ кык мындаӧн этшаджык. Кымын чӧрс печкис Машӧ?
350. Ӧти грездӧдз 4 верст, мӧдӧдз кык мындаӧн матынджык. Кымын верст мӧд грездӧдз?
351. Вок 6 арӧса, чой куим мындаӧн томджык. Кымын арӧс чойлы?
352. Ӧти видз вылысь ми вайим 10 додь турун, мӧд вылысь вит мындаӧн этшаджык. Кымын додь турун вайим ми мӧд видз вылысь?
353. Аршын ситеч сулалӧ 1 шайт, ной — дас сымында. Кымын шайт сулалӧ ӧти аршын нойыс?
354. Дядьӧлӧн вӧлі кык гез: ӧтиыс 10 аршына, мӧдыс кык мындаӧн дженьыдджык. Кузь-ӧ вӧлі мӧд гезйыс?
355. Батьӧ ньӧбис пызан да улӧс. Пызанысь сійӧ сетіс 6 шайт, улӧсысь куим мындаӧн этшаджык. Кымын шайт сулалӧ улӧсыс?
356. Ӧти гӧрысь гӧрис 9 лун, мӧдыс куим мындаӧн этшаджык. Кымын лун гӧрис мӧд уджалысь?
357. Мамӧ ньӧбис 2 тув кукань яй, сэсся нёль сымында мӧс яй. Кымын тув мӧс яйсӧ ньӧбис мамӧ?
358. Семьяын 2 гырысь морт да 4 челядь. Кымын пӧв челядьыс унджык гырысь йӧзсьыс?
359. Крестьянинлӧн 3 мӧс да 6 ыж. Кымынысь мӧскыс этшаджык ыжсьыс?
360. Баба сывдіс 2 тасьті вый. Ӧти тасьтіыс кыскӧ 3 тув, мӧдыс 6 тув. Код тасьтіыс сьӧкыдджык? Кымын пӧв?
361. Вӧвлы 8 арӧс, мӧслы 4. Кодыс томджык? Кымын пӧв?
362. Чой сёйис 2 блин, вок квайтӧс. Кодыс сёйис унджык, кымын пӧв?
363. Кык мужик кыскалісны пес. Ӧтиыс вайис 10 сыв, мӧдыс 2. Кодыс вайис этшаджык, кымын пӧв?
Нёль пӧлӧс арталӧм
365. Йӧв выв вежонӧ вӧлӧн вӧлӧсьт кузя ӧти зон муніс нёльысь, мӧд — кыкысь унджык, коймӧд куимӧн этшаджык мӧдсьыс. Кымынысь муніс коймӧд вӧла?
386. Детиналӧн вӧлі 9 лист кабала. Сійӧ вурис 2 тетрадь, быд тетрадьӧ видзис 4 листӧн. Кымын лист кабала сылӧн коли?
367. Крестьянинлӧн вӧлі 6 кер. Коймӧд юкӧнсӧ сійӧ видзис. Кымын кер сылӧн коли?
368. Бать ветліс базар вылӧ, вайис челядьлы гӧснеч. Кык нывлы сетіс 2 аканьӧн, кык пилы 3 чипсасянӧн. Кымын гӧснеч сійӧ вайис?
369. Ӧти морт сёйӧ лунӧн 2 тув нянь. Семьяын 5 морт. Кутшӧмкӧ лунӧ 3 морт эз вӧвны гортас. Кымын тув нянь сёйис тайӧ семьяыс сійӧ лунӧ?
370. Ытшкысь уджаліс кыклаын 2 лунӧн. Быд уджалӧм лунысь сылы сетісны 2 шайтӧн. Кымын шайт босьтіс уджалысь?
371. Маръя печкӧ ӧти чӧрсӧн быд лун вежалун кындзи. Ӧти вежонӧ сійӧ печкис 5 чӧрс. Кымын вежалун вӧлӧма сійӧ вежонас?
372. Кык тывъялысь кыйисны 9 ведра чери. Тыв кӧзяиныс босьтіс кык пай, мӧдыслы сетіс ӧти пай. Кымын ведра чери лои быд тывъялысьлӧн?
373. Кык детина кутісны 5 кайӧн. Гортӧ локтігӧн налӧн 2 кай мынісны кисьыс, лэбзисны. Коляссӧ юкисны найӧ ӧтмындаӧн. Кымын кайӧн лои быд детиналӧн?
374. Куим вок мӧдлапӧлӧ вуджигӧн лыйисны морт 2 уткаӧн. Гортын мамыс 2 утка пуис. Кымын утка ещӧ коли?
375. Куим ув вылын пукалісны 3 чикышӧн. 2 чикыш лэбзисны. На местаӧ локтісны ещӧ 3-ӧн. Кымын лэбач лои пу вылын?
376. Кӧсьталӧн вӧлі 7 чипан кольк. Сійӧ ньӧбис ещӧ 3-ӧс, сэсся ставсӧ юкис 5 ёртлы ӧтмындаӧн. Кымын колькӧн лои морт вылӧ?
377. Пу вылын пукаліс 7 ур. Вӧралысь лыйис ӧти урӧс, мукӧдыс повзисны да чеччалісны 3 пу вылӧ ӧтмындаӧн. Кымын ур лои быд пу вылын?
378. Кӧч кыйысьлӧн вӧлі 10 кӧч туша, 2 туша сійӧ колис аслыс, мукӧдсӧ вузаліс 2 кӧч тушаӧн ньӧбысьлы. Кымын кӧч ньӧбысь вӧлі?
379. Велӧдысь сетіс кабала 3 велӧдчысьлы, 2-лы сетіс 2 листӧн, коймӧдыслы 3-ӧс. Кымын лист кабала юкліс велӧдысь?
380. Детина ньӧбис кабала 4 ур дон, перӧ 2 ур дон. Деньгаыс сылӧн вӧлі 10 ур. Уна-ӧ здача сылы сетісны?
381. Кык чой мунісны тшак вотны. Ӧтиыс аддзис 6 тшак, мӧдыс куимысь этшаджык. Кымын тшак аддзисны кыкӧн ӧтлаын?
382. Ӧти видзвылын пуктісны 4 пинькост турун, мӧдын кыкысьӧн унджык. Кымын пинькост турун пуктісны кык видзвылын?
383. Вурсьысьлы вайисны 10 аршын ситеч, тшӧктісны вурны 2 дӧрӧм. Быд дӧрӧм вылӧ муніс 4 аршынӧн. Кымын аршын ситеч коли?
384. Кык вундысь вундісны зӧр. Воддзаыс вундіс 8 чумали, мӧдыс нёльысь этшаджык. Кымын чумали вундісны кыкӧн?
385. Кык карандаш сулалӧ 6 ур. Кымын ур сулалӧ 3 карандаш?
386. Чожӧлӧн 3 пи. Ичӧтыслы 2 арӧс, шӧркостыс кык пӧв ыджыдджык сыысь, ыджыдыс 3 арӧсӧн ыджыдджык мӧдсьыс. Кымын арӧса мед ыджыд пиыс?
387. 2 воклы уджалӧмысь сетісны 10 шайт. Витӧд юкӧныс вылӧ найӧ ньӧбисны мамыслы чышъян, кольӧмсӧ юкисны шӧриӧн. Кымын шайтӧн налы коли?
388. 10 шайтысь босьтісны 2 пызан да 2 улӧс. Ӧти улӧсыс сулалӧ 2 шайт. Кымын шайт сулалӧ ӧти пызаныс?
389. Ӧти зептын менам 6 шайт, мӧдын куимысь этшаджык. Кымын шайт менам кык зептын?
390. Кык морт ньӧбисны 2 тупӧсь нянь. Ӧти тупӧсьыс вӧлі 3 тувъя, мӧдыс 5 тувъя. Став няньсӧ найӧ юкисны шӧри. Кымын тув нянь воис морт вылӧ?
391. Лавкаын 3 бӧчка карасин. Ӧтиын 4 ведра, мӧдын нёль пӧв этшаджык, коймӧдын кыкӧн унджык мӧд бӧчкасьыс. Кымын ведра карасин куимнан бӧчкаас?
392. Доддьын вайисны 2 мешӧк пызь. Ӧти мешӧкас пуктылӧмаӧсь 3 пуд пызь, мӧдас 4. Воддза мешӧкыс вӧлӧм розя, вайигас дзонь пуд пызь киссьӧма. Коляс пызьсӧ мешӧкъяссьыс ректісны 3 йӧртӧдӧ ӧтмындаӧн. Кымын пуд пызь лои быд йӧртӧдын?
393. Крестьянинлӧн вӧлі 8 кер. Нёльӧд юкӧнсӧ сійӧ сетіс орчча керкасаыслы водзӧсӧн. Кымын кер сылӧн ещӧ коли?
394. Уджалысь босьтіс быд уджалӧм лунысь 2 шайтӧн. Сійӧ уджаліс кыклаын, босьтіс 10 шайт. Ӧтилаас уджаліс 2 лун. Кымын лун уджаліс мӧдлаас?
395. Иванлы батьыс сетӧ быд тӧлысь 3 шайтӧн. Куим тӧлысь бӧрын Иван ньӧбис кык шапка — аслыс да вокыслы, мынтіс быд шапкаысь 3 шайтӧн. Уна-ӧ сылӧн коли деньгаыс?
396. Ичӧт нывлӧн вӧлі 7 ур. Сійӧ ньӧбис 2 тетрадь, да ещӧ на сылӧн коли 1 ур. Дона-ӧ сулалӧ ӧти тетрадьыс?
397. Кык детина видзисны мӧсъясӧс. Ӧтиыслӧн вӧлі 7 мӧс, мӧдыслӧн нёльӧн этшаджык. Кымын мӧс кык мӧс видзысьлӧн?
398. Ичӧт детина корсис вадорын галя. Сійӧ аддзис 3 гӧгрӧс да 5 кузьмӧс галя, пуктіс 4 галяӧн зептӧ. Кымын зептӧ сійӧ пуктіс?
