ПӦЧӦПеті ывлаӧ. Сэн шонді. Нимкодяся югӧр водзас, Ассьым ранаясӧс шонта, Босьта кынмалӧмлысь водзӧс. Пукала ме, видза кыр йыв, А сэн, йӧрын, пӧрысь пӧчӧ Посни челядькӧд кӧрт зырйӧн Пуктасъяслы градъяс вӧчӧ. — Татчӧ ми морковка пуктам, — Варгӧ сійӧ. — Татчӧ сёркни. Татчӧ — свеклӧ, лоас юктӧм, Оз ло басня, оз ло сёрни. Татчӧ, свеклӧыскӧд орччӧн, Кӧдзам паськыд коръя табак. Оз ло куриттӧмла ёрччӧм, — Воас крепыда, оз лаба. Сэсся — фронт вылӧ: код — батьлы, Коді воклы, коді мӧдлы, Кодкӧ, гашкӧ, ыстас зятьлы, И нужда оз кутны тӧдны. — Друг сэн нывка шуӧ: — Мудзи, Сэсся зыр тыр му оз кыпав. Вӧчи, мыйта вынӧй судзис, Сэсся зырсӧ ки оз кыпӧд. — Ой, Светлана, ичӧт нылан, — Юрсӧ малалыштӧ пӧчӧ, — Мудзтӧ сьӧлӧмнам ме кыла, Но он уджав — коді вӧчас? Али сійӧ, беддя дядьыс, Бедь вылас код муртса пыксьӧ? Фронт вылынӧсь, менам радӧсть, Став бур йӧзыс ӧні, зык сэн. Колӧ пуктысьны ас кадӧ, Сёрмам кӧ, став уджным вошӧ. Сэки лоам-ӧ ми радӧсь? Дженьыд миян войвыв гожӧм. — Бара сувтӧ ныв кӧрт зырйӧн, Бара сійӧ лэптӧ му сэн. Ачыс вермӧмыд ми жырйӧ Оз тай пыр да шог оз кусӧд.
