ШОНДІКӧнкӧ енэжтас саяс талун шондіыс узьӧ, Небыд унзільыс веніс — лоис чеччыныс дыш. Асъя рӧмыдас некыдз пӧртъяс ваыс оз пузьы — Мусӧ шонтысьыс талун ассьыс пӧжӧ на мыш. Наян тӧлысьыс век на турвидзӧ енэж шӧрас. Сійӧс венысьыс талун — банйӧм шонді — эз лок. Со и ачыс нин регыд тімбыльмунас дай пӧрас, Мудзла тӧлысьыс ачыс регыд чергӧдас кок. Сідз нин шогысла еджыд — банас вир тусьыс абу, Войся енэжлӧн дзоридз регыд сылас — оз ло. Со и небыдик шальнас югзьысь енэжыс табӧ, Но а шондіыс сылӧн век оз во, век оз во. Унзіль вӧр-пуыс кисӧ ассьыс нюжӧдӧ вывлань, Руыс ю весьтын кургӧ — быттьӧ пӧрт весьтын тшын. Ставыс виччысьӧ тэнӧ, менам шондіӧй, кылан? Мыйла бан бокыд — ӧгыр, но а сьӧлӧмыд — кын?
