ГЫТСАН


Лӧзов сынӧдӧдз бордъя гытсан
Ыджыд лэбач моз лыбӧ-качӧ.
Кымынь бергӧдчӧ муыс быдсӧн,
Енэж чеччалӧ сэтчӧ-татчӧ.

Еджыд юсь моза, чайтӧ, лэбас,
Кыпыд сынӧдас лэптас ловсӧ.
Сылӧн тырмӧ на вын и эбӧс,
Ловъя ловлӧн моз вирыс ворсӧ.

Сӧмын кӧсйӧмыд оз пыр артмы —
Увланьюрасис енэж и ю,
Качысь гытсанлысь бордсӧ гартӧ
Сімӧм чепъясӧн ас бердас му.

Да и олӧмас пырджык тадзи —
Борднад ӧвтчан да он на тай лэб.
Сідз и шыбласям сэтчӧ-татчӧ,
Кӧть и кӧсйӧмным абу зэв жеб.