ЛЭБАЧ1.Руд луныс ӧшйӧма му весьтӧ ыджыд лолӧн... И кыськӧ пырис меӧ лэбачлӧн вын-эбӧс... Енэж лов пытшкӧ лэдзлі сэк лэбавны эзысь гулюӧ пӧртчылӧм лолӧс...2.Лэбач... Енэжыс сэзь... Кытысь лэбачыс?.. Сэсь... А енэжыс меын кытысь? Помтӧм ылысь воалӧ кыв бӧрся кыв лэбачӧн лов тыр...3.Ичӧтик лэбачыс видзис став эбӧссӧ... Ловсянь лолӧ ваяліс чолӧм... Кыпыдӧн вӧлі сылӧн быд волӧм... А локтан асылыс петкӧдлас ясыда... Чусмӧма шонді рӧмыс... Лов дзугйӧ пыстаыс йӧрмӧм...4.Ӧшинь дорӧ воаліс кыськӧ сы мында гулю... Бӧр лэбисны и абуӧсь... и тыртӧм лои... Кутшӧм кыпыдӧн петкӧдчис эськӧ татчӧс олӧмыс... эзысь гулюяслӧн борд йылас кӧ пальӧдыштны ловтӧ...5.Морӧс бердын аскӧд вайи енэжсӧ... Коралін тэ сэтысь югыд лэбачӧс... Сылӧн лолыс лои менам вежӧсӧн... Асъя вӧтӧн... личавлытӧм дойӧн... енкӧд йитӧдӧн...6.Куим лэбачӧс аддзылі талунъя вӧтын... Еджгов рӧмаыс вӧлі радейтӧм... Сылы йӧлӧгаӧн — мугыдыс... А ыліас — лӧз тшын моз кадитчигӧн — тӧдтӧмыс разаліс... И бӧрнас лои юӧн...7.Ыджыд лэбачлӧн морӧсас шонді... Меным татшӧм вынйӧрыс муса... Сійӧс некодлы некор ог вузав... Ме ӧд аслым тайӧс и вордлі... Кыпыд бордъяыс — менам шонді...8.Кӧкъямыс вӧлі лэбачыс... эз сизим... ӧд енэжыс кӧ ляпкӧдчыліс тэлань... да морӧс тырныд кӧдзис лыдтӧм дзоридз... И тайӧ мичсьыс чужис сьывны сьӧлӧм... Чӧв овны оз позь... Либӧ колӧ кувны...