399. Кык вок кыйисны рак. Ӧтиыслы шеді 5 рак, мӧдыслы 3. Нёльӧд юкӧнсӧ найӧ вузалісны, мукӧдсӧ вайисны гортас. Кымын ракӧс вайисны?
400. Керка водзын быдмӧ 6 пу. Коймӧд юкӧныс льӧм пу, мукӧдыс кыдз. Кымын кыдз сэні быдмӧ?
401. Велӧдчысьлӧн вӧлі 10 перӧ. 4 перӧ чегъясис, 3 ёртлы сетіс морт ӧти перӧӧн. Кымын перӧ сылӧн коли?
402. Ныв вузаліс 4 ньӧбысьлы ӧмидз, 2 тувйӧн быд мортлы. Аслыс ещӧ коли 1 тув. Кымын тув ӧмидз сылӧн вӧлі?
403. Ньӧбисны 10 аршын ной. Джынсьыс вурисны дукӧс. Дона-ӧ сулалӧ дукӧсыс, быд аршын нойысь кӧ мынтісны 2 шайтӧн?
404. Вӧралысь кыйис 4 дозмӧр, 2 тар, 4 сьӧла. Сійӧ вузаліс 2 ньӧбысьлы 2 пӧткаӧн. Мукӧдсӧ вузаліс кымынкӧ ньӧбысьлы 3 пӧткаӧн. Кымын ньӧбасьысь вӧлі ставыс?
405. Кодлӧнкӧ вӧлі 3 мӧс Быд тӧлысь налы колӧ вӧлі 6 додь турун. Сёйисны найӧ ӧтмындаӧн. Сэсся ӧти мӧс начкисны. Кымын додь турун кутіс бырны быд тӧлысьӧн?
406. Крестьянинлӧн вӧлі 3 еджыд да 3 сьӧд ыж. 4 ыж сійӧ колис аслыс, мукӧдсӧ вузаліс. Быд ыжысь босьтіс 4 шайтӧн. Мый дон вузаліс?
407. Туй кузя мунісны 8 вӧв. Ӧти пара вӧв вӧлі сьӧд, мукӧдыс ӧтмындаӧн еджыд да гӧрд. Кымын вӧлі еджыд вӧлыс?
408. Мам сетіс челядьлы 10 кампет. Ичӧт кагаыслы сетіс ӧтиӧс, мукӧдыслы 3 кампетӧн. Кымын челядь сылӧн вӧлі?
409. Пач вӧчысь выльдіс кык пач. Ӧти пач вылас ковмис 5 кирпич, мӧдас кыкӧн этшаджык. Вӧчигас сылӧн ӧти кирпич жугалі. Кымын кирпич видзис сійӧ ставсӧ?
Сёӧдз
Содтӧм, чинтӧм дасъясӧн
425. Уджалысьлы сетісны уджысь 50 шайт, да сылӧн аслас вӧлі 10 шайт. Став деньга доныс сійӧ ньӧбис пась. Кымын шайт сулалӧ пасьыс?
426. Баба вузаліс петукӧс да курӧгӧс. Курӧгысь босьтіс 60 ур, петукысь 40 ур. Уна-ӧ дон вузасис баба?
427. Кык баба вундісны ид. Ӧтиыс вундіс 50 кольта, мӧдыс 30 кольта. Кымын кольта найӧ вундісны?
428. Ыджыд тшанын вӧлі 70 ведра ва. Сэтчӧ ещӧ кисьтісны 20 ведра. Кымын ведра ва лои тшанын?
429. Кык град вылӧ вӧлі пуктӧма капуста. Ӧтиас артмис 30 мач, мӧдас 40. Кымын мач артмис кык град вылӧ?
430. Часі вӧчысь вузаліс 10 зарниа часі да 30 эзысь часі. Кымын часі сійӧ вузаліс?
431. Школаын велӧдчӧны 60 детина да 30 ныв. Кымын челядь велӧдчӧны школаын?
432. Пывсян вӧчны вайисны войдӧр 70 кер, сэсся эз тырмы да содтісны 10 кер. Кымын кер колӧ вӧлі пывсян вӧчны?
433. Дядьӧ вузаліс 30 сыв кыдз пу пес, сэсся 20 сыв коз пу пес. Кымын сыв пес сійӧ вузаліс?
434. Лавкаын ӧти помаын кольӧма 30 аршын ситеч, да сэтысь вӧлі вузалӧмаӧсь нин 30 аршын. Кымын аршын вӧлӧма дзонь помаас?
435. Кык чойлӧн вӧліны эзысь паньяс. Ӧтиыслӧн вӧлі 10 пань, мӧдыслӧн 20. Кымын пань налӧн вӧлі?
436. Крестьянин мӧдӧдчис карӧ. Сійӧ муніс нин 30 верст. Коли ещӧ 30 верст. Кымын верст сайын вӧлӧма карыс?
437. Кык классын 50 велӧдчысь. Ӧтиас 20. Кымын мӧдас?
438. Шкапын ӧти джаджйын 70 нига, мӧдын 30 нигаӧн этшаджык. Кымын нига мӧд джаджъяс?
439. Пиля гӧтыр кыис 80 аршын дӧра. 40 аршын сетіс мунӧм нылыслы. Кымын аршын коли аслыс?
440. Детиналӧн вӧлі 90 ур. 20 ур дон сійӧ ньӧбис рисуйтчан краска. Уна-ӧ деньга сылӧн коли?
441. Энькалы 50 арӧс, ичмоньыс 30 арӧсӧн томджык. Кымын арӧс ичмоньыслы?
442. Кыкнан туй бокын сулалӧны керкаяс. Веськыдладорас 40 керка, шуйгаладорас 10 керкаӧн этшаджык. Кымын керка шуйгаладорас?
443. Вевтулын 30 сыв пес, керка водзын 10. Кымын сывйӧн этшаджык керка водзын?
444. Крестьянин ньӧбис табак сё шайт дон. Сьӧмыс сылӧн сьӧрсьыс сӧмын 70 шайт вӧлӧма. Кымын шайт сылӧн эз тырмы?
445. Баба печкис 40 тӧб сӧддзысь да 50 тӧб пачӧсысь. Кымын тӧбйӧн этшаджык лои сӧдз сунисыс?
446. Стӧрӧж босьтіс 80 шайт жалӧванньӧ. 20 шайт сійӧ видзис босьтан лунас. Кымын шайт сылӧн ещӧ коли?
447. Ӧти грездын вӧлі 80 керка. Пӧжар дырйи 30 керка сотчис. Сы бӧрын лэптісны 20 выль керка. Кымын керка лои грездын?
448. Бабалӧн вӧлі чӧжӧма 170 кольк. 30 кольк сійӧ вузаліс, мукӧдсӧ колис аслыс, на пиысь 10 кольк тшыкӧма. Кымын бур кольк коли бабалӧн?
449. Митрейлӧн вӧлі ӧти шайт. Сійӧ ньӧбис истӧг 30 ур дон, сунис 40 ур дон. Кольӧм сьӧм вылас ньӧбис ӧрешки. Мый дон ньӧбис сійӧ ӧрешкисӧ?
450. Кык вок мунісны кер лэдзны. Ӧтиыс пӧрӧдіс 40 кер, мӧдыс 30 керӧн унджык. Кымын кер найӧ пӧрӧдісны кыкнанныс?
451. Эня-ныла нетшкисны шабді. Мамыс нетшкис 50 кольта, нылыс 10 кольтаӧн этшаджык. Кымын кольта найӧ нетшкисны?
452. Яй вузалысь ньӧбис 2 мӧс. Ӧтиыс сулаліс 50 шайт, мӧдыс 40. Сьӧмыс сылӧн вӧлі 100 шайта. Уна-ӧ сетісны сылы сдача?
453. Жытникын вӧлі 30 пуд сю пызь да 20 пуд ид пызь. 40 пуд вузалісны. Кымын пуд сэні коли?
454. Пызан вылын вӧлі 30 газет, сэтчӧ вайисны ещӧ 40 газет. Сэсся 50 сетісны лыддьысьяслы. Кымын газет коли пызан вылын?
455. Кык град вылӧ вӧлі пуктӧма галанка. Ӧтиас 60 галанка, мӧдас 20 галанкаӧн этшаджык. Кымын галанка вӧлі пуктӧма кык град вылӧ?
456. Крестьянин кераліс потш кык лун. Ӧти лунас кераліс 30 потш, мӧд лунас 10 потш, 20 потш сэсся сійӧ видзис. Кымын потш коли сылӧн?
457. Дядьӧ вузаліс 40 шайт дон турун да 50 шайт дон нянь. Босьтӧм сьӧм вылас ньӧбис вӧв да мӧс. Мӧс вылас сетіс 30 шайт. Уна-ӧ мынтіс вӧвсьыс?
458. Дьӧгӧдь вӧчысь кӧсйысис вӧчны 100 ведра дьӧгӧдь. Ӧти вежонӧ сійӧ вӧчис 40 ведра дьӧгӧдь, мӧд вежонӧ 30. Кымын ведра дьӧгӧдь коли ещӧ сылы вӧчны?
459. Школаын велӧдчисны 20 ныв да 30 детина. Выль восянь локтісны ещӧ 30 челядь. Кымын велӧдчысь лои школаын?
460. Бабалӧн вӧлі 40 аршын дӧра. Сійӧ вузаліс 30 аршын. Сы бӧрын выльысь кыис 20 аршын. Кымын аршын дӧра сылӧн лои?
461. Лавкаын вӧлі чувки кыан ем 3 чукӧрын. Медводдзаас вӧлі 20 ем, мӧдас 40 ем, коймӧдас 30. Ӧти лунӧ сэтысь вузалісны 50 ем. Кымын ем коли лавкаын?
462. Чери кыйысьлы шеді 80 чери. Сэні вӧлі 20 ёкыш, 30 сын, мукӧдыс сир. Кымын сир сылы шеді?
