РЫТ


Сэки рытъя рӧмыдас бисӧ ваыс пӧдтіс,
Ньӧжйӧ ваймис шондіыс вынтӧг пуигтыр.
Эскис кокӧй сьӧлӧмлы да и вайис тӧдтӧг
Сэтчӧ, кӧні Эжвасӧ домалӧма кыр.

Лывкъялӧ со тӧв вылын синсӧ куньӧм дзоридз.
Аски сійӧс козьналас муса нывлы зон.
Мелі небыд рытыс со енэжтасыс дорӧдз
Шоныд ульсов тӧврусьыс нюжӧдӧма вон.

Эжваас со кымыньӧн путкыльтчӧма енэж,
Вӧр-пу ӧзйысь сись кодь — кытчӧдз судзӧ син.
Ыльӧбтӧмӧн вӧйтчис шонді мыгӧр сэні жӧ,
Лӧня дзоргӧ ю вылас баддя Эжва дін.

Кодкӧ лӧньӧм ю кузя ньӧжйӧника катӧ —
Пельпом вылас небыда плавгысьӧма рыт.
Йӧлӧгаыс вашкӧдіс: шудыд, нылӧй, матын.
Сӧмын... пыжа дорас нӧ лэччынысӧ кыт?