ПӦРЫСЬМӦМ КОМИ ВӦРАЛЫСЬГажтӧмтчӧ ӧтнасӧн Эжва кыр йылын Пӧрысьмӧм-дзормӧм важ вӧралысь морт. Лӧзалысь вӧр вылӧ видзӧдӧ чӧла — Быттьӧкӧ-й сэтӧні медмуса горт. Шуны кӧ, олӧмас вӧчис не этша — Кыйсис и быдтысис бур йӧзыс ног. Позьӧ и шойччыштны ӧні, мый эштан... Сӧмын тай синъясас вӧйӧма шог. Важ моз век чуксалӧ кыйсьыны Парма — Мый нӧ пӧ сы дыра мелань он лок? Вермис кӧ, сідз эськӧ-й лэбовтіс арнад, Сӧмын тай мортыдлӧн бырӧма кок. Вежӧрыс лэчкын моз зэлыда видзӧ Удала олӧмысь быд лунъя шуд: Некод нин немторӧн тэнӧ оз удзӧд, Ас бурӧн вӧчӧмысь некод оз кут. Ловъя став ловсӧ тэ вӧр кодьсьыс тӧдан, Тэнӧ сэн ыджыдӧ пуктӧ и ош, Туй тэныд восьса, кӧть кодарӧ мӧдан — Ягӧ и нюрӧ, ни сьӧртӧ он вош. Арся сӧдз вӧр-ваыс вичко кодь гора, Енэжкӧд сӧльнитчӧм — сӧстӧм и дон, Медся бур сьылан моз чуксалӧ-корӧ Чуналан дон лӧняс увалысь пон. Ыркалӧм сынӧдыс ырзьӧдӧ ловтӧ — Кутшӧм ӧд кӧр сэтчӧ вӧрыс эз сор! — Пасьтала босьтӧма яг и ю ковтыс Долыда лэбалысь йӧлӧга гор. Та кадӧ сэтшӧма лышкыдмӧ вӧр-ва! Быдлаын сямман тэ вӧчны бур гыд: Дасьтыны сьӧлӧмтӧ бурмӧдысь сорва — Комъясысь юква и дозмӧра шыд. Мыйсӧ эз заптывлы Пармаысь арнад! — Ельдӧг и сьӧла, и юмов гӧрд пув, Ноп тырыс топӧдас небыд ку — зарни, — Сӧмын и нимкодясь, ов да эн кув!.. Кытчӧкӧ кольӧм и бырӧм тай ставыс, Вӧр шудыс некор нин сылы оз лок — Эбӧсыс дзикӧдз со эновтіс таво, Сӧмын и дзескӧдӧ казьтылан шог. Сэсся и мӧд пӧлӧс шог сійӧс йирӧ — Лёк ногӧн чашйӧны пожӧм и коз, Пемӧс и пӧткаыс вӧр кодьсьыс бырӧ, Коньӧрлы некӧні лӧсьӧдны поз. Тадзинад сэсся и вӧралысь йывмӧ — Некодлы лоӧ сэк октыны лэч, Мудера дзугласьысь туланӧс кыйны, — Комиыс вунӧдас пӧльяслысь этш. Гажтӧмтчӧ ӧтнасӧн Эжва кыр йылын Пӧрысьмӧм-дзормӧм важ вӧралысь морт, Лӧзалысь вӧр вылӧ видзӧдӧ чӧла — Кӧдзалӧм сэтӧні медмуса горт.