463. Ӧти нига сулалӧ 60 ур, мӧд 20 урӧн донтӧмджык. Дона-ӧ сулалӧны кыкнан нигаыс?
464. Мамӧлӧн вӧлі 80 шайт сьӧм. Сійӧ ньӧбис яй да пызь. Яйысь колӧ вӧлі сетны 40 шайт, пызьысь 50. Кымын шайт сылӧн оз судзсьы?
465. Кык вӧралысь мунісны сьӧла кыйны. Ӧтиыс кыйис 30 сьӧла, мӧдыс 20 унджык. Кымын сьӧла найӧ кыйисны кыкӧн?
466. Кык блюдйӧ пуктісны сӧчӧн. Ӧтиас пуктісны 40 сӧчӧн, мӧдас 10 этшаджык. Кымын сӧчӧн вӧлі кыкнан блюдъяс?
Ӧктӧм, юкӧм
[...]
482. Магазеяӧ вайисны нёль додь сю. Быд доддьын вӧлі 20 пуд. Уна-ӧ сю вайисны ставсӧ?
483. Мужиклӧн вӧлі куим помча (чери кыян угоддьӧ). Ӧти асыв сылы шеді быд помчаӧ 30 чериӧн. Кымын чери шеді сылы сійӧ асыв?
484. Ӧти пудын 40 тув. Кымын тув кык пудын?
485. Ӧти зептын менам 20 шайт, мӧдын куим сымында. Кымын шайт мӧд зептын?
486. Исерга сулалӧ 10 шайт, чунькытш кык сымында. Дона-ӧ сулалӧ чунькытш?
487. Быд рыт ме лыддя 20 лист бок. Кымын листбок лыддя куим рытӧн?
488. Мужик петіс ӧти грездысь, муніс шойччытӧг мӧд грездӧ 4 час. Быд час муніс 10 верстӧн. Кымын верст кык грезд костын?
489. Уна-ӧ ковмас мынтыны, босьтан кӧ 3 аршын ситеч 30 урӧн аршын?
490. Пилитісны 7 кер. Быд керысь артмис 10 пӧв. Кымын пӧв лои ставыс?
491. Дорччысь сетіс кык лавкаӧ 50 томанӧн. Кымын томан сійӧ вӧчлӧма?
492. Детиналы 10 арӧс, пӧльлы квайт сы мында. Кымын арӧс пӧльлы?
493. Ӧти вежонӧ ныв кыӧ 20 аршын прӧшви. Кымын аршын сійӧ кыас 4 вежонӧн?
494. Ӧти тупӧсь нянь кыскӧ 10 тув. Кымын тув нянь босьтіс мужик, ньӧбис кӧ сійӧ 3 тупӧсь?
495. Тулысын кодйисны канава 4 лун, быд лун 20 аршынӧн. Кузь-ӧ канава кодйисны?
496. Кык чой юкисны 40 аршын дӧра ӧтмындаӧн. Кымын аршынӧн воис морт вылӧ?
497. Куим вӧлӧн мунісны 60 пуд няньла. Кымын пудӧн воас быд вӧлалы?
498. Кымын гид ковмас 60 ыжлы, быд гидӧ кӧ йӧртасны 20 ыжӧн?
499. Кык детина вузалісны нидзув ӧти шайт дон. Сьӧмсӧ найӧ юкисны шӧриӧн. Кымын урӧн воис морт вылӧ?
500. Баба ньӧбис 1 шайт дон паньяс, быд паньысь мынтіс 50 ур. Кымын пань сійӧ ньӧбис?
501. Вундісны 80 кольта сю. Сэсся чумалитісны, артмис 10 чумали. Кымын кольта быд чумалиын?
502. Мамлы 60 арӧс, пиыс кыкысьӧн томджык сыысь. Кымын арӧс пиыслы?
503. Ыджыдлун кежӧ менам вӧлі кольӧма 40 кольк. Джынсӧ ме мичӧді гӧрдӧн. Кымын кольк ме мичӧді?
504 Крестьянинлӧн вӧлі 60 ыж. Коймӧд юкӧныс вӧлі сьӧд. Кымын сьӧд ыж вӧлі сылӧн?
505. Мельничаысь вайисны 80 пуд пызь, кисьтісны кымынкӧ йӧртӧдӧ, быдӧ 20 пудӧн. Кымын йӧртӧдӧ кисьтісны пызьсӧ?
506. Детиналы сюри 60 тшак. Квайтӧд юкӧныс вӧлі номырӧсь. Кымын шогман тшак вӧлі сылӧн?
507. Ӧти детиналӧн 90 ур, мӧдлӧн 30 ур. Кодыслӧн унджык и кымынысьӧн (кымын пӧв)?
508. Ӧти пудын 40 тув. Кымын тув пуд джынйын?
509. Кымын тӧлысь кежӧ тырмас 50 пуд зӧр, быд тӧлысь кӧ сетны вӧвъяслы 10 пудӧн?
510. Уджалысь оліс крестьянин ордын 4 тӧлысь, босьтіс 80 шайт. Мыйӧн тӧлысь сійӧ медасьлӧма овны?
511. Детиналӧн вӧлі чача пыдди 30 истӧг доз. Коймӧд юкӧнсӧ сійӧ сетіс вокыслы. Кымын истӧг доз сетіс?
512. Дорччысь вӧчис 80 подков. 40 на пиысь вузаліс. Кымынӧд юкӧнсӧ сійӧ вузаліс?
513. Вузасьысь вузаліс 70 яблӧк кымынкӧ мортлы, 7 яблӧкӧн быдӧнлы. Кымын мортлы сійӧ вузаліс яблӧксӧ?
514. Крестьянин кӧдзис ӧти му вылӧ 10 пуд сю, мӧдӧ кык мында унджык. Кымын пуд сійӧ кӧдзис кыкнан му вылас?
515. Школаын велӧдчисны 30 ныв да кык сы мында детина. Кымын челядь велӧдчисны школаын?
516. Нывъяс весалісны град. Ӧти лунӧ весалісны 40 град, мӧд лунас кыкысьӧн этшаджык, коймӧд лунас 10 градйӧн унджык мӧд лунсьыс. Кымын град весалісны коймӧд лунас?
517. Миша ньӧбис кык 20 ура чача и куим 10 ура чача. Уна-ӧ сьӧм сійӧ видзис чачаяс вылас?
518. Бабалӧн вӧлі печкӧма 20 ректан сӧдз сунис да кык сы мында пачӧс сунис. Кымын ректан сунис вӧлі печкӧма ставыс?
519. Крестьянин ньӧбис вӧв. Сылы колӧ вӧлі сетны 80 шайт. Ӧтчыд сетіс 40 шайт, мӧдысь кыкысьӧн этшаджык. Кымын шайт ещӧ коли сылы мынтыны?
520. Лавкаын вӧлі 2 пуд карасин (пудын 40 тув). Сэтысь вузалісны 6 мортлы 10 тувйӧн, мукӧдсӧ кольӧдісны лавкаас. Кымын тув карасин коли лавкаас?
521. Ӧти сиктын медасисны кер лэдзны 30 мужик, кыкысьӧн этшаджык нывбаба, челядь сы мында, кымын мужик и баба ӧтлаын. Кымын челядь медасьӧма?
522. Матрен босьтіс лавкаысь 2 тув майтӧг 30 урӧн тув, да 10 ур дон кизь. Уна-ӧ сдача сылы сетасны 80 урысь?
523. Детина видзис вӧвъяс, мӧсъяс да ыжъяс. Вӧлыс сылӧн вӧлі куим, мӧскыс сизимӧн унджык, ыжыс кык пӧв унджык мӧссьыс. Кымын ыж вӧлі сылӧн?
524. Крестьянин вузаліс нёль порсь 10 шайтӧн. Босьтӧм сьӧм вылас ньӧбис мӧс, 30 шайтысь. Кымын шайт ещӧ сылӧн коли?
525. Куим уджалысь вайисны вӧрысь ӧтмындаӧн 60 кер. Кымын кер ваясны 5 уджалысь, кутасны кӧ ваявны быд морт сы мындаӧн жӧ?
526. Лавкаын вӧлі 30 тув ма. Сійӧс босьтісны кымынкӧ морт, 10 тувйӧн. Сэсся ставныс найӧ босьтісны ещӧ 20 тувйӧн сакар. Кымын тув сакар босьтісны найӧ?
527. 80 яблӧк пуктісны ӧтмындаӧн 4 дозйӧ. Кымын яблӧк лои 3 дозйын?
528. Колӧ вӧлі кодйыны канава 70 сыв кузя. Уджалісны 3 лун, быд лун кодйисны 20 сывйӧн. Кымын сыв коли кодйыны?
529. Баба босьтіс ӧти чышъян, 3 аршын лента. Мынтіс ставсьыс 90 ур. Чышъяныс сулалӧ 30 ур. Дона-ӧ сулалӧ 1 аршын лента?
530. Пода мунӧ 5 верст ӧти часӧн, вӧла 5 верстӧн унджык. Кымын верст мунас вӧла 4 часӧн?
531. Чугун кыскӧ 10 тув, пӧрт — куим сы мында. Кымын тув кыскӧны чугун да пӧрт ӧтлаын?
532. Ме тӧрыт лыдди кык нига. Ӧтиыс 60 лист бок, мӧдыс кыкысьӧн этшаджык. Кымын лист бок ме лыдди тӧрыт?
533. Кодлӧнкӧ вӧлі 60 аршын гез. Сэтысь вундісны войдӧр коймӧд юкӧнсӧ, сэсся мый коли сылысь джынсӧ. Кузь-ӧ коли гезйыс?
534. Куим уджалысьлы сетісны 70 шайт. Ӧтилы сетісны 20 шайт, мӧдлы 40. Уна-ӧ сьӧм сетісны коймӧдлы?
535. Детиналӧн вӧлі 50 галя. Сійӧ ставсӧ торйӧдіс куим чукӧрӧ: медводдзаас пуктіс 10 галя, мӧдӧ дасӧн унджык, мукӧдсӧ коймӧдӧ. Кымын галя пуктіс коймӧд чукӧрас?
