ГОЖСЯ ЛУНӦ


Гожся лунӧ ветлім ми
Емва бокӧ куртны видз.
Русыд кудриа том ныв
Сьыліс мича сьыланкыв.

Сьыліс мича сьыланкыв
Русыд кудриа том ныв.
Дзоргис сы вылӧ том зон:
Тайӧ нывлы — абу дон.

Уджын сійӧ зіль да бур,
Вылын кутӧ ассьыс юр;
Сійӧс нинӧмӧн он йӧрт,
Сьӧкыд делӧысь оз бӧрд.

Вӧлі зонмыс мича, ён,
Сылы аслыс эз вӧв дон:
Муніс уна фронтъяс пыр,
Морӧс — орденъясӧн тыр.

Куртӧ, сьылӧ сьыланкыв,
Дзоргӧ зон вылӧ том ныв:
«Сэтшӧм мича, сэтшӧм бур!»...
Сьӧлӧмыслы ин оз сюр.

Куртсис видз и пуксис рыт,
Енэж — кодзувъясӧн тыр.
Найӧ, ышлолалігтыр,
Кык верст локтісны рытбыд.

1949 во.