ЧУЖАН ЛУН

Тэ бара локтін,
				менам чужан лун.
Ме талун бара
				пызан сайын ӧтнам.
И тӧрытъяыс — быттьӧ эштӧм вӧтын,
А аскияыс — быттьӧ топыд ру.

Тэ меным кӧсйин сэтшӧм ыджыд шуд,
Тэ меным ӧзтін сэтшӧм югыд кодзув.
И помтӧм туйыс век на корӧ водзӧ,
И тулыс аддзӧ вӧтнас турдӧм му.

Но меным шог. И сьӧлӧм вылын нор.
И лымйыс ӧшинь сайын муас усьӧ.
А меным чайтсьӧ — тайӧ еджыд юсьяс,
И найӧ бара эновтӧны горт...