536. Ӧксинь вузаліс 4 тув сэтӧр 20 урӧн тув. Став сьӧм вылас босьтіс кымынкӧ 10 ура пань. Кымын пань сылы сетісны?
537. Гын сапӧг вӧчысь ӧти деревняын оліс 20 лун, мӧдын 10 лунӧн этшаджык, коймӧдын кык сы дыра, мыйда оліс мӧд деревняын. Кымын лун сійӧ ветлӧдліс?
538. Заводӧ уджавны ӧти деревняысь мунісны 30 мортӧн мужик да баба, да 20 челядь. Джынйыс ставсьыс локтісны Ыджыдлун кежлӧ гортас. Кымын морт коли заводӧ?
539. Кык баба босьтісны 30 аршын дӧра. Ӧтиыс босьтіс 20 аршын, мукӧдсӧ — мӧдыс. Ньӧбӧм дӧрасьыс мӧд бабаыс вурис нылыслы платтьӧяс, 5 аршынысь быд платтьӧ. Кымын платтьӧ сійӧ вурис?
540. Лавкаын вӧлі 6 кудйын ӧтмындаӧн 60 резина мач. Нёль кудйысь вузалісны ставсӧ. Кымын мач коли лавкаын?
541. Куимӧн мунісны тывъявны. Ӧтчыд налы шеді 30 чери, мӧдысь 40, коймӧдысь 20. Став черисӧ найӧ юкисны ӧтмындаӧн. Кымын чериӧн воис морт вылӧ?
542. Кык вӧралысь лыйисны 90 ур. Кор найӧ вузалісны ӧтмындаӧн, ӧтиыслӧн коли 20 ур, мӧдыслӧн 30 ур. Кымын урӧн вӧлі налӧн вузавтӧдзыс?
[...]
586. Ӧти вежонӧ миянӧ пыралісны шойччыны 10 ветлысь-мунысь, мӧдӧ 7. Кымын ветлысь-мунысь пыралісны миянӧ?
587. Сьтэпан мӧдӧдчис вӧлӧн вала. Сійӧ босьтіс 2 пельса. Ӧтиас тӧрӧ 6 ведра, мӧдас 10 ведра. Кымын ведра ва сійӧ вайис?
588. Бабалӧн ӧти чипан пӧжис 10 чипан пи, мӧдыс 5. Кымын чипан пи лои бабалӧн?
589. 30 морт мунісны асывводз туй вӧчны. Сёрӧнджык на дінӧ локтісны 17 морт. Кымын туй вӧчысь кутісны уджавны?
590. Магазея кумын веситісны сю. Войдӧр пуктісны 20 пудӧвӧй гира, сэсся содтісны 5 пуда гира. Кымын пуд кыскис сюыс?
591. Мужик кераліс вӧрын 14 коз, 30 пожӧм. Кымын пу сійӧ кераліс?
592. Пилитчысьяс пилитісны пажынӧдз 6 кер, пажын бӧрын 14 кер. Кымын кер налӧн лои пилитӧма?
593. Видз вылын уджалісны 11 мужик да 9 баба. Кымын уджалысь вӧлі видз вылын?
594. Велӧдысь сетіс морт ӧти карандашӧн 23 детиналы да 17 нывлы. Кымын мортлы сійӧ сетіс карандашсӧ?
595. Дорсьысь дорис 42 гырысь кӧрт тув да 28 посниӧс. Кымын кӧрт тув сійӧ дорис ставсӧ?
596. Сапӧг вӧчысь вурис 22 гоз сапӧг, кӧкъямысӧн унджык сапожки. Кымын гоз сапожки сійӧ вурис?
597. Детиналы шеді вуграсигӧн 7 йӧрш, 20 ёкыш да 2 ляпа. Кымын чери сылы шеді?
598. Педӧр 11 арӧса, Ёгор 3 арӧсӧн ыджыдджык. Кымын арӧс Ёгорлы?
599. Школаын велӧдчисны 74 морт. Тӧвнас ещӧ локтісны нёльӧн. Кымын велӧдчысь лои школаын?
600. Босьтісны лавкаысь 16 шайт дон ной, 33 шайт дон шӧвк. Кымын шайт лои мынтыны?
601. Детиналы тшӧктісны 24 дінӧ содтыны 53. Сылӧн лои 78. Кужис эз сійӧ артавны?
602. Челядь ворсісны карӧн. Ӧтиладорас вӧлі 11 морт, мӧдладорас 12 морт. Кымынӧн ворсісны?
603. Кӧч кыйысьлы шеді ӧти вежонӧ 23 кӧч, мӧд вежонӧ 12 кӧч. Кымын кӧч сылы шеді 2 вежонын?
604. Машалӧн вӧлі 54 шег, пӧчыс сылы студень вӧчӧм бӧрын сетіс ещӧ 8 шег. Кымын шег лои Машалӧн?
605. Велӧдчысь ньӧбис 25 ур дон кабала да 5 урысь карандаш. Уна-ӧ сьӧм сійӧ видзис?
606. Кык ныв катлісны ва капуста киськавны. Ӧтиыс катӧдіс 44 ведра, мӧдыс 37 ведра. Кымын ведра ва ковмис град киськавны?
607. Талун менам мам пӧжаліс 17 пирӧг, ид няньсӧ 14-ӧн унджык. Кымын ид нянь сійӧ пӧжаліс?
608. Баба кыис 18 аршын еджыд дӧра, 28 аршын сера дӧра. Кымын аршын дӧра сійӧ кыис ставсӧ?
609. Кык сиктысь медасисны кер лэдзны. Ӧти сиктсьыс медасис 53 морт, мӧдсьыс 28. Кымын морт медасис кер лэдзны?
610. Ӧти му вылын вундісны 76 кольта зӧр, мӧд вылын 15 кольтаӧн унджык. Кымын кольта зӧр вундісны мӧд му вылын?
611. Жытник вӧчны вӧлі вайӧма 83 кер. Тшупигӧн эз тырмы, лои вайны ещӧ 9 кер. Кымын керйысь вӧчисны жытник?
612. Кӧч кыйысь вузаліс 36 еджыд кӧч ку, 37 руд кӧч ку. Кымын кӧч ку сійӧ вузаліс ставсӧ?
613. Крестьянин видзис ӧти йӧр вылӧ 48 потш, мӧд вылӧ 49 потш. Кымын потш сійӧ видзис ставсӧ?
614. Куим дозйын вӧлі карандаш: ӧтиын 7 дюжина, мӧдын 4 дюжина, коймӧдын 8 дюжина. Кымын дюжина карандаш вӧлі 3 дозйын?
615. Детина пуктіс ӧти чукӧрӧ 46 ӧрешки, мӧдӧ 17, коймӧдӧ 16. Кымын ӧрешки вӧлі 3 чукӧрын?
616. Микайлӧ вузаліс карын 7 шайт дон анькытш, 16 шайт дон сёркни да кушман, 53 шайт дон нянь, 24 шайт дон ур куяс. Уна-ӧ сьӧм сійӧ босьтіс ставсьыс?
617. Вӧралысь вузаліс 24 сьӧла, сылӧн гортас коли ещӧ 8 сьӧла. Кымын сьӧла сылӧн вӧлі кыйӧма?
618. Крестьянин уджаліс вӧрын 17 лун. Вежалун кежӧ воліс гортас, да сы бӧрын бара уджаліс вӧрас 24 лун. Кымын лун сійӧ оліс вӧрын?
619. Мамӧ ньӧбис 19 аршын ситеч. 8 аршын видзим Сашуклы сарапан вылӧ. Кымын аршын ситеч ещӧ коли?
620. Марпа аддзис 27 гоб. 7 гоб вӧлі сісь, найӧс лои шыбитны. Кымын гоб Марпалӧн коли?
621. Вӧралысь кыйис 89 сьӧла. Сійӧ аслыс колис 8 сьӧла, мукӧдсӧ вузаліс. Кымын сьӧла вузаліс вӧралысь?
622. Баба печкис ӧти вежонӧ 29 чӧрс шӧрт, мӧдӧ 7 чӧрсӧн этшаджык. Кымын чӧрс шӧрт печкис сійӧ мӧд вежонӧ?
623. Детиналӧн вӧлі пилитӧма 16 кар (городки). 6 кар сійӧ воштіс. Кымын кар сылӧн коли?
624. Матрен чӧжис 15 тув вый. 9 тув сійӧ вузаліс, мукӧдсӧ колис аслыс. Кымын тув вый коли Матренлӧн?
625. Бать вайис мельничаыс 18 пуд пызь. 9 пуд пуктіс мӧд керкаӧ, мукӧдсӧ петкӧдіс жытникӧ. Кымын пуд пызь петкӧдіс жытникӧ?
626. Кык чой нетшкисны шабді. Ӧтиыс нетшкис 35 кольта, мӧдыс 16 кольтаӧн этшаджык. Кымын кольта нетшкис мӧд чойыс?
627. Ме пукті йӧрӧ 14 сэтӧр пу. Квайт сэтӧр пу кулі. Кымын пу коли менам йӧрӧ?
628. Ныв кыис кык сикас прӧшви. Ӧти сикассӧ кыис 44 аршын, мӧд пӧлӧссӧ 26 аршынӧн этшаджык. Кымын аршын прӧшви сійӧ кыис мӧд сикассӧ?
629. Батьлы да пилы ӧтлаын 45 арӧс. Батьлы 39 арӧс. Кымын арӧса пиыс?
630. Гожӧмын жар лунӧ вӧрысь петісны 33 вӧв. 16 вӧв вӧлі гӧрд, мукӧдыс еджыд. Кымын вӧлі еджыд вӧлыс?
631. Бабалы колӧ вӧлі зуавны 73 тор кудель. Ӧти лунӧ сійӧ зуаліс 57 тор, мукӧдсӧ колис мӧд лун кежӧ. Кымын тор кудель коли зуавтӧм?
