КАЗЬТЫЛӦМ


Пукалам паччӧрын тӧлын,
Паччӧрын кирпичыс пым.
Гӧвкъялӧ енэжын тӧлысь,
Дзирдалӧ чарӧм выв лым.

Сёрнисор печкӧм шы кылӧ:
Варов чӧрс бергалӧ — жбыр.
Ывлаын лэчыд тӧв сьылӧ
Лым чирӧс йӧктӧдігтыр.

— Висьтав жӧ меным вай, пӧчинь,
Кыдзиджык коллин тэ нэм?.. —
Паназыр тӧлысьыс вӧчис
Чужӧмсӧ мисьтӧма мем.

Ыджыда лолыштіс пӧчӧ,
Чӧрс шыыс лӧньыштіс сутш...
Эзысьӧн тӧлысьыс кӧдзӧ:
Нюмъялӧ енэжса кутш.

— Томисянь дӧваӧн коли —
Челядьӧн керкаӧй тыр, —
Пашлякыс стен бердӧ шолис,
Керкаӧ тайкӧ оз пыр!

— Сир курыд пӧсь сора олӧм
Ме вывті муніс нэм чӧж... —
Стен бердӧ вой тӧлыс воліс,
Чишнитіс сылӧн кузь бӧж: —

Сьӧкыд удж вӧчи ме нэмсӧ,
Шоч вой эз позявлы сой, —
Тӧлысьыс кымӧрӧ дзебсис,
Гудыртчис сӧдз эзысь вой.

Уна на пӧчӧ мем мойдіс,
Синваыс визувтіс пым.
Омляліс ывлаын вой тӧв,
Йӧй морт моз чашйысис лым.

Ичӧт на сэки ме вӧлі,
Этша на вежӧртіс юр.
Важӧн нин лэччӧма тӧлысь.
Узьӧ йӧз... вӧтъясыс бур.