СЬЫЛАНКЫВ

Валентина Есевалы     

Сьӧкыд шуны кывъясӧн
Мусукӧйлы дум.
Мыла сьыланкывъясӧн
Чужты сылысь нюм.

Сьыланкывйыд висьталас
Уна-унатор.
Олан туйӧс листалас
Кыдзи медбур ёрт.

Кыпыдджыка горӧдлы
Сьывны, коми ань.
Сьыланкывйыд мортыдлы —
Кыдзи шобді нянь.

Сьыланкывтӧг ойбыртӧ,
Гажтӧмчӧ крут кыр.
Кыті миян котӧртіс
Кӧмтӧм челядьдыр.

Сьыланкывтӧг муслуныд —
Кыдзи косьмӧм ключ.
Сытӧг мусӧ кутлыны
Мортлӧн сыв оз судз.

Сьыланкывйӧн чуксалӧ
Ассьыс пӧвсӧ юсь.
Сьылігтырйи юклалӧ
Мусӧ визув ю.

Кашемир шӧвк чышъян кор
Кышӧ енэжтас,
Лэбач сьылӧм шыясӧн
Садьмӧ кыддза рас.

Тулыс кодь сӧдз гӧлӧсӧн
Горӧдлы тэ вай,
Гажӧд йӧзлысь сьӧлӧмсӧ,
Коми колипкай.