832. Кык пӧдруга косьтісны вузалӧм вылӧ чӧд. Ӧтиыс косьтіс 13 тув, мӧдыс 4 тувйӧн этшаджык. Кымын тув чӧд косьтіс мӧдыс?
633. Школаын ӧти дозйын вӧлі 95 перӧ, мӧдын 8 перӧӧн этшаджык. Кымын перӧ вӧлі мӧд дозйын?
634. Вӧчисны выль видз. Сэні колӧ вӧлі бертны 67 мыр. Ӧтчыд волӧмӧн бертісны 49 мыр. Кымын мыр коли бертны?
635. Ӧти вӧралысь лыйис пищальысь 53-ысь. 16 эз инмы. Кымынысь инмис?
636. Ичӧт Иван гӧтырлӧн вӧлі 1 шайт сьӧм. Сійӧ ньӧбис 53 урысь мужикыслы вӧнь. Уна-ӧ сьӧм сылӧн коли?
637. Вотісны 34 ведра пув. 18 ведра кисьтісны ӧти пельсаӧ, мукӧдсӧ мӧдӧ. Кымын ведра пув кисьтісны мӧд пельсаӧ?
638. Школаын стен вылын ӧшаліс 43 серпас. 24 серпас идралісны шкапӧ. Кымын серпас коли стен вылын?
639. Нигаын 74 лист бок. Сашӧ лыддис 45 лист бок. Кымын лист бок сылы кольӧ лыддьыны?
640. Иван висьталіс Машӧлы 14 нӧданкыв. Сійӧ тӧдіс сӧмын 8. Кымын нӧданкыв Машӧ эз тӧд?
641. Детиналы сетісны уджалӧмысь 43 ур. Сійӧ пуктіс сьӧмсӧ зептас, муніс гортас. Зептыс сылӧн розя вӧлӧма — 15 ур усьӧма кытчӧкӧ, вошӧма. Уна-ӧ сьӧм сылӧн кольӧма зептас?
642. Нывлы 12 арӧс. Сійӧ нёль во нин олӧ карын. Войдӧр овлӧма деревняын. Кымын во сійӧ олӧма деревняын?
643. Школаын велӧдчӧны роч да коми челядь, ставыс 70 морт. Рочыс 15 морт. Кымын коми велӧдчысь школаын?
644. Анна зэв радейтӧ дзоридз. Сійӧ пуктіс гырничьясӧ 16 дзоридз. Ӧтчыд сійӧ вунӧдіс найӧс киськавны, луныс вӧлі жар, 7 дзоридз дзикӧдз косьмис, кулісны. Кымын дзоридз коли Анналӧн?
645. Велӧдчысь кӧсйис разӧдны ёртъясыслы 24 чернила доз. Сеталігас сылӧн ящикыс уси, 6 чернила доз жугалі. Кымын дзонь чернила доз коли?
646. Баба сюйис пачӧ 43 пирӧг. Друг сылӧн кутіс кагаыс бӧрдны, уськӧдчис сійӧс бурӧдны. Пирӧгъясыд вуніны. Кор тӧд вылас уси, кутіс найӧс кыскавны, 21 пирӧг сотчӧма нин. Кымын сотчытӧм пирӧг кыскис сійӧ пачсьыс?
647. Нывлы ӧні 17 арӧс. Кымын во мысти сійӧ лоас 63 арӧса?
648. Велӧдчысьлы тшӧктісны тӧдӧдны 1 часӧн задача. (Часын 60 минут). Сійӧ тӧдӧдіс 37 минутӧн. Кымын минутӧн водзджык сійӧ тӧдӧдіс?
649. Арын ӧти баба лӧсьӧдіс пуны капуста. Ӧтчыд сійӧ пуис 23 мач, мӧдысь кыкӧн унджык, коймӧдысь 27 мач. Пуигас локтісны сы дінӧ челядьыс. Мамыс вердіс налы 12 мач. Кымын пуӧм мач коли сылӧн?
650. Ыджыд чой вундіс 55 кольта ид, ичӧтыс 27 кольтаӧн этшаджык. Кымын кольта найӧ вундісны кыкӧн?
651. Чери кыйысь кыскис кулӧмӧн 67 чери. Шедіс сылы 26 сир, 15 налим, мукӧдыс ляпа. Кымын ляпа кыйис чери кыйысь?
652. Школаын вӧлі кымынкӧ велӧдчысь. Кор сэтчӧ локтісны 9 детина да 8 нывпосни, сэні лои 54 челядь. Кымын велӧдчысь вӧлӧма войдӧрсӧ?
653. Петкӧдісны 71 додь куйӧд 3 лунӧн. Медводдза лунас петкӧдісны 26 додь, мӧдас — 28 додь. Кымын додь куйӧд петкӧдісны коймӧд лунас?
654. Ӧти мортлӧн вӧлі кык судта керка. Сійӧ заптіс 44 сыв пес, лэдзис уліас и выліас олысьясӧс во кежӧ. Улыса олысьыс видзис 15 сыв пес, вылысаыс 28 сыв. Колис эз ещӧ пескыс, коли кӧ, — уна-ӧ?
655. Бабӧлӧн вӧлі чипан кольк кык чуманын. Ӧтиас вӧлі 54 кольк, мӧдас 27. Кор сійӧ вузаліс кымынкӧ кольк, сылӧн коли ещӧ 15 кольк. Кымын кольк сійӧ вузаліс?
656. Приютӧ вайисны кык пома ситеч. Ӧтиас вӧлі 32 аршын, мӧдас 39. Сэтысь видзисны 45 аршын челядьлы дӧрӧмъяс вылӧ, мукӧдсӧ юрлӧс эжӧд вылӧ. Кымын аршынысь вурисны юрлӧс эжӧдъяссӧ?
657. Кык вок рӧштво дырйи славитісны. Ӧтиыс славитіс 50 ур, мӧдыс 12 урӧн этшаджык. Найӧ ньӧбисны ӧтув 75 ур дон кампет. Уна-ӧ сьӧм налӧн коли?
658. Ӧти мужик кӧсйӧ тӧвйӧдны чаня-вӧла. Сійӧ арталӧм серти вӧвлы ковмас тӧв кежӧ 35 пуд зӧр, чаньлы 9 пудӧн этшаджык. Сылӧн заптӧма сӧмын 53 пуд. Кымын пуд зӧр оз тырмы?
659. Крестьянинлӧн вӧлі пуктӧма нянь куим йӧртӧдӧ. Ӧтикын вӧлі 13 пуд, мӧдын 2 пудӧн унджык, коймӧдын 7 пудӧн этшаджык мӧдсьыс. Кымын пуд нянь вӧлі 3 йӧртӧдын?
660. Баба вольсаліс быгӧдны 36 аршын вӧсни дӧра, кыз дӧра 17 аршынӧн этшаджык. Кымын аршын дӧра вольсалӧма бабалӧн?
661. Сапӧг вурысь вузаліс кымынкӧ гоз сапӧг да сапожки. Сапӧгсьыс сійӧ босьтіс 40 шайтӧн, сапожкисьыс 12 шайтӧн этшаджык. Кымын шайт сійӧ босьтіс ставсьыс?
662. Бабалӧн вӧлі заптӧма 24 тув ид шыдӧс, 9 тувйӧн унджык зӧр шыдӧс. Уна-ӧ вӧлі бабалӧн шыдӧс заптӧма?
663. Гижысь босьтӧ тӧлысьӧн 100 шайт. 43 шайт видзӧ сёян вылӧ, 15 шайт мынтӧ патераысь, 25 шайт ыстӧ быд тӧлысь гортас. Кымын шайт сылӧн кольӧ быд тӧлысьын?
664. Ныв ньӧбис 40 ур дон лента, 25 урысь юр сынан, 28 ур дон сунис. Мый на пытшкын меддона и кымын урӧн?
665. Мамлы 42 арӧс. Бать мамысь пӧрысьджык 9 арӧсӧн, ныв томджык батьысь 37 арӧсӧн. Кымын арӧса нылыс?
666. Крестьянин кераліс 35 сыв пожӧм пес, 7 сывйӧн этшаджык кыдз пу пес. Кымын сыв пес сійӧ кераліс?
667. Яй вузалысь ньӧбис кык мӧс. Ӧтисьыс мынтіс 43 шайт, мӧдсьыс 7 шайтӧн этшаджык. Кыкнан мӧссӧ сійӧ начкис, став яйсӧ вузаліс 95 шайтысь. Босьтіс-ӧ сійӧ барыш, и уна-ӧ?
668. Заводын уджалӧ 88 морт. Сэні уджалӧ 38 нывбаба, 17 челядь, мукӧдыс мужикъяс. Кымын мужик уджалӧ?
669. Крестьянин вузаліс 70 шайтысь мӧс, кукань да ыж. Мӧссӧ вузаліс 46 шайтысь, ыжсӧ 11 шайтысь. Донысь-ӧ вузаліс куканьсӧ?
670. Ӧти детиналы колӧ вӧлі лыддьыны 68 лист бок. Ӧти лунӧ сійӧ лыддис 19 лист бок, мӧд лунӧ 13. Кымын лист бок коли ещӧ лыддьыныс?
671. Велӧдчысь ньӧбасис 85 ур дон: кабала ньӧбис 30 ур дон, карандаш 18 ур дон, перӧ 9 ур дон. Мукӧдсӧ видзис мойдан нига вылӧ. Дона-ӧ сулалӧ нига?
672. Нянь пӧжалысь кӧтігас видзис 27 тув пызь, суктігас 34 тув. Сылӧн артмис 80 тув нянь. Кымын тув соді пӧжалігӧн?
673. Ӧти детина вӧчис 21 рос, мӧдыс сизимӧн этшаджык. Кымын рос найӧ вӧчисны кыкнанныс ӧтлаын?
674. Ӧти мужик кутіс ям. Сылӧн вӧлі 34 вӧв. Ӧтчыд сійӧ увлань мӧдӧдіс 16 вӧв, вывлань 11 вӧв. Кымын вӧв коли гортас?
