ДЗОДЗӦГЪЯС


Кымӧр сайсянь со горзӧны дзодзӧгъяс,
Кузь туй вуджигӧн вынсяліс борд.
Туйсӧ лунвылӧ индісны кодзувъяс,
Бӧрсӧ лэбигӧн тӧдӧны горт.

Ӧшинь-ӧдзӧстӧм налӧн кӧть позъясыс,
Чужан муыслӧн шонтас пӧсь сыв.
Гӧснеч пыддиыс юсь-дзодзӧг гозъяяс
Татчӧ вайӧны выль сьыланкыв.

Медым му вылын олӧм эз помасьлы,
Найӧ быдтысьны локтӧны век.
Посни пиянсӧ вердӧны вомсьыныс —
Нёньпом кага кодь лэбачпи сэк.

Да и йӧзыс ӧд нырччӧны сы ради,
Водзӧ томмӧдны мед вӧльнӧй свет,
Челядь гӧлӧсӧн йӧлӧга кыпыда
Став му пасьтаыс юраліс мед.