ЧУЖАН МУЛЫ
Том йӧзсянь

Чужан му, мусаӧй миян!
Донаӧй, сьӧлӧмным шӧрӧй!
	Мый инӧ виччысян
	Ӧні тэ миянсянь?
	Олӧмтӧ панігӧн,
	Бипуртӧ пестігӧн?
Мый инӧ шыбитам
Ӧзйӧдан биас?
Мый инӧ пуктам ми
Ӧтласа уджас?
	Гашкӧ нӧ, сьӧлӧмным,
	Томъясным, колӧ
	Кӧртӧдтӧм вежӧрлӧн
	Лэбзьӧмыс вылӧ?
Гашкӧ нӧ, миян тэд
Мывкыдным бур?
Ошкыштан кывъяс,
Сьылӧмлӧн шыяс...
Гашкӧ нӧ, этша на сійӧ тэд лоӧ?!
Буракӧ, сыысь тай унджык на колӧ.
	Сьӧлӧмыд ӧтнассӧ,
	Тыдалӧ, этша!..
	Сьылӧм шы миян
	Муртса на кылӧ...
	Вежӧрным том на,
	Абу на ён!..
Тэныд ми, чужан му, сетам
Асьнымӧс дзоньнаным, ставнас!
	Сетам тыр сьӧлӧма
	Томдырся олӧм.
	Эмбуртӧ кыпӧдны,
	Морт ногса олӧмтӧ вӧчны.
Вирнымӧс, ловнымӧс сетам!
Став выннымӧс сы вылӧ пуктам!
Удж тэнад: зільлун да комилӧн туж!