675. Ӧтчыд вурсьысь босьтіс 14 аршын лӧз ной, 9 аршын сьӧдӧс; мӧдысь — 6 аршын лӧз да 21 аршын сьӧд. Сэсся 25 аршынысь вурис кымынкӧ пальто. Кымын аршын ной коли вурсьысьлӧн?
676. Тӧргӧвӧй сорлаліс 27 тув шыдӧс ӧти пӧлӧсӧс 41 тув мӧд пӧлӧскӧд, пуктіс 2 дозйӧ. Ӧтиас пуктіс 38 тув. Кымын тув пуктіс мӧдас?
677. Стӧкан сулалӧ 50 ур, чашка 12 урӧн донаджык. Ме кӧсъя босьтны чашка, менам сӧмын 48 ур. Кымын ур менам оз судзсьы?
678. Куим ящикӧ вӧлі идралӧма сись: ӧтиӧ — 24, мӧдӧ 36, коймӧдӧ 17. На пиысь 18 сись йирӧма шыр. Кымын дзонь сись кольӧма?
679. Кык детина пачьяс ломтыны пыртлісны пес. Ӧтиыс пыртіс 9 пес, мӧдыс 11. Сэтысь 3 пес колисны сартас вылӧ. Кымын пес ломтісны пачӧ?
680. Кык вурсьысьлы сетісны вурны 24 дӧрӧм. Ӧтиыс машинаӧн вурис 17 дӧрӧм, мӧдыс киӧн сӧмын 4. Кымын дӧрӧм коли ещӧ вурны?
681. Велӧдысь пуктіс пызан вылӧ войдӧр 27 пу шег, сэсся содтіс 55-ӧс. Сы бӧрын сэсь босьтіс бӧр 43. Кымын пу шег коли пызан вылын?
682. Куим чоя-вока куртісны 64 юр турун. Ӧти куртіс 24 юр, мӧд 18. Кымын юр турун куртіс коймӧдыс?
683. Ме заводиті велӧдчыны 7 арӧссянь, велӧдчи 11 во. Ӧні меным 27 арӧс. Кымын во ме ог нин велӧдчы?
684. Бабалӧн вӧлі 73 гортгӧгӧр пӧтка: 37 курӧг, 18 утка, мукӧдыс дзодзӧг. Кымын дзодзӧг сылӧн вӧлі?
685. Кык деревняысь мӧда-мӧдлы паныд мӧдӧдчисны кык морт. Найӧ костын вӧлі 29 верст. Ӧти мортыс муніс нин 13 верст, мӧдыс 9. Кымын верст коли на костын.
686. Кока лавка деревняын пырис ӧти керкаӧ. Сійӧ керкаын буретш вӧлі чукӧртчӧмаӧсь нывъяс. Найӧ ньӧбисны сылысь 2 чунькытш — 15 ура да 17 ура, сэсся босьтісны сикӧтш 28 ур дон, чуньлыс 7 ура, исерга 25 ура да юр сынан. Ставсьыс найӧ мынтісны кока лавкалы 1 шайт. Дона-ӧ сулалӧ юр сынаныс?
[...]
721. Крестьянин чӧжис сьӧм вӧв ньӧбны. Быд тӧлысь сійӧ торйӧдіс сы вылӧ 6 шайтӧн. 7 тӧлысь мысти чӧжӧм сьӧм вылас босьтіс вӧв. Дона-ӧ сулалӧ вӧлыс?
722. Паракод мунӧ ӧти часӧн 15 верст. Кымын верст сійӧ мунас 4 часӧн? 5 часӧн? 6 часӧн?
723. Кутшӧмкӧ детина муніс лавка дінті, аддзис ӧшинь пыр зэв мича морта нига. Пырис сійӧ лавкаӧ, юаліс сылысь донсӧ. Сьӧмыс нигатӧ ньӧбны эз судзсьы. Петіс, чукӧстіс воксӧ да кык ёртӧс. Кор нёльнанныс сетісны 25 урӧн, вермисны ньӧбны нига. Дона-ӧ сулалӧ нигаыс?
724. Ньӧбисны 4 тув сакар 25 урӧн тув. Уна-ӧ сьӧм видзисны?
725. Ме лыдди ӧти часӧн 27 лист бок. Кымын лист бок лыддя 2 часӧн? 3 часӧн?
726. Лавкаын 7 нывлы вузалісны ситеч пома. Найӧ юкисны став ситечсӧ ӧтмындаӧн. Быд нывлы воис 9 аршынӧн. Кымын аршын ситеч вӧлӧма помаас?
727. Иван вӧчӧдіс аслыс керка, ӧкмыс ӧшиня. Кымын рама сылы ковмас вӧчны, лӧсьӧдас кӧ кык пӧвса ӧшиньяс?
728. Петыр ва дорын вуграсис. Сійӧ вуграсигкості юр вывтіыс лэбзисны куим чукӧр дзодзӧг. Быд чукӧрысь Петыр лыддис 32 дзодзӧгӧн. Кымын дзодзӧг лэбзис ставыс?
729. Ӧти вежонын 7 лун. Кымын лун 5 вежонын, 6, 7, 10, 12?
730. Ӧти воын 12 тӧлысь. Кымын тӧлысь 3 воын, 5, 6, 7, 8?
731. Аршынын 4 весьт. Кымын весьт 7, 13, 15, 24 аршынын?
732. Крестьянин кӧдзис 12 пуд сю, воис квайт мында. Кымын пуд сылӧн воис?
733. Наста град киськавны вайис 8 гоз ведра ва. Кымын ведра ва сійӧ вайис?
734. Мӧслы колӧ лун кежӧ 22 тув турун. Кымын тув турун ковмас 4 лун кежӧ?
735. Меным 19 арӧс, менам пӧльлы куим ме мында. Кымын арӧса пӧльӧй?
736. Кык дозйын вӧлі сола чери. Ӧтиас 17 тув, мӧдас вит мында. Кымын тув чери вӧлі мӧд дозъяс?
737. Лавкаын 2 ящикын вӧлі тшай, 12 пунтӧн. Ӧти пунт тшайыс сулаліс 3 шайт. Мый дон тшай вӧлі лавкаын?
738. Кӧсьта зэв лют да сюсь задачаяс решитавны. Ӧти часӧн сійӧ вермӧ решитны 6 сьӧкыд задача. Кымын задача сійӧ решитас ӧти вежонӧ, быд лун кӧ кутас решитны кык часӧн?
739. Нёль ящикын вӧлі нёль тувйӧн сись. Быд тувйӧ лыбӧ 6 сиськӧн. Кымын сись вӧлі нёль ящикын?
740. Кодкӧ ньӧбис 2 дюжина эзысь пань. Быд пань сулаліс 4 шайт. Уна-ӧ мынтіс сійӧ став паньсьыс?
741. Ме дінті мунісны салдатъяс. Найӧ вӧлісны 6 визьын 8 мортӧн. Кымын салдат муніс ме дінті?
742. Мам пӧжаліс шаньга кӧрт лист вылын. Пачӧ тӧрӧ 3 лист, быд лист вылӧ позьӧ пуктыны 18 шаньга. Кымын шаньга позьӧ пӧжавны ӧтпырйӧн?
743. Ме вӧлі уджйӧза ӧти тӧдсалы. Быд тӧлысь верми мынтыны сӧмын 17 шайтӧн; и мынті ставсӧ 4 тӧлысьӧн. Ыджыд-ӧ уджйӧз менам вӧлі?
744. Йӧв выв вежон дырйи челядь чукӧртчисны иславны. Нывпосни вӧліны квайтӧн, детинаяс куим мында. Кымынӧн вӧліны детинаясыс?
745. Тьӧтка сетіс Варуклы 3 сунис сикӧтш. Быд сунисын вӧлі 31 молльӧн. Кымын моль вӧлі 3 сунисын?
746. Габӧ Петыр лӧсьӧдчис лэптыны керка, кутіс ваявны кер. Сійӧ ваяліс 12 лун, быд лунӧ 4 керйӧн. Сэсся мыйлакӧ сылӧн вӧлыс чотны кутіс, лои дугдыны кер кыскалӧмысь. Кымын кер сійӧ удитіс вайны?
747. Катялӧн вӧлі 5 чипан. Ӧти асылӧ садьмӧм мыстиыс найӧ тӧд вылас усины сылы: «Вит лун нин пӧ ӧд ме эг видлы найӧс. Кымын кольк пӧ нин, бара, эм-а?» — юаліс мамыслысь. Вӧлӧмкӧ быд лун чипанъясыс колькъявлӧмаӧсь мамыс идравлӧма найӧс кӧзӧд вылӧ. Кымын кольк эськӧ аддзис Катьӧ чипан позйысь, эз кӧ мамыс найӧс идрав?
748. Талун асыв ме петалі сусед ордӧ. Сылӧн нывъясыс сӧмын на вӧлі чеччӧны. Ме шензя, мый нӧ мися ті та дыра узянныд? Найӧ шуӧны: «Тӧрыт пӧ зэв дыр пукалім Мирон Маръя бердын нывъяскӧд, дас сизимӧнӧсь пӧ вӧлім, панласим печкыны. Сӧмын некод эг вермӧ пановтны, быд ныв печкис 3 чӧрсӧн». Кымын чӧрс найӧ печкӧмаӧсь ставныс?
749. Ӧтчыд велӧдысь нуӧдіс ассьыс гырысь велӧдчысьяссӧ ва дорӧ: «Корсямӧ пӧ сэсь быдсяма дивӧ кодь изъяссӧ, уна пӧлӧсӧс пӧ ме сэсь аддзывлі: ӧти вылын тӧдчӧ чери бӧж, мӧд вылын рак пань туй, коймӧд вылын кутшӧм кӧ быдманторлӧн серыс». Мунісны ва дорӧ кӧкъямысӧн. Быд морт аддзӧма 12 дивӧ кодь изйӧн. Кымын из сюрӧма налы ставныслы ӧтлаын?
