ТӦЛЫСЬ


Рӧм уси му вылӧ. Пемдіс.
Вой пуксис — узян кад воис…
Ывлаыс вочасӧн лӧнис,
Быд олысь му вылын ланьтіс…

Дзикӧдз нин уси жбырӧдан тӧлыс.
Ӧтнасӧн кыпӧдчис тӧлысь.
Ньӧжйӧник, шы ни тӧв енэжті шлывгӧ
Да кӧнікӧ жугыля сьыланкыв лывгӧ…

Мый колӧ тэд, коньӧран тӧлысьӧй?
Мый олӧм олан, он узь?
Нэм чӧжыд ӧткӧнӧн олысьӧй,
Ӧткӧннад войыс зэв кузь!..

Тэ войыслӧн, тыдалӧ, кӧзюк:
Сы бӧрся вӧтлысян пыр.
Сьӧлӧмыд кын, чужӧмыд кельыд,
Вир-яйыд некор оз тір…

Шуштӧма вашъялӧ тӧлысь,
Синсӧ оз куньлы, оз узь…
Бӧрсяньыс вӧтлысьӧ пӧлыс —
Вуджӧръяс усьӧны кузь.