ЧЕЛЯДЬДЫРСЯ


Кытчӧкӧ лэбӧны вояс,
Лэбӧны кытчӧ — ог тӧд.
Лэбӧны лунъяс и войяс,
Кольӧмыс — быттьӧкӧ вӧт.

...Син водзын юдорса бипур,
Зонпосни котралам сэн.
Батьясным мунісны би пыр,
Унаӧс чукӧстіс Ен.

Жебӧсь, но визулӧсь вӧвлім
Грездса зонпосниыд сэк.
Рытъяснас войнаысь ворслім,
Немечтӧ вермылім век.

Шепасьлім, агсасьлім, куртлім — 
Челядьлы вичмыліс нок.
Войнаыс, сьӧкыд да курыд,
Шог бӧрся вайліс выль шог.

Сов чепӧль гортаным абу.
Пывсянын — сартаса би.
Эг кужлӧй сӧмын тай лябны,
Батьнымӧс вежим сэк ми.

Син водзын — шабура мамӧ,
Ачыс зэв мичаник, шань.
Эг тӧдлӧй сэки ми кампет,
Кач сора тучман — став нянь.

Быд уджӧ сибавліс киыс,
Ачыс зэв мусаник, рам.
Тучмантӧ пӧжаліг, сійӧс
Синванас солавліс мам.

Кытчӧкӧ лэбӧны вояс,
Лэбӧны кытчӧ — ог тӧд.
Лэбӧны лунъяс и войяс,
Кольӧмыс — вунлытӧм вӧт.