750. Миян пӧчӧ висьтавліс: «Менам том дырйи пӧ вӧліны на помещикъясыд. Ми пӧ нывпосниыс баруньӧ дінын олімӧ витӧн. Миянӧс пӧ ӧтчыд эз лэдзлыны ворсыштны, пыр вӧлі тшӧктӧны чувки кыны, мед пӧ быдӧнлӧн вонас 14 гоз вӧлі кыӧма». Висьталас вӧлі дай юалас: «Ноко пӧ, велӧдчӧм йӧз, арталӧй, кымын чувки гоз баруньӧным кисьтас вонас».
751. Паракодӧн вайисны деревняӧ 100 пуд пызь, тэчисны телегаяс вылӧ, 25 пудӧн быд телегаӧ. Кымын телегаӧн нуисны став пызьсӧ?
752. Кӧкъямыс бӧчкаын ӧтмындаӧн вӧлі 96 пуд карасин. Кымын пуд вӧлі быд бӧчкаын?
753. Детина вурис кык тетрадь. Ӧти вылас сійӧ видзис 16 лист кабала, мӧд вылас кыкысь этшаджык. Кымын листысь вӧлі мӧд тетрадьыс?
754. Кымынкӧ артельын вӧлі 84 уджалысь, 21 мортӧн быд артельын. Кымын артель вӧлі?
755. Баба кыис 56 аршын сера дӧра. Кымын берд дӧра лои сылӧн кыӧма, быд бердын кӧ 8 аршын?
756. Вит минутӧ гӧгыль бергӧдчас 75-ысь. Кымынысь сійӧ бергӧдчас 1 минутӧн?
757. Яй вузалысь ньӧбис ӧти донӧн 3 мӧс 87 шайтысь. Дона-ӧ сулалӧ ӧти мӧсыс?
758. Бабалӧн вӧлі 60 гортгӧгӧр пӧтка. Нёльӧд юкӧныс вӧлі утка. Кымын утка вӧлі сылӧн?
759. Мельничаысь вайисны 36 пуд пызь, кисьтісны 4 йӧртӧдӧ ӧтмындаӧн. Кымын пудӧн лои быд йӧртӧдын?
760. Велӧдысь сетіс 36 мортлы 72 перӧ. Кымын перӧӧн воис морт вылӧ?
761. Нывка босьтіс лавкаын кык акань 54 урысь. Дона-ӧ сулалӧ ӧти аканьыс?
762. Ӧти тув эзысьысь позьӧ вӧчны 19 ӧти шайта сьӧм. Кымын тувысь петас 76 сэтшӧм жӧ сьӧм?
763. Ӧти морт муніс вӧлӧн 32 верст. Дыр-ӧ сійӧ муніс, быд часӧ кӧ муніс 8 верстӧн?
764. Лавкаын вӧлі гез, 24 аршын кузя. Квайтӧд юкӧдсӧ вузалісны. Кымын аршын вузалісны?
765. Куим чери кыйысь тывъялісны 84 тув чери, юкисны ӧтмындаӧн. Кымын тувйӧн лои морт вылӧ?
766. Базар вылӧ вайисны вузавны 36 улӧс да 9 пӧв этшаджык пызанъяс. Кымын пызан вайисны базар вылӧ?
767. Ӧти дядьӧ мӧдӧдчис вӧравны 60 верст сайӧ. Сійӧ воис сэтчӧ 2 лунӧн, муніс 5 верстӧн час. Кымын час сійӧ муніс ӧти лунас?
768. Школаӧ вайисны 72 карандаш. Кымын дюжина сійӧ лоӧ?
769. Кузь сутуга вундісны кык пельӧ. Ӧти торъяс лои 27 аршын кузя, мӧдас куимысь дженьыдджык. Кузь-ӧ лои сутугаыс мӧд торъяс?
770. Кык пу вылын пукалісны чикышъяс. Ӧтиас вӧлі 64 чикыш, мӧдас кыкысь этшаджык. На гӧгӧр лэбалісны нёльысь этшаджык наысь. Кымын чикыш вӧлі мӧд пу вылас, кымын лэбаліс?
771. Кымынкӧ морт кык лунӧн вундісны 96 суслан ид. Быд морт лунӧн вундіс 16 сусланӧн. Кымын вундысь вӧлі?
772. Туй вӧчигӧн уджаліс 54 морт. Коймӧд юкӧд вӧлі нывбаба. Кымын нывбаба вӧлі?
773. Микита керка вӧчигӧн кыскаліс кирпич. 72 кирпич вайӧм бӧрын сійӧ пуксис шойччыштны. Кымынысь сійӧ ветліс кирпичысла, быд ветлӧмын кӧ вайис 8 кирпичӧн?
774. Вӧр сотчигӧн пӧжар кусӧдны ысталісны. Муніны: 84 нывбаба, кыкысь этшаджык мужик, квайтысь этшаджык мужикъяс дорысь детинаяс. Кымын детина вӧлі пӧжар кусӧдігӧн?
775. Кымынкӧ менам велӧдчысь гожӧмын косьтісны нига лист костын турунъяс, дзоридзьяс. Сэсся вӧчисны тетрадь, ляскалісны сэтчӧ ставсӧ. Кымынӧн найӧ вӧліны, быд морт кӧ сетіс ляскыны 24 дзоридзӧн? Тетрадяс лои ляскӧма 96 быдмантор?
776. Куим мортлы 3 лунӧн колӧ кодйыны канава 81 аршын кузя. Кымын аршынӧн лун пондас кодйыны быд морт?
777. Кутшӧмкӧ вӧлӧсьтын кык школа: ӧтиыс вӧлӧсьт шӧрас, мӧдыс катыд помас. Ӧтчыд вӧлӧсьт школаса велӧдчысь юалӧ катыдпомса велӧдчысьлысь: «Уна-ӧ тіян школаын велӧдчысьыс? Миян ставыс 96 морт». Мӧдыс арталіс неуна дай шуис сылы воча: «Миян буретш куимысь этшаджык тіян дорысь». Кымын велӧдчысь катыдпомса школаын?
778. Ичӧт ва дырйи паракод эз вермы сувтны берег дорӧ, а колӧ вӧлі чеччӧдны 52 мортӧс. Вӧлі налӧн пыж, тӧрӧ сӧмын бӧжалысьыс кындзи 13 морт. Кымынысь лои вуджӧдны став чеччысьяссӧ?
779. Лиза муніс карӧ, гӧститны ыджыд мамыс ордын. Ыджыд мам муніс лавкаӧ, босьтіс Лизаӧс сьӧрсьыс. Лавкаын сійӧ ньӧбис 54 дзоляник серпас, сетіс Лизалы. Гортӧ воӧм мысти Лиза ляскаліс став серпассӧ тетрадьӧ, 9 картинаӧн быд лист бокӧ. Кымын лист бок вылӧ тырмис картинаыс?
780. Кырув сайын киссис пос. Скод вылын шуисны лӧсьӧдны выльӧс. Сы вылӧ быд керкасянь вайны кер. Унджык йӧзыс вайӧма нин, коли вайны сӧмын 13 мортлы 65 кер. Кымын керйӧн колӧ вӧлі вайны быд керкасянь?
781. Ичӧт Иван да Пиля Семӧ вежсисны скӧтӧн: Иван сетіс 7 ыж, на пыдди босьтіс Семӧлысь 2 мӧс. Кутшӧм дон пуктӧ Семӧ мӧс вылӧ, быд ыж кӧ на ног сулалӧ 14 шайт?
782. Тима Анна видзӧ 48 гортгӧгӧр пӧтка. Джынйыс чипан, коймӧд юкӧдыс утка, мукӧдыс дзодзӧгъяс. Кымын дзодзӧг Тима Анналӧн?
783. Вӧв видзигӧн детинаяс пӧжалісны картупель. Найӧ пуктісны пӧим пиӧ 24 картупель. Сэні 6 картупель сотчис, эз шогмы сёйны. Сотчытӧм картупельсӧ челядь юкисны 6-ӧн морт вылӧ. Кымын детина вӧлі сэні?
784. 12 вундысь вундісны дзонь му 3 лунӧн. Кымын лунӧн вундасны сійӧ жӧ му 6 вундысь?
785. Кык тшанын 37 ведра ва. Ӧтиас 5 ведраӧн унджык. Кымын ведра ва быд тшанын?
786. Бабалӧн вӧлі 72 аршын дӧра. Квайтӧд юкӧдсьыс сійӧ вурис дӧрӧмъяс. Кымын аршын дӧра сылӧн коли?
787 Вый тыра туис кыскӧ 54 тув. Выйыс кӧкъямысысь сьӧкыдджык туисысь. Кымын тув вый туисын?
788. Ӧти крестьянин ньӧбис 7 чарла да ведра гоз, мынтіс 22 шайт. Мӧд ньӧбис 5 чарла да ведра гоз, мынтіс 18 шайт. Дона-ӧ сулалӧ ӧти ведраыс?
789. Кык мужик мӧдӧдчисны деревняысь карӧ: ӧтиыс вӧлӧн, мӧдыс подӧн. Вӧла муніс 10 верстӧн час, пода 5 верстӧн. Кымын верстӧн унджык мунас вӧлаыс быд часӧн?
790. Кык уджалысьлы сетісны 44 шайт. Ӧтиыслы колӧ босьтны сэтысь 6 шайтӧн унджык. Кымын шайт босьтіс ӧтиыс и мӧдыс?
791. Детина босьтіс велӧдысьлысь лыддьысян нига. Ӧти лунӧ сійӧ лыддис 25 лист бок, мӧд лунӧ сизимӧн унджык. Сылы ещӧ коли лыддьыны нига джынсӧ. Кымын лист бок вӧлӧма нигаас?
792. Вӧралысь вузаліс 27 ур ку да 5 руч ку. Ставсьыс сійӧ босьтіс 92 шайт. Донысь-ӧ сійӧ вузаліс ӧти руч кусӧ, быд ур куысь кӧ босьтас ӧти шайтӧн?
