КЫМЫН ПЫР ВОДЗӦ МЕ ОЛАКымын пыр водзӧ да дырджык ме ола, Сымын век мусаджык лоӧ важ горт, Кӧні ме чужлі да быдӧнлы колі, Кӧні ме лэбзьыны вынсьӧді борд. Батьыд и мамыд со мичаӧсь, томӧсь, На дінын шоналӧ ичӧтлӧн вир, Бур ногӧн велӧдӧм кылан тэ помысь, — Тэ водзын паськӧдчӧ шемӧс кодь Мир. Ставыс на олӧмас кӧнікӧ водзын, Ловтӧ ни сьӧлӧмтӧ оз кырлы шог, Немторысь оз ков на мынтыны водзӧс, — Ичӧт на зонкалӧн — ичӧтик мог. Асывнас садьман и ӧшиньтӧ восьтан — Сад йӧрын кайяслӧн кылӧ нин зык, Яр еджыд би пытшкын льӧм пу сэн сотчӧ, Пелысьӧ шлапкысьӧ вижоват быг. Мамыдлӧн пачыс нин эштӧм и ваймӧм, Руасьысь пӧсь шаньга пӧв вылын дась, Гоз-мӧдӧс някыртан мӧс вӧра йӧлӧн, Сэсся и рытӧдзыс лэбалан скач. Гожӧмбыд лючкисӧ ваысь он петав, Гожйӧдчан, вуграсян — куыд дзик сьӧд, Дерт, тшӧтш и отсӧгтор бать-мамлы сетан — Киськасян, вотыштан гобъяс и чӧд. Таысь кӧ ошкыштас батьӧыд тэнӧ, Лолан тэ му вылас медшуда зон, Чайтан, мый олӧмас быдторсӧ венан, Быдман зэв тӧлка и ставсяыс ён... Ӧні со олӧмӧй воис нин арлань... Тырмыліс меным и радлун, и шог... Аддзылі йӧз муяс, шензьӧдысь каръяс... Гырыся мӧвпалі быдсяма ног... Важӧн нин бать-мамӧс аслас жар биын Томъясӧн дзужаліс Кызьӧд яр нэм, Сэсся и жаль тӧдтӧг тшапнитіс пиӧс, — Сӧмын и шогъясыс колисны мен. Важӧн нин ӧтнасӧн сісьмӧ и пӧрӧ Миянӧс быдтылысь мусаник поз... Ӧні ме ачым нин лои со пӧрысь, — Ылісянь кутны ог вермы важ моз... Сӧмын тай кымын пыр водзӧ ме ола, Лов вылын муса век менам важ горт, Матын сэн Сыктыв ю визувтӧ чӧла, — Гажаин бӧрйылӧм пӧль — коми морт.