793. Ӧтиысь ньӧбисны кык тув рис да ӧти тув анькытш, мынтісны 59 ур. Мӧдысь ньӧбисны 3 тув анькытш да 2 тув рис, мынтісны 97 ур. Дона-ӧ сулалӧ 1 тув рисыс?
794. Куим куртысь куртас 54 юр турун. Кымын юр турун куртасны 4 куртысь?
795. Кык баба ньӧбисны майтӧг 96 ур дон. Ӧтиыс босьтіс 2 тув, мӧдыс 4 тув. Уна-ӧ деньга колӧ мынтыны быд бабалы?
796. Куим пилы бать сетіс 96 ур. Шӧркост вок босьтіс куим мында ичӧтысь, ыджыдыс сы мында, мыйта босьтісны 2 вок ӧтлаын. Уна-ӧ деньга сетіс батьыс быд пилы?
797. Ӧти деревнясянь кывтісны пуръяс. Быд час найӧ кывтісны 3 верстӧн. 12 час мысти найӧ мунӧм бӧрын сійӧ жӧ деревнясянь петіс паракод, муніс быд часӧ 15 верстӧн. Кымын час мысти, да кымын верст сайын деревнясянь паракод суас пуръяссӧ?
798. Кык йӧртӧдын 62 пуд пызь. Ӧтисьыс кисьтісны мӧдӧ 14 пуд, кыкнанас лои ӧтмындаӧн. Кымын пудӧн вӧлі быд йӧртӧдын?
799. Кык ящикын вӧлі сьӧм. Кор кыкнансьыс босьтісны 16 шайтӧн, сэсся ӧтикас пуктісны бӧр 13 шайт, — сэні лои 43 шайт, мӧдас 29 шайт. Уна-ӧ сьӧм вӧлӧма водзынсӧ кыкнан ящикас?
800. Ӧти мортлӧн вӧлі 3 пи да 2 ныв. Быд пилы сійӧ сетіс 7 преникӧн, быд нывлы 4 преникӧн унджык. Кымын преник сійӧ сетіс став челядьыслы?
801. Вузасьысь босьтіс 7 пуд пызь 84 шайтысь, сэсся сійӧс бӧр вузаліс 98 шайтысь. Уна-ӧ барыш босьтіс быд пудысь?
802. Падейлӧн вӧлі 3 вит шайта сьӧм да 7 куим шайта Сійӧ колис аслыс 8 шайт сьӧм, мукӧд вылас ньӧбис 2 ыж. Дона-ӧ сулалӧ ӧти ыжыс?
803. Велӧдчысьяс вӧчисны спектакль. Налысь ворсӧмсӧ видзӧдны локтісны 16 бать-мам, сизимӧн унджык чояс да вокъяс, велӧдчысь ёртъяс кык мында унджык бать-мамысь да чой-вокысь ӧтлаын. Кымын велӧдчысь ёртъяс видзӧдісны ворсӧмсӧ?
804. Ӧти морт вермас помавны кутшӧмкӧ удж 18 лунӧн. Сійӧ удж вылӧ медалісны 3 мортӧс кӧсйисны быд уджалӧм лунысь сетны 5 шайтӧн морт вылӧ. Уна-ӧ сьӧм босьтас быд морт?
805. Челядь локтісны тшак вотанінысь да шуӧны мамыслы: «Видзӧдлы жӧ, мамӧ, мыйта миянлы сюри: 37 гӧрд гоб, 26 рыжик, масленик витӧн этшаджык рыжик дорысь. Миянлы быдӧнлы ӧтмындаӧн сюри, 28 тшакӧн». Кымын челядь ветлӧмаӧсь тшак вотны?
806. Уджалысьӧс медалісны во кежӧ 96 шайтысь. 8 тӧлысся нажӧвитӧм сьӧмысь 26 шайт колис аслыс, мукӧдсӧ видзис пась вылӧ. Уна-ӧ сьӧм видзис пась вылас?
807. Ме вит во нин эг аддзысьлы воча чойкӧд. Сэки сылы вӧлі 7 арӧс, меным 19. Кымынысь ӧні сійӧ томджык меысь и кымын арӧсӧн?
808. Кутшӧмкӧ лыдысь ме чинті 17, сэсся сэтчӧ содті 16. Мыйта лои, босьті куимысь, содті 7, юки 8 пельӧ и менам лои 8. Кутшӧм лыд менам вӧлі босьтӧма водзынсӧ?
809. Ме думайті ӧти лыд, босьті сійӧс нёльысь, чинті 14, юки квайт пельӧ, содті 37, менам лои 46. Кутшӧм лыд ме думайті?
810. Ӧти лыдысь кӧ чинтыны 86, коляссӧ юкны 7 пельӧ, содтыны 25, босьтны куимысь да содтыны 19, — лоас 100. Кутшӧм лыд вӧлі водзынсӧ?
811. Детиналӧн вӧлі кымынкӧ ӧрешки. Кор сійӧ 24-ӧс сёйис, нёльысь этшаджыкӧс воштіс, 3 ёртлы сетіс 15 ӧрешкиӧн, сылӧн коли 19. Кымын ӧрешки сылӧн вӧлі?
812. Лавкаын вӧлі 4 дюжина кепысь. Коймӧд юкӧдсӧ вузалісны 2 шайтӧн гоз. Уна-ӧ сьӧм колӧ сетны ньӧбӧм кепысьысь?
813. Кык велӧдысьлӧн 48 велӧдчысь, ӧтиыслӧн кык мындаӧн унджык. Кымын велӧдчысь быд велӧдысьлӧн?
814. Паныдасисны кык мӧс видзысь да кутісны лыддьыны мӧда-мӧдыслысь мӧсъяссӧ. Ӧтиыслӧн вӧлӧма квайтӧн унджык. Кыкнаныслӧн ӧтлаын вӧлі 44 мӧс. Кымын мӧскӧн налӧн вӧлӧма?
815. Вузасьысь арталіс 4 тув пызь 9 урӧн тув да 6 тув 8 урӧн тув, сэсся вузаліс ставсӧ 10 урӧн тув. Уна-ӧ сійӧ босьтіс барышсӧ?
816. Мам ветліс карӧ базар вылӧ, вайис 2 тув кӧлач; сетіс миянлы, тшӧктіс юкны меным да 2 воклы. Ме вӧлі ыджыдджык, меным тшӧктіс 5-ӧн унджык босьтны. Ми лыддим. Ставыс вӧлі 50 кӧлач. Заводитім юкны. Школаын некод на эгӧ велӧдчӧ, эгӧ и вермӧ юкныс. Бур челядь, велӧдчысьяс, велӧдчӧй! Висьталӧй, кымын кӧлачӧн колӧ миянлы босьтны?
817. Нывкалӧн вӧлі 32 шег. Сійӧ кутіс челядькӧд ворсны. Ӧтчыд ворссис нёльӧд юкӧдсӧ, сэсся воис 20 шегйӧн этшаджык, мыйта сылӧн вӧлі ворстӧдзыс. Кымын шег сылӧн лои?
818. Приютын сеталісны кӧмкот. Детинаяслы сетісны 21 гоз, нывкаяслы квайтӧн унджык, на гӧгӧр старайтчысьяслы 8-ысь этшаджык сы дорысь, мыйта сетісны став челядьыслы. Ставыс приютын вӧлі 63 морт. Кымын мортлы эз тырмы кӧмкотыс?
819. Нёль аршын сьӧд нойысь да вит аршын рудысь мынтісны 71 шайт. Сьӧдыс вӧлі донаджык 2 шайтӧн аршын. Дона-ӧ сулалӧ сьӧд нойыс?
820. Детина пуктіс кык зептӧ 91 ур. Сійӧ кӧ босьтас ӧти зепысь 15 ур, мӧдысь 18 ур, сылӧн лоас кыкнан зептас ӧтмындаӧн. Кымын ур сылӧн быд зептын?
821. Кока лавкалӧн вӧлі 7 чунькытш, 12 урӧн быд чунькытш. Став чунькытшсӧ сійӧ вузаліс 1 шайтысь. Уна-ӧ сійӧ босьтіс барыш?
822. Кык ящикын вӧлі 74 тув тшай. Кор ӧтиксьыс вузалісны 8 тув, сэні лои кыкысь этшаджык мӧдсьыс. Кымын тувйӧн вӧлі быд ящикын вузавтӧдзыс?
823. Кодлӧнкӧ вӧлі 4 аршын ситеч, 24 урӧн аршын. Сійӧ вежис ситечсӧ 6 аршын дӧра вылӧ. Уна-ӧ сулалӧ 1 аршын дӧра?
824 Детиналӧн вӧлі 65 ур. Сійӧ видзис 14 ур ӧрешки вылӧ, куим мында унджык кампет вылӧ. Уна-ӧ сьӧм сылӧн коли?
825. Куим чоя-вока босьтісны истӧг кӧрӧб, юкисны став истӧгсӧ ӧтмындаӧн, заводитісны ворсны. Микулай джынсьыс вӧчис керка, мый коли сетіс чойяслы: ӧтилы 9, мӧдлы 7 истӧг. Уна-ӧ истӧг вӧлі ставыс?
826. Быд тӧлысь бать сетӧ Ӧльӧксейлы 3 шайтӧн. Сійӧ сьӧм вылӧ Ӧльӧксей босьтӧ нигаяс. Ӧти воӧ сійӧ босьтіс 3 нига 6 шайтӧн, да кымынкӧ нига 3 шайтӧн? Кымын 3 шайта нига босьтіс Ӧльӧксей?
827. Ульӧ кыӧ идзасысь шляпа. Быд шляпа вылӧ мунӧ 12 аршын идзас лента. Сылы тшӧктісны кыны 7 шляпа. Ӧти лунӧ сійӧ кыис 7 аршын идзас лента, мукӧд лунъяснас — 11 аршынӧн. Кымын лунӧн Ульӧ кыис став шляпасӧ?
